1. Matrimonio

Hende tin diferente punto di bista tokante di matrimonio i di loke ta nesesario pa por tin un matrimonio felis.

SPLIKASHON: Matrimonio ta un areglo ku Dios a instituí. Pues, e sa loke ta nesesario pa un pareha por ta felis. (Marko 10:​6-9) Ora tantu e esposo komo e esposa ta enfoká riba e nesesidat di nan kasá, nan lo tin un matrimonio felis. Un esposo ku ta stima su esposa, lo kuid’é i trat’é bon. Anto un esposa ku ta respetá su esposo, lo apoy’é i papia kuné na un manera respetuoso.

BEIBEL SU GUIA TA DUNA BON RESULTADO: Quang i Thi, di Vietnam, tabata pensa ku nunka nan lo no por tin un matrimonio felis. Quang hopi bes no tabata amabel. El a bisa: “Mi no tabata wòri kon Thi tabata sinti, i hopi bes mi tabata humi’é.” Thi tabata kier a divorsiá. El a bisa: “Mi tabata sinti ku mi no por a konfia ni respetá mi esposo mas.”

Ku tempu, Quang i Thi a siña loke Beibel ta bisa i kon pa apliká Efesionan 5:33 den nan matrimonio. Quang a bisa: “E versíkulo akí a yuda mi mira ku mi mester ta amabel, . . . i ku mi mester laga Thi sinti ku mi ta stim’é, i ku mi ta kuid’é materialmente, físikamente i emoshonalmente. Ora mi trat’é asina e ta stima mi mas i mi ta gana su rèspèt.” Anto Thi a bisa: “Ora mi apliká e konseho na Efesionan 5:33 i respetá mi esposo, mi ta sinti mi mas trankil, stimá i protehá.”

 2. Kon pa Trata Otro Hende

Hende hopi bes ta trata otro hende malu pa motibu di nan nashonalidat, aparensia, religion òf orientashon seksual.

SPLIKASHON: Beibel no ta siña nos pa odia hende ku tin un nashonalidat diferente òf ku ta homoseksual. Kontrali na esei, Beibel ta animá nos pa trata tur hende ku rèspèt, sin importá nan nashonalidat òf klase sosial. (Echonan 10:34) Asta si nos no ta di akuerdo ku loke otro hende ta kere òf hasi, tòg nos por trata nan na un manera amabel i respetuoso.—Mateo 7:12.

BEIBEL SU GUIA TA DUNA BON RESULTADO: Daniel a siña ku e mester a trata hende di Asia komo si fuera nan tabata un menasa pa su pais. E tabata odia kualke persona ku tabatin un background asiátiko, i hopi bes e tabata insultá nan den públiko. Daniel a bisa: “Mi tabata pensa ku mi tabata ‘defendé mi pais’ . . . E no a ni pasa den mi mente ku loke mi tabata pensa i hasi tabata robes.”

Eventualmente, Daniel a siña loke Beibel ta bisa. Daniel a bisa: “Mi mester a kambia mi manera di pensa kompletamente . . . Mi mester a mira hende manera Dios ta mira nan, esta, ku nos tur ta meskos, sin importá di unda nos ta bini.” Daniel a deskribí kon e ta sinti awor ora e sera konosí ku hende. El a bisa: “Awor, mi no ta ni pensa riba nan nashonalidat. Mi ta stima tur sorto di hende, i mi tin amigu rònt mundu.”

 3. Plaka

Hopi hende ta kore tras di plaka pa nan por ta felis i tin un mihó futuro.

SPLIKASHON: Ta bèrdat ku nos tin mester di plaka, pero plaka no ta garantisá nos felisidat ni un futuro sigur. (Proverbionan 18:11; 23:​4, 5) En bes di esei, berdadero felisidat i un futuro sigur ta bini ora nos apliká Dios su sabiduria ku tin den Beibel.—1 Timoteo 6:​17-19.

BEIBEL SU GUIA TA DUNA BON RESULTADO: Loke tabata importante pa Cardo, un hòmber na Indonesia, tabata pa akumulá rikesa. El a bisa: “Mi tabatin e kosnan ku mayoria di hende ta soña di dje. . . . Mi por a biaha, i mi por a kumpra outo, kas i kos luhoso.” Pero, su rikesa no a dura pa semper. Cardo a bisa: “Un hende a estafa mi i den un fregá di wowo mi a pèrdè tur e plaka ku mi a traha asina duru i asina tantu tempu pa haña. . . . Mi a traha duru pa vários aña pa bira riku. Pero, na final mi a keda desapuntá, pasobra mi no tabatin nada, i mi tabata sinti ku mi no tabata bal nada.”

Ku tempu, Cardo a kuminsá apliká Beibel su konseho tokante plaka. E no ta usa tur su energia mas pa kore tras di rikesa. El a skohe pa hiba un bida mas simpel. El a bisa: “Awor mi ta sinti ku mi tin berdadero rikesa, pasobra mi tin un bon amistat ku Dios . . . Mi por drumi bon anochi, i mi ta realmente felis.”

 4. Sèks

Hende tin diferente opinion tokante loke ta aseptabel relashoná ku sèks.

SPLIKASHON: Beibel a pone límite relashoná ku nos deseonan seksual. E palabra “fornikashon” ta inkluí adulterio, prostitushon, relashon seksual entre dos hende ku no ta kasá ku otro, homoseksualidat i relashon seksual ku bestia. (1 Korintionan 6:​9, 10) Sèks ta un bunita regalo di Dios. Anto Dios ke pa solamente un hòmber i un muhé ku ta kasá ku otro disfrutá di e regalo ei.—Proverbionan 5:​18, 19.

BEIBEL SU GUIA TA DUNA BON RESULTADO: Un señora na Australia ku yama Kylie a bisa: “Tempu mi tabata soltera, mi tabata pensa ku si mi tene relashon seksual, lo mi sinti mi stimá i sigur di mi mes, pero a sosodé nèt lo kontrali. Mi tabata sinti insigur i ku hende no tabata stima mi.”

Mas despues, Kylie a siña i apliká loke Beibel ta bisa tokante sèks. El a bisa: “Mi por mira ku Dios su normanan ta protehá nos di doló i tristesa . . . Mi ta hasi kos manera Yehova ke. Anto awor mi tin un kasá ku ta laga mi sinti mi stimá i sigur di mi mes. Aplikando Beibel su guia a skapa mi di hopi doló di kabes!”