Bo Tabata Sa?
Fuera di Beibel, ki otro prueba tin ku e israelitanan tabata esklabo na Egipto?
Beibel ta splika ku, despues ku e madianitanan a hiba Yosef Egipto, e patriarka Yakòb ku su famia a muda di Kanan pa Egipto. Nan a kuminsá biba na Gosen, un region situá na boka di Riu Neil. (Gén. 47:1, 6) Beibel ta bisa ku e israelitanan “a multipliká bira masha poderoso mes.” P’esei, e egipsionan a haña miedu di nan i a obligá nan bira esklabo.—Éks. 1:7-14.
Algun krítiko moderno a hasi chèrchi di e relato bíbliko ei i a bisa ku e ta un mito. Pero, tin prueba ku tabatin esklabo semita * na Egipto di antigwedat.
Por ehèmpel, arkeólogo a haña ruina di un komunidat antiguo den nort di Egipto. Dr. John Bimson a bisa ku den e region ei nan a haña prueba di 20 òf mas komunidat semita. Ademas James Hoffmeier, eksperto riba tereno di asuntunan di antiguo Egipto, a bisa: “For di mas o ménos 1800 te ku 1540 promé ku Kristu, Egipto tabata un lugá ku a atraé imigrante di e pueblonan di abla semita ku tabata di e parti wèst di Asia [di unda Yakòb ku su famia a bini].” El a agregá: “E periodo ei ta korespondé ku e asina yamá ‘tempu di e patriarkanan’ i ta kuadra ku e tempu i sirkunstansia ku Génesis ta papia di dje.”
Na zùit di Egipto nan a haña mas prueba. Un fragmento di papiro ku a data di Imperio Medio (mas o ménos entre aña 2000 i 1600 promé ku Kristu) tin nòmber di esklabo ku a traha den un kas den e region ei. Mas ku 40 di e nòmbernan ei ta semita. E esklabonan ei òf, kriánan ei, a traha komo kòki, wefdó-di-tela i peon. Hoffmeier a bisa: “Mirando ku tabatin mas di 40 semita na e kas ei den Tebaida [zùit di Egipto], probablemente rònt Egipto tabatin un kantidat konsiderabel di semita, foral den e region na boka di Riu Neil.”
Arkeólogo David Rohl a skirbi ku algun di e nòmbernan di e esklabonan riba e lista “ta parse manera saká for di Beibel.” Por ehèmpel, e fragmentonan di papiro tin nòmber paresido na Isakar, Aser i Sifra. (Éks. 1:3, 4, 15) Rohl a yega na e siguiente konklushon: “Esei ta prueba bon kla ku e israelitanan tabata esklabo na Egipto.”
Dr. Bimson a konfirmá: “E relatonan bíbliko tokante sklabitut na Egipto i e éksodo tin base históriko sólido.”
^ par. 4 E palabra semita ta bini di Sèm, un di e tres yunan di Noe. Probablemente e desendientenan di Sèm a inkluí e israelitanan, e elamitanan, e asirionan, e promé kaldeonan, e sirionan i vários tribu arabir.
