DEN tempu bíbliko, un mayordomo tabata kuida kas òf propiedat di un otro hende.

Yosef, un di e yunan di patriarka Yakòb, tabata esklabo na Egipto, pero el a bira mayordomo di e kas di Potifar, su shon. De echo, Potifar “a laga tur loke ku e tabatin na enkargo di Yosef.” (Gén. 39:2-6) Despues, ora Yosef a bira un gobernante poderoso na Egipto, el a nombra un mayordomo pa kuida su kas.—Gén. 44:4.

Den tempu di Hesus, doño di kunuku generalmente tabata biba den stat leu for di nan kunuku. P’esei, nan tabata nombra mayordomo pa asina supervisá e trabounan ku tabata hasi riba nan kunuku.

Ken por a bira un mayordomo? E eskritor romano Columella, kende a biba den promé siglo, a bisa ku e esklabo ku un shon a nombra pa bira mayordomo, mester ta un hende ku “tabatin eksperensia den trabou” di kunuku. E mester ta un hende ku tin e kapasidat di “ehersé outoridat sin negligensia i sin krueldat.” Columella a añadí: “Riba tur kos, esaki ta ferwagt di dje: e no mester a kere ku e sa tur kos i semper e mester tabata habrí pa siña.”

Beibel ta usa trabou di un mayordomo pa ilustrá algun aktividat ku ta tuma lugá den un kongregashon kristian. Por ehèmpel, apòstel Pedro ta animá kada kristian pa usa e abilidat i kapasidat ku Dios a duna nan “pa sirbi otro komo bon mayordomo di e bondat inmeresí di Dios.”—1 Ped. 4:10.

Hesus mes a usa ehèmpel di un mayordomo den e ilustrashon ku tin na Lukas 16:1-8. Ademas, den un profesia tokante e señal di su presensia komo Rei, Hesus a sigurá su siguidónan ku lo e nombra un “esklabo fiel i prudente,” òf “mayordomo fiel.” E trabou prinsipal di e mayordomo ei lo ta pa konstantemente proveé kuminda spiritual pa e siguidónan di Kristu durante e tempu di fin. (Mat. 24:45-47; Luk. 12:42) Nos ta gradisidu ku nos ta entre esnan ku ta risibí publikashon ku e mayordomo fiel ei ta prepará i hasi disponibel rònt mundu.