“E Tres Reinan” Ken Nan Tabata?

Hopi bes esenanan di e nasementu di Hesus ta mustra tres hòmber bistí ku paña largu ta yega ku nan kamel na un stal kaminda e baby Hesus ta drumi den un pesebre. Generalmente hende ta yama e tres bishitantenan bon bistí aki e tres reinan. Kiko Beibel ta bisa di nan?

Segun Beibel, e supuesto reinan ei tabata hòmbernan “for di oriente,” i ta einan nan a haña sa di e nasementu di Hesus. (Mateo 2:1, 2, 9) E hòmbernan ei mester a biaha hopi pa nan por a yega Hudea. Ora ku finalmente nan a haña Hesus, ya e no tabata un baby resien nasí den un stal. En bes di esei, e hòmbernan a haña Maria i “e mucha” ta biba den un kas.—Mateo 2:11.

Beibel ta yama e personanan aki mago òf “spesialista den studiamentu di strea” (BPK, nota na pia di página), i e no ta bisa kuantu nan tabata. The Oxford Companion to the Bible ta splika: “E interes ku e bishitantenan aki tabatin den e strea ku a guia nan na Bètlehèm ta mustra e konekshon entre magia i astrologia.” Di un manera kla Beibel ta kondená tur forma di magia i di práktikanan babilóniko pa purba saka informashon for di strea.—Deuteronomio 18:10-12; Isaías 47:13.

E informashon ku a ser transmití na e hòmbernan aki no a hiba na nada bon. Mas bien, el a lanta rabia di Rei Herodes kende tabata un hòmber malbado i yalurs. I esaki a pone ku Hosé, Maria i Hesus mester a hui bai Egipto i ku tur mucha hòmber na Bètlehèm “di edat di dos aña p’abou,” a ser asesiná. For di e informashon ku Herodes a haña serka e astrólogonan, el a kalkulá kuidadosamente ki tempu Hesus a nase. (Mateo 2:16) En bista di tur e problemanan ku bishita di e hòmbernan aki a kousa, tur kos ta mustra ku e strea ku nan a mira i e mensahe tokante ‘esun ku a nase komo rei di e hudiunan’ a bini di Dios su enemigu, Satanas e Diabel, kende kier a kaba ku Hesus.—Mateo 2:1, 2.