“Hala Serka Dios”
“Hala Serka Dios”
“Hala serka Dios i e lo hala serka boso.”—SANTIAGO 4:8.
1, 2. (a) Kiko hende ta pretendé hopi bes? (b) Kiko Santiago a animá e kristiannan pa hasi, i dikon esei tabata nesesario?
“DIOS ta ku nos.” Hende a yega di pone e palabranan aki riba emblema nashonal i asta unifòrm di sòldá. Den nos tempu hende a graba e palabranan “den Dios nos ta konfia” riba masha hopi moneda i plaka di papel. Ta normal pa hende pretendé di tin un bon relashon ku Dios. Pero, djis bisa ku bo tin un bon relashon ku Dios, òf pon’é den un lema pa hende mira, ainda no kier men ku di bèrdat bo tin un bon relashon ku Dios; bo no ta di akuerdo?
2 Beibel ta mustra ku nos por tin un bon relashon ku Dios. Pero pa logr’é nos mester hasi esfuerso. Asta algun kristian ungí di promé siglo tabatin ku fortalesé nan relashon ku Yehova Dios mas. Santiago, un ansiano kristian, mester a spièrta algun di nan tokante nan tendensianan karnal i nan falta di limpiesa spiritual. Den su konseho el a duna nan e animashon poderoso aki: “Hala serka Dios i e lo hala serka boso.” (Santiago 4:1-12) Kiko Santiago tabata kier men ku nos mester “hala serka Dios”?
3, 4. (a) Kiko e ekspreshon “hala serka Dios” por a pone algun dje lektornan di promé siglo dje karta di Santiago kòrda? (b) Dikon nos por ta sigur ku nos por hala serka Dios?
3 Santiago a usa un ekspreshon ku lo a zona konosí pa hopi di su lektornan. E Lei di Moises a duna e saserdotenan instrukshon spesífiko tokante kon pa “aserká” Yehova na fabor di su pueblo. (Éksodo 19:22) Pues, e palabranan ei por a pone e lektornan di Santiago su karta kòrda ku aserká Yehova no ta un kos chikitu. E ta e dignatario di mas haltu di universo.
4 Di otro banda, manera un eksperto di Beibel a yega di remarká, “e konseho [na Santiago 4:8] ta mustra ku Santiago tabatin un gran optimismo.” Santiago tabata sa ku semper Yehova a invitá hende imperfekto di un manera amoroso pa hala serka dje. (2 Krónikanan 15:2) E sakrifisio di Hesus a habri kaminda pa hende por hala serka Yehova den un sentido mas kompleto. (Efesionan 3:11, 12) Awe, miónes di hende tin e posibilidat di aserká Dios! Pero kon nos por probechá dje oportunidat maravioso aki? Brevemente nos lo trata tres manera pa nos hala serka Yehova Dios.
Sigui Siña Konosé Dios
5, 6. Kon e ehèmpel di Samuel komo mucha ta yuda nos komprondé kiko “konosé” Dios ta enserá?
5 Na Huan 17:3 Hesus a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” Beibel Santu i hopi otro tradukshon dje teksto aki ta papia simplemente di “konosé” Dios. Pero Tradukshon di Mundu Nobo ta usa e ekspreshon ‘gana konosementu’ di Dios. Ademas, vários eksperto a yega di komentá ku e manera ku e palabra ta ser usá den e teksto griego original ta enserá hopi mas ku “konosé”: e ta enserá un proseso ku ta sigui, i ku por asta hiba dos persona na konosé otro íntimamente.
6 E idea di siña konosé Dios íntimamente no tabata algu deskonosí den tempu di Hesus. Por ehèmpel, den e Skritura Hebreo ta pará skirbí ku tempu Samuel tabata mucha, e “no tabata konosé SEÑOR ainda.” (1 Samuel 3:7) Esei kier men ku Samuel tabata sa masha poko tokante su Dios? Nò. Su mayornan i e saserdotenan lo mester a siñ’é hopi kos. Pero segun un eksperto, e palabra hebreo usá den e versíkulo ei por referí na konosé “den e sentido di mas íntimo.” Na e momentu ei ainda Samuel no a siña konosé Yehova íntimamente manera el a bin konos’é despues, tempu ku el a sirbi komo bosero di Yehova. Segun ku Samuel a sigui krese, el a siña konosé Yehova di bèrdat, i a forma un relashon personal i íntimo kuné.—1 Samuel 3:19, 20.
7, 8. (a) Dikon nos no mester tin miedu di studia e siñansanan profundo di Beibel? (b) Kua ta algun bèrdat profundo den e Palabra di Dios ku ta bon pa nos studia?
7 Abo ta trahando pa siña konosé Yehova, pa bo por tin un relashon íntimo kuné? Pa bo hasi esei bo mester “anhelá” e kuminda spiritual ku Dios ta perkurá. (1 Pedro 2:2) No keda kontentu ku djis e siñansanan básiko. Traha pa bo komprondé e siñansanan mas profundo ku tin den Beibel. (Hebreonan 5:12-14) Bo ta sinti ku bo no por debí ku, segun bo, sierto siñansanan ta muchu difísil? Si esei ta e kaso, kòrda ku Yehova ta é “Siñadó.” (Isaías 30:20) E sa kon pa hasi bèrdatnan profundo bira komprendibel pa mente humano imperfekto. I e por bendishoná bo esfuersonan sinsero pa komprondé loke e ta siña bo.—Salmo 25:4.
8 Dikon bo no ta eksaminá kuantu bo sa tokante algun dje kosnan profundo di Dios? (1 Korintionan 2:10) E temanan aki no ta laf manera e tópikonan ku teólogo- i lidernan religioso ta papia ariba. Nan ta siñansanan bibu ku ta duna nos un komprondementu fasinante dje mente i kurason di nos Tata amoroso. Por ehèmpel tin e reskate, e “misterio” òf “sekreto sagrado” i e diferente paktonan ku Yehova a usa na benefisio di su pueblo i pa kumpli ku su propósito. E temanan aki, i hopi otro tema similar, ta hopi agradabel i útil pa investigá i studia.—1 Korintionan 2:7.
9, 10. (a) Pakiko orguyo ta peligroso, i kiko por yuda nos evitá di bira orguyoso? (b) Pa loke ta trata e konosementu di Yehova, dikon nos mester sòru keda humilde?
9 Segun ku bo ta krese den konosementu di bèrdatnan spiritual profundo, bo mester tene kuidou ku un peliger ku por presentá ora bo oumentá den konosementu: orguyo. (1 Korintionan 8:1) Orguyo ta peligroso, pasobra e ta hala hende for di Dios. (Proverbionan 16:5; Santiago 4:6) Kòrda ku niun hende no tin motibu pa broma tokante su konosementu. Mira por ehèmpel kiko tin skirbí den e introdukshon di un buki ku ta eksaminá e avansenan sientífiko mas nobo: “Mas nos haña sa, mas nos ta realisá kon poko nos sa. . . . Tur loke nos a siña no ta nada kompará ku tur loke nos falta pa siña ainda.” Bo no ta topa komentarionan humilde asina ku hopi frekuensia, i ta agradabel ora nan presentá. Pero, e konosementu di mas amplio ku ta eksistí ta e konosementu di Yehova Dios. Pues, den loke ta toka e konosementu ei, nos tin asta mas rason pa keda humilde. Dikon?
10 Mira algun di e ekspreshonnan den Beibel tokante Yehova. “Bo pensamentunan ta masha profundo.” (Salmo 92:5) “[Yehova] su komprondementu ta infinito.” (Salmo 147:5) “[Yehova] su komprondementu ta inskudriñabel.” (Isaías 40:28) “O profundidat di e rikesanan, tantu di e sabiduria komo di e konosementu di Dios!” (Romanonan 11:33) Klaramente, nunka nos lo no haña sa tur loke tin pa sa tokante Yehova. (Eklesiástes 3:11) El a siña nos hopi kos maravioso, pero semper lo sobra un kantidat sin fin di kos pa nos sigui siña. Ora bo pensa riba esei, e no ta pone bo sinti emoshoná i humilde na mes momentu? P’esei, segun ku nos ta siña mas, laga nos semper usa nos konosementu komo base pa hala serka Yehova i yuda otro hende hasi meskos, i nunka komo un medio pa halsa nos mes riba otro hende.—Mateo 23:12; Lukas 9:48.
Demostrá Bo Amor pa Yehova
11, 12. (a) Ki efekto loke nos ta siña tokante Yehova mester tin riba nos? (b) Kiko ta mustra ku un hende su amor pa Dios ta berdadero?
11 Korektamente apòstel Pablo a konektá konosementu ku amor. El a skirbi: “Esaki ta mi orashon, ku boso amor por abundá mas i mas ainda den konosementu bèrdadero i tur disernimentu.” (Filipensenan 1:9) En bes di pone nos bira orguyoso, kada bèrdat presioso ku nos siña tokante Yehova i su propósitonan mester pone nos stima nos Tata selestial mas ainda.
12 Klaru ku hopi hende ku ta pretendé di stima Dios no ta stim’é di bèrdat. Kisas nan ta sinsero den e sentido ku en bèrdat tin sintimentu fuerte ta lanta pa Dios den nan kurason. Ta bon i asta elogiabel ku nan tin tal sintimentunan, basta nan ta na armonia ku konosementu eksakto. Pero riba nan mes e sintimentunan ei no kier men ku e persona tin berdadero amor pa Dios. Dikon nò? Mira kiko e Skritura ta bisa ku amor pa Dios ta: “Esaki ta e amor di Dios, ku nos ta warda su mandamentunan.” (1 Huan 5:3) Pues, amor pa Yehova ta berdadero solamente ora e persona ta demostr’é ku aktonan di obedensia.
13. Kon temor di Dios lo yuda nos demostrá ku nos ta stima Yehova?
13 Temor di Dios lo yuda nos obedesé Yehova. E atmirashon i rèspèt profundo aki pa Yehova ta desaroyá dor ku nos ta siña konosé Dios i tambe su santidat, gloria, poder, hustisia, sabiduria i amor infinito. Temor di Dios ta esensial pa nos por hala serka dje. De echo, mira kiko Salmo 25:14 ta bisa: “E komunion íntimo di SEÑOR ta ku esnan ku ta tem’é.” P’esei, si nos tin un temor saludabel di desagradá nos Tata selestial stimá, nos por hala serka di dje. Temor di Dios lo yuda nos obedesé e konseho sabí skirbí na Proverbionan 3:6: “Den tur bo kamindanan rekonos’é, i e lo dirigí bo bereanan.” Kiko esei kier men?
14, 15. (a) Kua ta algun dje desishonnan ku nos ta enfrentá den nos bida di tur dia? (b) Kon nos por mustra ku nos ta teme Dios ora di tuma desishon?
14 Tur dia bo tin ku tuma desishon grandi i chikitu. Por ehèmpel, tokante kiko bo ta bai kòmbersá ku bo koleganan di trabou, kompañeronan di skol, i ku bo bisiñanan? (Lukas 6:45) Lo bo traha duru pa kumpli ku loke hende duna bo pa hasi, òf lo bo purba ‘lora’ hasiendo ménos esfuerso posibel? (Kolosensenan 3:23) Lo bo bira mas será ku hende ku no ta mustra muchu amor pa Yehova, òf ku no ta stim’é mes? Òf lo bo traha pa fortalesé bo relashon ku hende spiritual? (Proverbionan 13:20) Kiko lo bo hasi, asta den kos chikitu, na fabor di e Reino di Dios? (Mateo 6:33) Si bo ta laga prinsipionan bíbliko manera esnan sitá aki guia bo desishonnan di tur dia, e ora ei di bèrdat bo ta tuma Yehova na kuenta òf rekonos’é “den tur bo kamindanan.”
15 De echo, kada bes ku nos tuma un desishon nos lo mester laga e pensamentu aki guia nos: ‘Kiko Yehova lo kier pa mi hasi? Ki desishon lo agrad’é mas?’ (Proverbionan 27:11) Mustra temor di Dios n’e manera aki ta un ekselente forma pa demostrá ku nos ta stima Yehova. Ademas, temor di Dios lo motivá nos pa keda limpi den sentido spiritual, moral i físiko. Kòrda ku den e mesun versíkulo kaminda Santiago ta animá kristiannan pa “hala serka Dios” e ta konsehá nan esaki tambe: “Limpia boso mannan, boso pekadónan; i purifiká boso kurason, boso di kurason dòbel.”—Santiago 4:8.
16. Kiko nos no por logra nunka dor di duna Yehova, i sin embargo, kiko sí semper nos lo kier logra hasi?
16 Klaru ku ekspresá nos amor pa Yehova kier men hopi mas ku djis keda sin hasi malu. Amor ta motivá nos pa hasi bon tambe. Por ehèmpel, kon nos ta reakshoná na Yehova su inmenso generosidat? Santiago a skirbi: “Tur bon regalo i tur don perfekto ta for di ariba, i ta baha bin for di e Tata di lusnan.” (Santiago 1:17) Ta bèrdat ku ora nos duna Yehova nos kosnan material, nos no ta hasié mas riku. Tur rekurso i tur kos ta di dje kaba. (Salmo 50:12) I ora nos duna Yehova nos tempu i energia, nos no ta yudand’e ku algu ku lo e no por logra na un otro manera. Asta si nos nenga di prediká e bon nobo dje Reino di Dios, e por laga piedra mes sklama! Wèl, pakiko antó nos mester duna Yehova nos rekursonan, nos tempu i nos energia? Prinsipalmente pasobra asina nos ta demostrá ku nos ta stim’é ku tur nos kurason, alma, mente i forsa.—Marko 12:29, 30.
17. Kiko por motivá nos pa duna alegremente na Yehova?
17 Ora nos duna na Yehova, nos mester hasié di buena gana, “pasobra Dios ta stima esun ku ta duna ku alegria.” (2 Korintionan 9:7) E prinsipio registrá na Deuteronomio 16:17 por yuda nos duna ku alegria: “Tur hende mester duna manera e por, konforme e bendishon di SEÑOR bo Dios ku el a duna bo.” Ora nos mira kon generoso Yehova ta ku nos, nos ta sinti un deseo pa duna alegremente na dje. Ora nos hasi esei, su kurason ta alegrá, manera ora un yu stimá ta hasi su mayor kontentu ku un regalitu . Si nos ekspresá nos amor n’e manera aki, esei lo yuda nos hala serka Yehova.
Bira Mas Íntimo pa Medio di Orashon
18. Dikon ta bale la pena pa analisá kon pa mehorá nos orashonnan?
18 E ratunan ku nos ta hasi orashon den privá ta oportunidatnan hopi balioso; nan ta momentunan pa nos papia na un manera íntimo i konfidensial ku nos Tata selestial. (Filipensenan 4:6) Ya ku orashon ta un medio esensial pa nos hala serka Dios, ta bale la pena pa para pensa kon nos orashonnan ta. No ku nan mester ta obranan maestro bon organisá i yen di palabra grandi, pero nan mester ta ekspreshonnan sinsero ku ta sali di nos kurashon. Kon nos por mehorá nos orashonnan?
19, 20. Pakiko ta bon pa meditá promé ku nos hasi orashon, i kua ta algun tema apropiá pa meditá ariba?
19 Nos por purba meditá promé ku nos hasi orashon. Si nos meditá promé, nos por hasi nos orashonnan mas spesífiko i ku mas sentido, i asina evitá di ripití frasenan di kustumber ku ta bini na bo boka outomátikamente. (Proverbionan 15:28, 29) Por ta útil si nos pensa riba algun dje temanan ku Hesus a menshoná den su orashon modelo, i purba mira kon nan ta pas den nos sirkunstansia personal. (Mateo 6:9-13) Por ehèmpel, nos lo por puntra nos mes ki papel chikitu nos ta spera di hunga den kumplimentu di Yehova su boluntat aki riba tera. Nos lo por bisa Yehova ku nos kier ta mas útil posibel p’e, i pidié yuda nos kumpli ku e responsabilidatnan ku el a duna nos? Nos ta kargá ku preokupashon tokante nos nesesidatnan material? Pa ki pikánan nos tin mester di pordon, i ken nos mester siña pordoná mas tantu? Ki tentashonnan ta tormentá nos? Nos ta realisá ku kuantu urgensia nos tin mester di Yehova su protekshon kontra e tentashonnan aki?
20 Tambe nos lo por pensa riba hende ku nos konosé i ku tin mester di Yehova su yudansa pa un nesesidat spesial. (2 Korintionan 1:11) Sin embargo, loke nos no mester lubidá tampoko ta di duna gradisimentu. Si nos para ketu i pensa, nos mester por kai riba algun motibu pa gradisí Yehova i alab’é tur dia pa su bondat abundante. (Deuteronomio 8:10; Lukas 10:21) I duna gradisimentu tin asta un benefisio èkstra: e por yuda nos mira bida na un manera mas positivo i ku mas apresio.
21. Kua ehèmpelnan di Beibel nos por studia pa yuda nos sa kon pa aserká Yehova den orashon?
21 Studiamentu tambe por yuda nos mehorá nos orashonnan. Tin algun orashon ekselente di hòmber i muhé fiel skirbí den e Palabra di Dios. Por ehèmpel, si tin un problema difísil ta aserká i e ta pone nos sinti un poko ansiedat òf asta miedu pa nos mes i pa bienestar di esnan ku nos ta stima, nos lo por bolbe lesa e orashon di Yakòb tokante e enkuentro ku e tabata bai tin ku su ruman Esau, ku kier a tuma vengansa di dje. (Génesis 32:9-12) Òf nos lo por studia e orashon ku Rei Asa a hasi ora un ehérsito di mas o ménos un mion etiope tabata menasá e pueblo di Dios. (2 Krónikanan 14:11, 12) Si nos ta preokupá tokante un problema ku lo por trese reproche riba Yehova su bon nòmber, anto ta bale la pena pa nos konsiderá e orashon di Elías dilanti e adoradónan di Baal na Seru Karmelo, i tambe e orashon di Nehemías tokante e situashon deplorabel ku Yerúsalèm tabata aden. (1 Reinan 18:36, 37; Nehemías 1:4-11) Dor di lesa i meditá riba orashonnan asina nos por fortalesé nos fe, i nan por duna nos un idea kon nos por aserká Yehova mihó tokante preokupashonnan ku ta pisa riba nos.
22. Kiko ta e teksto di aña pa 2003, i kiko nos lo por puntra nos mes de bes en kuando segun ku e aña ta transkurí?
22 Klaramente, no ta eksistí onor mas grandi, ni meta mas noble, ku kumpli ku e konseho di Santiago pa “hala serka Dios.” (Santiago 4:8) Laga nos hasi esei dor di progresá den nos konosementu di Dios, buska manera pa demostrá nos amor na dje mas i mas, i desaroyá un relashon íntimo kuné den nos orashonnan. Durante aña 2003, segun ku nos ta tene Santiago 4:8 na mente komo nos teksto di aña, laga nos sigui eksaminá nos mes pa mira si di bèrdat nos ta halando serka Yehova. Pero, kiko nos por bisa dje di dos parti dje deklarashon? Den ki sentido Yehova lo ‘hala serka nos,’ i ki bendishonnan lo e trese? E siguiente artíkulo ta bai trata e tema aki.
Bo Ta Kòrda?
• Dikon hala serka Yehova ta un asuntu pa pensa seriamente ariba?
• Kua ta algun meta ku nos lo por pone relashoná ku siña konosé Yehova?
• Kon nos por demostrá ku nos ta stima Yehova di bèrdat?
• Kua ta algun manera ku nos por bira mas íntimo ku Yehova den orashon?
[Preguntanan di Estudio]
[Komentario na página 12]
E teksto di aña pa 2003 lo ta: “Hala serka Dios i e lo hala serka boso.” —Santiago 4:8.
[Plachi na página 8, 9]
Segun ku Samuel a madurá, el a siña konosé Yehova íntimamente
[Plachi na página 12]
E orashon ku Elías a hasi na Seru Karmelo ta un bon ehèmpel pa nos