“Fiel bou di Prueba”

NA PRINSIPIO di aprel 1951, e poderoso gobièrnu soviétiko a lansa un atake repentino kontra un grupo di kristian inosente den e parti wèst di Union Soviétiko: Testigunan di Yehova. Míles di famia—inkluso mucha chikitu, muhé na estado i hende di edat—a ser hinká den trein di karga pa nan kuminsá un biahe difísil i agotante di 20 dia largu ku a hiba nan Siberia. Nan a ser kondená na eksilio permanente den kondishonnan severo i primitivo.

Na aprel 2001, a konmemorá e di 50 aniversario di e suseso históriko aki na Moskú ku publikashon di un vidio ku ta presentá un dokumentario di e opreshon ku Testigunan di Yehova a sufri na eks-Union Soviétiko pa dékadanan largu. Den e dokumentario, historiadónan i personanan ku tabata testigu di e susesonan ta konta kon e Testigunan di Yehova a sobrebibí i a asta prosperá apesar di preshon ekstremo.

Entre tantu, miónes di hende na Rusia i otro kaminda a wak e dokumentario aki, Fiel bou di Prueba—Testigunan di Yehova na Union Soviétiko. Anto tantu públiko en general komo historiadónan tabatin masha palabra di elogio p’e. At’akí dos komentario di akadémikonan ruso ku ta biba den e área kaminda nan a manda mayoria famia Testigu di Yehova den eksilio:

“Mi a gusta e vidio aki masha hopi mes. Semper mi tabata gusta e representantenan di boso religion, pero despues di a wak e vidio, e bon impreshon ku mi tabatin di boso a bira asta mas fuerte. E vidio tabata hopi profeshonal! Mi a gusta foral e manera ku boso a presentá kada persona individualmente. Ounke mi ta òrtodòks i mi no tin intenshon di kambia mi religion, mi ta enkantá ku e Testigunan. Lo mi tin gana pa nos fakultat keda ku un ehemplar di e vidio aki. Ami ku mi koleganan a disidí di laga nos studiantenan wak e i inkluyé den e kuríkulo.”—Profèser Sergei Nikolayevich Rubtsov, kabes di e fakultat di historia na e Universidat Pedagógiko di Estado, Irkutsk, Rusia.

“Mi a keda kontentu ku e vidio aki. Semper ora hende ta traha un pelíkula tokante represhon, ta masha difísil pa nan desaroyá e historia den un manera lógiko. Pero boso a logra hasié. Por fabor sinti boso liber pa trese mas di boso vidionan pa mi.”—Profèser Sergei Ilyich Kuznetsov, kabes di e fakultat di historia na e Universidat di Estado di Irkutsk, Rusia.

Testigunan di Yehova ku ta biba na Siberia tambe a apresiá e dokumentario mashá. At’akí algun ehèmpel di nan reakshon:

“Durante e tempu ku e susesonan den e vidio aki tabata tumando lugá, hopi hende na Rusia tabata mal informá tokante e aktividat di Testigunan di Yehova. Pero ora nan wak e vidio aki, nan por komprondé ku nos organisashon  no ta djis un tipo di sekta, manera nan a pensa anteriormente. Otro personanan ku resientemente a bira Testigu di Yehova a bisa: ‘Nos no por a imaginá ku nos tabata biba i traha huntu ku rumannan kristian ku a wanta asina tantu kos!’ Despues ku un Testigu a wak e vidio, el a ekspresá su deseo pa bira pionero, un predikadó di tempu kompletu.”—Anna Vovchuk, ku nan a eksiliá na Siberia.

“Ora e vidio a pasa kon polis sekreto tabata bati na porta di kas di un Testigu, mi kurpa a kue rel. Tabata presis manera nan a bati na nos porta. I mi ta kòrda kon mi mama a bisa: ‘Ta kandela lo tin kualke kaminda.’ Pero tambe e vidio a rekordá mi ku hopi Testigu a sufri mas ku mi. Tur e informashon aki ta duna nos mas fortalesa i entusiasmo pa sigui sirbi Yehova.”—Stepan Vovchuk, ku nan a eksiliá na Siberia.

“Mi ta yu hòmber di Testigunan ku a ser eksiliá. P’esei mi a pensa ku mi a tende hopi kos kaba dje tempu ei. Pero despues ku mi a wak e vidio, mi a bin realisá ku práktikamente mi no tabata sa nada. Segun ku mi tabata skucha e entrevistanan, mi wowonan a yena ku awa. Awor e eksperensianan no ta djis historia pa mi, sino relatonan di bida real. E vidio a fortalesé mi relashon ku Dios i a yuda mi prepará pa soportá tur difikultat ku por bini den futuro.”—Vladimir Kovash, Irkutsk.

“Pa mi, e vidio aki tabata mas poderoso ku un relato skirbí. Ora mi a wak i tende e entrevistanan ku e rumannan, mi a sinti komo si fuera mi tambe a pasa dor di e eksperensianan ei huntu ku nan. E ehèmpel di e ruman hòmber ku a pinta pòstkart pa su yu muhénan chikitu miéntras e tabata den prizon ta motivá mi pa purba alkansá kurason di mi yunan ku e bèrdatnan di Beibel. Masha danki! E vidio aki a laga e Testigunan di Yehova na Rusia sinti mas ku nunka ku nan ta parti di e organisashon mundial di Yehova.”—Tatyana Kalina, Irkutsk.

“E dicho ‘mira un biaha ta mihó ku tende shen biaha,’ sigur ta apliká den kaso di e vidio aki. E ta asina bibu, asina real! I e tin asina hopi di haber ku nos! Despues ku mi a wak e, mi tabatin mester di hopi tempu pa mi pensa. E vidio a duna mi e oportunidat pa hinka mi mes den sapatu di e Testigunan ku a bai den eksilio. Awor ora mi kompará mi sirkunstansia ku esnan di nan, esaki ta yuda mi haña un otro punto di bista di nos problemanan aktual.”—Lidia Beda, Irkutsk.

Te ku awor, e vidio Fiel bou di Prueba a keda produsí na 25 idioma i rònt mundu e ta hañando bon akohida. * Kanalnan di televishon na St. Petersburg, Omsk i otro statnan na Rusia a transmití henter e dokumentario. Esaki a sosodé tambe den e statnan di Ukrania Vynnytsya, Kerch, Melitopol i den e region di Lviv. Tambe el a gana premio serka huradonan internashonal ku ta evaluá vidio.

E poder di e mensahe di e dokumentario aki ta sinta den e ehèmpelnan di míles di hende komun i koriente ku a desplegá un kurashi i fortalesa spiritual ekstraordinario atraves di añanan largu di persekushon. Testigunan di Yehova na Union Soviétiko realmente a duna evidensia di ta fiel bou di prueba. Si bo ke wak e dokumentario aki, Testigunan di Yehova gustosamente lo busk’é pa bo. Por fabor tuma kontakto ku un di nan kaminda bo ta biba.

[Nota]

[Rekonosementu pa Potrèt na página 8]

Stalin: U.S. Army photo

[Rekonosementu pa Potrèt na página 9]

Stalin: U.S. Army photo