“INOLVIDABEL!” Asina hopi hende a deskribí e “Drama di Kreashon.” El a yega nèt na ora i a hasi un gran impreshon riba hende ku a wak e. Sí, e “Drama di Kreashon” a duna gloria na Yehova i un gran testimonio djis promé ku Hitler a kuminsá su persekushon feros kontra Testigunan di Yehova na Europa. Pero kiko e “Drama di Kreashon” tabata?

Na 1914, e sede mundial di Testigunan di Yehova na Brooklyn, New York, Merka, a presentá un “Foto-Drama di Kreashon.” E tabata un produkshon di ocho ora largu ku a konsistí di slide i pelíkula. E tabatin zonido i tabata kompletamente na koló. Miónes di hende rònt mundu a wak e “Foto-Drama” akí. Na 1914 nan a presentá tambe un vershon mas kòrtiku di e drama akí titulá “Drama Eureka.” Pero den e añanan 1920, nan no por a sigui pasa e drama mas pasobra tantu e slidenan, e sinta di e pelíkulanan komo e ekipo di proyekshon a bira bieu. Pero tabatin hopi hende ku kier a wak e “Foto-Drama.” Por ehèmpel, algun hende ku tabata biba na Ludwigsburg, Alemania, a puntra: “Ki dia nos por wak e ‘Foto-Drama’ atrobe?” Kiko e rumannan por a hasi?

Pa komplasé e hendenan di e tempu ei, representantenan di e famia di Bètel na Magdeburg, Alemania, a kumpra algun pelíkula for di un agensia di notisia na Paris, Fransia, i slide for di algun kompania na Leipzig i Dresden. Nan a hinka esakinan den otro huntu ku algun slide bieu di e “Foto-Drama” ku ainda tabata usabel.

Ruman Erich Frost, un músiko talentoso, a komponé músika pa e pelíkula- i slidenan. I for di e buki di Kreashon nan a nara algun relato pa inkorporá den e drama. P’esei, e vershon revisá akí di e “Foto-Drama” a haña e nòmber nobo “Drama di Kreashon.”

E produkshon nobo akí tabatin un durashon di ocho ora, meskos ku e “Foto-Drama” original. Nan a parti e produkshon akí den sekshon i a pasa esakinan durante vários anochi tras di otro. E drama akí tabata kontené detayenan fasinante tokante kreashon, algun historia bíbliko, historia en general i a mustra kon religion falsu a gaña humanidat. Nan a presentá e “Drama di Kreashon” na Alemania, Austria, Luxemburg, Suisa, i na otro lugánan kaminda hende tabata papia aleman.

Erich Frost a bisa: “Na kada presentashon di e Drama, mi tabata animá mi koleganan, spesialmente e integrantenan di e  orkesta, pa den pousa nan pasa serka tur e hendenan den ouditorio i ofresé nos buki- i tratadonan. Di e manera akí, nos a laga mas literatura ku nos por a laga di kas pa kas.” Johannes Rauthe, kende a organisá e presentashonnan na Polonia i na e pais ku awe ta Repúblika Cheko, ta kòrda ku e hendenan den ouditorio tabata laga nan adrès pa bishitá nan despues. E adrèsnan ei a hiba na rebishitanan eksitoso.

Den e añanan di 1930, salanan yen tabata disfrutá di e “Drama di Kreashon,” i tur kaminda hende tabata papia di e Testigunan di Yehova. Pa aña 1933, kasi ún mion hende a asistí na e presentashonnan ku e sukursal na Alemania a organisá. Käthe Krauss ta kòrda: “Pa nos por a wak e Drama tur e sinku dianan ku nan a present’é, nos a kana 10 kilometer pa bai i bini; nos a pasa dor di mondi, subi i baha seru i pasa den vayenan.” Else Billharz a bisa: “Ta e ‘Drama di Kreashon’ a lanta mi amor pa e bèrdat.”

Alfred Almendinger a konta ku despues ku su mama a wak e Drama, el a keda asina emoshoná ku el a kumpra un Beibel pa wak si e palabra ‘purgatorio’ ta den Beibel. Ora ku e no a hañ’é, el a stòp di bai misa i a batisá komo Testigu di Yehova. Erich Frost a bisa: “Hopi hende a drenta e bèrdat pa motibu di e ‘Drama di Kreashon.’”—3 Huan 1-3.

Turesten ku e “Drama di Kreashon” tabata haña hopi akohida, nazismo tambe tabata haña mas i mas apoyo i tabata kousa hopi disturbio. E aktividatnan di e Testigunan na Alemania a ser prohibí na kuminsamentu di aña 1933. Di e tempu ei padilanti, te na fin di e Segundo Guera Mundial na aña 1945, Testigunan di Yehova na Europa a ser persiguí severamente. Erich Frost a pasa ocho aña será, pero el a sobrebibí. Despues, el a sirbi na Bètel na Wiesbaden, Alemania. No tin duda, e “Drama di Kreashon” tabata inolvidabel i a yega nèt na ora pa enkurashá e rumannan ku tabata a punto di konfrontá pruebanan severo durante e Segundo Guera Mundial.—For di nos archivo na Alemania.