Na un okashon, ora Hesus tabata pafó di e teritorio di Israel den e provinsia romano di Siria, un señora griego a aserká Hesus pa pidié yudansa. Den Hesus su kontesta, el a konta un ilustrashon ku a kompará hende no hudiu ku “kachó chikitu.” Bou di e Lei di Moises, kachó tabata ser konsiderá un bestia impuru. (Levítiko 11:27) Pero Hesus su intenshon tabata pa ofendé e señora griego akí i otro hende no hudiu?

Nò. E punto ku Hesus a splika su disipelnan tabata ku su prioridat na e tempu ei tabata pa yuda e hudiunan. Pues el a ilustrá e punto akí ora el a bisa e señora griego: “No ta bon pa kue pan di e yunan i tir’é pa kachó chikitu.” (Mateo 15:21-26; Marko 7:26) Entre e griego- i romanonan, hopi biaha un kachó tabata un bestia stimá ku tabata biba den kas di su doño i tabata hunga ku mucha chikitu. Pues e ekspreshon “kachó chikitu” a krea un imágen agradabel i a lanta un dushi sintimentu. E señora griego a komprondé kiko Hesus tabata ke men i a kontest’é: “Bèrdat, Señor, ma en realidat e kachó chikitunan tambe ta kome wiriwiri ku ta kai for di mesa di nan doño.” Hesus a elogi’é pa su fe i a kura su yu muhé.—Mateo 15:27, 28.

E barku ku mester a hiba Pablo Italia tabatin problema pa nabegá kontra bientu. Durante un eskala, e apòstel a konsehá e kapitan pa posponé e biahe. (Echonan 27:9-12) Ki base e apòstel tabatin pa e konseho akí?

Den antigwedat, nabegantenan tabata bon na haltura ku tabata peligroso pa nabegá riba Laman Mediteráneo durante wenter. Entre meimei di novèmber pa meimei di mart no tabata rekomendabel pa nabegá. Pero e biahe ku Pablo a menshoná mester a tuma lugá na sèptèmber òf òktober. Den e Epitome of Military Science, e eskritor romano Vegetius (di siglo 4 despues di Kristu) a splika tokante nabegashon riba laman: “Algun luna ta bon pa nabegá, algun luna kisas i sobrá luna ta imposibel.” Vegetius a bisa ku entre 27 di mei pa 14 di sèptèmber tabata safe pa nabegá, i e dos periodonan peligroso tabata entre 15 di sèptèmber pa 11 di novèmber i entre 11 di mart pa 26 di mei. Pablo, un hòmber ku a yega di biaha hopi, siguramente tabata konosé e faktornan akí. E doño di e barku i e kapitan kasi sigur tambe tabata sa esaki, pero nan a ignorá Pablo su konseho. Anto e barku a noufragá.—Echonan 27:13-44.