Bida di Famia i Amistat ku Otro Hende
Pa hopi hende, ta difísil pa mantené bon amistat ku nan famia- i amigunan. Laga nos trata algun prinsipio di Beibel ku por yuda nos haña bon amistat ku otro hende.
PENSA RIBA OTRO HENDE
PRINSIPIO DI BEIBEL: “No buska boso mes interes so, ma tambe interes di otro hende.”—Filipensenan 2:4.
LOKE ESAKI TA ENSERÁ: Lo bo tin bon amistat ku otro hende ora bo ta pensa riba loke abo por hasi pa nan i no riba loke nan por hasi pa bo. Si bo ta pensa solamente riba bo mes, bo por daña bo amistat ku otro hende. Por ehèmpel, ora un kasá ta pensa riba su mes deseonan so, lo e tin mas chèns di bira infiel na su pareha. Ademas, hende lo no ke ta amigu di un persona ku semper ta broma tokante tur loke e tin i tokante kuantu kos e sa. P’esei, manera e buki The Road to Character ta bisa: “Hende egoista lo haña nan ku hopi problema.”
LOKE BO POR HASI:
-
Yuda otro hende. Bon amigu ta konfia otro i semper ta kla pa yuda otro. Segun algun estudio, hende ku ta yuda otro hende ta sufri ménos di depreshon i tin mas balor propio.
-
Mustra empatia. Empatia ta e abilidat di hinka bo mes den sapatu di un otro persona. Si bo ta mustra empatia, lo bo no usa sarkasmo ofensivo, esta, hasi chansa ku e intenshon di hasi daño na un persona.
Ora bo ta mustra empatia, ta bira mas fásil pa bo tolerá diferensia di opinion i komportashon di otro hende. I esei por yuda bo evitá prehuisio i yuda bo haña amistat ku hende di diferente kultura òf background.
-
Pasa tempu ku otro hende. Mas tempu bo pasa ku otro hende, mas lo bo siña konosé nan. Si bo ke haña un bon amigu, bo mester papia kuné tokante e kosnan ku e ta interesá den dje i ku ta importante p’e. Esei ke men ku ta importante pa bo ta un bon skuchadó i pa bo mustra interes den e preokupashonnan di bo amigu. Un estudio resien ta bisa ku “hende ku tin kòmbersashon profundo ku otro ta mas felis.”
SKOHE BON AMIGU
PRINSIPIO DI BEIBEL: “Mal kompania ta daña bon kustumber.”—1 Korintionan 15:33.
LOKE ESAKI TA ENSERÁ: Hende ku bo ta anda kuné lo por tin sea bon influensia òf mal influensia riba bo. Sosiólogonan tambe ta rekonosé esei. Por ehèmpel, nan ta bisa ku un persona ku pasa hopi tempu ku esnan ku ta huma òf ku ta divorsiando, probablemente lo kuminsá huma òf lo ke divorsiá.
LOKE BO POR HASI: Bira amigu di hende ku tin kualidat i norma i balor ku bo ta atmirá òf lo ke imitá. Por ehèmpel, asosiá ku hende ku ta prudente, respetuoso, generoso i hospitalario.
OTRO PRINSIPIO DI BEIBEL
Wak vidio basá riba Beibel ku ta yuda pareha kasá, tiner i mucha pa mehorá nan bida di famia
NO BISA KOS PA HASI DAÑO NA OTRO HENDE.
“Tin hende ta papia sin pensa, manera hinká di spada.”—PROVERBIONAN 12:18.
SEA GENEROSO.
“E hende generoso lo prosperá.”—PROVERBIONAN 11:25.
TRATA OTRO HENDE MESKOS KU ABO KE PA NAN TRATA BO.
“Tur loke boso ke pa hende hasi ku boso, boso tambe mester hasi ku nan.”—MATEO 7:12.
