1, 2. (a) Kiko a yuda bo tuma e desishon pa sirbi Dios? (b) Ki pregunta tokante nos herensia spiritual e artíkulo akí lo kontestá?

MIÓNES di hende a tuma e desishon sabí pa sirbi Yehova Dios i imitá e ehèmpel di Hesukristu. (Mat. 16:24; 1 Ped. 2:21) I dedikashon na Dios ta un asuntu masha serio. Nos desishon pa dediká nos mes na Yehova no ta basá riba konosementu superfisial di un par di teksto bíbliko; mas bien, nos a tuma e desishon akí despues di a hasi un estudio profundo di e Palabra di Dios. Durante e estudio di Beibel akí, nos a siña hopi kos tokante e herensia ku Yehova a primintí tur hende ku ‘siña konos’é i esun ku el a manda, ku ta Hesukristu.’ I tur eseinan a fortalesé nos fe.—Huan 17:3; Rom. 12:2.

² Pero pa nos por keda ku un bon relashon ku Yehova, nos mester sigui tuma desishonnan ku ta agrad’é. P’esei, e artíkulo akí lo kontestá algun pregunta masha importante. Nan ta: Kiko ta nos herensia? Ki balor nos mester dun’é? Kon nos por hasi sigur ku nos ta risibí nos herensia? I kiko lo yuda nos tuma desishonnan sabí?

3. (a) Ki herensia e ungínan lo risibí? (b) Ki herensia e ‘otro karnénan’ lo risibí?

³ Un grupo di kristian relativamente chikitu tin e speransa di risibí bida inmortal den shelu komo nan herensia. Nan lo tin e privilegio spesial di por reina huntu ku Kristu den shelu. (1 Ped. 1:3, 4) Pa risibí e herensia ei, e personanan akí mester “nase di nobo.” (Huan 3:1-3) Awor, kiko ta e herensia di Hesus su miónes  di ‘otro karnénan,’ kendenan ta traha huntu ku e rumannan ungí den e trabou di prediká e bon notisia di e Reino di Dios? (Huan 10:16) Wèl, e otro karnénan lo risibí e herensia ku Adam ku Eva nunka a risibí, esta, bida eterno den Paradeis aki riba tera, kaminda lo no tin sufrimentu, morto ni tristesa mas. (Rev. 21:1-4) Esei ta loke Hesus a primintí e malechor ku tabata kologá banda di dje. El a bis’é: “Di bèrdat mi ta bisa bo awe: Lo bo ta ku mi den Paradeis.”—Luk. 23:43.

4. Ki bendishonnan nos ta disfrutá di dje for di aworakí?

⁴ For di aworakí kaba, nos ta disfrutá di sierto aspekto di nos herensia spiritual. Por ehèmpel, debí ku nos ta pone fe den “e reskate ku Kristu Hesus a paga,” nos ta disfrutá di pas mental i di un bon relashon ku Dios. (Rom. 3:23-25) Ademas, nos tin bon komprondementu di loke Beibel ta primintí pa futuro. Es mas, e echo ku nos ta forma parti di un hermandat internashonal ku ta stima otro ta hasi nos masha felis. Nos tin tambe e gran onor di por papia ku otro hende tokante Yehova. Pues, nos tin bon motibu pa balorá nos herensia.

5. Kiko Satanas semper ta purba di hasi ku e pueblo di Dios, i kon nos por evitá di kai den su trampanan?

⁵ Pero, pa nos por disfrutá di nos maravioso herensia, nos mester keda alerta pa nos no kai den e trampanan di Satanas. Semper el a purba di influensiá e pueblo di Dios pa nan tuma mal desishon i asina pèrdè nan herensia. (Num. 25:1-3, 9) I debí ku e sa ku su fin ta serka, e ta traha mas duru ainda pa desviá nos for di e bèrdat. (Lesa Revelashon 12:12, 17.) Si nos ke sigui “para firme kontra e trampanan di Diabel,” nos mester sigui balorá nos herensia spiritual. (Efe. 6:11) P’esei, laga nos wak ki lès importante nos por siña for di e manera ku Esou, e yu hòmber di e patriarka Isak, a trata ku su herensia.

6, 7. Ken Esou tabata, i ki herensia e por a risibí?

⁶ Un 4.000 aña pasá, Rebeka, kasá di Isak, a duna lus na dos yu hòmber, Esou i Yakòb, kendenan tabata oochi. E rumannan akí tabata masha distinto for di otro. Por ehèmpel, “Esou a bira un bon yagdó, un hòmber di kunuku,” miéntras ku “Yakòb tabata un hòmber trankil [“sin kulpa,” NW] ku tabata biba den tènt.” (Gén. 25:27) Segun Robert Alter, un traduktor di Beibel, e palabra hebreo tradusí aki komo “sin kulpa” ta referí “na un hende íntegro,” ku no ta praktiká piká.

⁷ Ora Esou i Yakòb tabatin 15 aña di edat, nan tawela Abraham a muri, pero Yehova no a lubidá e promesa ku el a hasi na Abraham. Kon nos por sa esei? Wèl, Yehova a ripití e mesun promesa ei na Isak, esta, ku tur nashon riba tera lo bendishoná nan mes pa medio di e desendiente, òf simia, di Abraham. (Lesa Echonan 3:25; wak nota.) Di e manera akí, Yehova a revelá ku ún di Abraham su desendientenan lo ta e Mesías, e “simia” fiel ku Génesis 3:15 ta papia di dje. I komo ku Esou tabata yu hòmber mayó di Isak, é tabatin e derecho legal di risibí e promesa ei. Pues, e Mesías lo mester a bini di su liña di desendensia. Ki un herensia maravioso esaki lo tabata! Pero, Esou a apresi’é?

8, 9. (a) Ki desishon Esou a tuma relashoná ku su herensia? (b) Kiko Esou a realisá añanan despues, i kon el a reakshoná?

⁸ Un dia ku Esou a sali for di kunuku, el a mira Yakòb ta “kushiná stobá.” El a bisa Yakòb: “Pa fabor, duna mi di e stobá kòrá ei pa mi kome, pasobra mi ta morto di hamber.” Yakòb a bis’é: “Bende mi bo derecho di primogenitura promé.” Kon Esou a  reakshoná? El a bisa Yakòb: “Di kiko anto e derecho di primogenitura ta sirbi mi?” Inkreibel! Esou a preferá un tayó di stobá en bes di su derecho komo yu primogénito! Awor, pa hasi sigur ku Esou ta bend’é su derecho di yu mayó, Yakòb a bisa Esou: “Hura mi promé!” Mesora Esou a pasa su derecho di yu mayó pa Yakòb. Despues di esei, “Yakòb a duna Esou pan i stobá di lenteha, i el a kome i bebe i a lanta bai. Asina Esou a despresiá su derecho di primogenitura.”—Gén. 25:29-34.

⁹ Añanan despues, ora ku Isak a sinti ku e tabata serka di muri, Rebeka a hasi loke tabata nesesario pa Yakòb por a risibí e derecho di yu mayó ku Esou a despresiá. Ora tabata lat kaba, Esou a realisá ku el a tuma un mal desishon, i el a roga su tata Isak: “Bendishoná mi, ami tambe, o mi tata . . . Bo no a warda un bendishon pa mi?” Ora Isak a bis’é ku e no por a kambia e bendishon ku el a duna Yakòb, Esou “a yora” amargamente.—Gén. 27:30-38.

10. Ki sintimentu Yehova tabatin pa Esou i Yakòb, i dikon?

¹⁰ Ki aktitut Esou a manifestá segun e relato akí? Wèl, el a demostrá ku su deseonan di karni tabata mas importante ku e bendishonnan ku su herensia lo a trese den futuro. Esou no a balorá su derecho di yu mayó i opviamente e no tabata stima Dios di bèrdat. Ademas, Esou no a tene kuenta ku su desishon lo a afektá su desendientenan. Yakòb sí a balorá su herensia. Por ehèmpel, aunke esaki no tabata fásil p’e, el a sigui instrukshon di su mayornan ora di skohe un esposa. (Gén. 27:46–28:3) I Yehova a bendishon’é pa su obedensia: El a bira antepasado di e Mesías. Ki sintimentu Dios tabatin pa Esou i Yakòb? Mediante profeta Malakías, Yehova a bisa: “Mi a stima Yakòb; ma Esou mi a odia.”—Mal. 1:2, 3.

11. (a) Dikon e relato di Esou ta importante pa kristiannan awe? (b) Dikon Pablo a relashoná fornikashon ku loke Esou a hasi?

¹¹ Awor, e relato di Esou ta importante pa nos awe? Sigur ku sí. Apòstel Pablo a spièrta su kompañeronan kristian pa tene kuidou pa no ‘tin den nan ningun hende ku ta kometé fornikashon ni ningun ku no ta apresiá kosnan sagrado, manera Esou, kende a entregá su derecho di yu mayó a kambio di ún kuminda.’ (Heb. 12:16) E spièrtamentu akí ta konta awe tambe pa tur kristian. Nos mester sigui balorá kosnan sagrado pa nos no permití deseonan di karni pone nos kai den tentashon i pèrdè nos herensia spiritual. Pero, dikon Pablo a relashoná fornikashon ku loke Esou a hasi? Pasobra si un hende laga deseo di karni domin’é meskos ku Esou a hasi, muy probablemente lo e despresiá kosnan sagrado  pa sigui tras di plasernan ilísito, manera fornikashon.

12. (a) Kon Satanas ta purba di hinka nos den tentashon? (b) Duna algun ehèmpel bíbliko ku por yuda nos ora nos haña nos den tentashon pa hasi malu.

¹² Komo sirbidó di Yehova, nos ta hasi tur loke nos por pa evitá situashonnan ku por pone nos kai den tentashon pa kometé inmoralidat seksual. I si un hende purba di hinka nos den tentashon pa desobedesé Dios, nos ta pidi Yehova yuda nos para firme. (Mat. 6:13) Nos sa ku konstantemente Satanas ta purba di pone nos hasi kosnan ku por daña nos relashon ku Yehova, p’esei nos ta hasi nos bèst pa mantené nos integridat den e mundu malbado akí. (Efe. 6:12) Komo ku Diabel ta e dios di e mundu malbado akí, e sa ki tentashonnan e tin ku usa pa pone hende bai tras di nan deseonan pekaminoso i kai den su trampanan. (1 Kor. 10:8, 13) Suponé ku bo haña bo den un situashon kaminda bo tin chèns di satisfasé un sierto deseo na un manera inmoral. Kiko lo bo hasi? Lo bo hasi manera Esou, kende a sukumbí mesora na tentashon? Òf lo bo resistí e tentashon i hui manera Yosef, yu di Yakòb, a hasi ora e kasá di Potifar a purba di sedusié?—Lesa Génesis 39:10-12.

13. (a) Den ki sentido, hopi di nos rumannan a aktua manera Yosef, i otronan manera Esou? (b) E echo ku algun ruman ta aktua manera Esou ta hasi nos konsiente di ki nesesidat importante?

¹³ Hopi ruman a yega di haña nan den situashon den kua nan tabatin ku skohe pa ser sea manera Esou òf manera Yosef. Mayoria di nan a aktua na un manera sabí i a hasi Yehova su kurason kontentu. (Pro. 27:11) Pero algun di nos rumannan a aktua manera Esou, poniendo asina nan herensia spiritual na peliger. De echo, tur aña tin hopi kaso hudisial i ekspulshon pa motibu di inmoralidat seksual. P’esei ta masha importante pa nos prepará nos kurason for di awor pa por resistí kualke tentashon ku nos por haña nos kuné den futuro. (Sal. 78:8) Tin por lo ménos dos kos ku nos por hasi pa prepará nos mes pa resistí tentashon i tuma bon desishon.

14. Meditashon riba ki preguntanan por yuda nos “odia loke ta malu” i “pega na loke ta bon”?

¹⁴ E promé kos ku nos por hasi ta pensa riba ki konsekuensia nos aktonan por tin. Nos apresio pa nos herensia spiritual ta dependé di nos amor pa Yehova, e Dunador di e herensia. Ora nos ta stima un persona, nos no ke hasié doló, no ta bèrdat? Mas bien, nos ta hasi tur nos esfuerso pa e ta kontentu. P’esei, ta bon pa nos tuma tempu pa pensa kiko por ta e posibel konsekuensianan pa nos i pa otronan si nos sukumbí na deseonan inmoral. Nos por puntra nos mes: ‘Mi desishon egoista lo afektá mi relashon ku Yehova? Kon e akto robes akí lo afektá mi famia? I kon lo e afektá mi rumannan den kongregashon? Mi por pone otronan trompeká?’ (Flp. 1:10) Ademas, nos por puntra nos mes: ‘Un ratu di plaser inmoral ta bal e preis ku lo mi tin ku paga despues? Mi ke ta manera Esou, kende a yora amargamente despues ku el a realisá kiko el a hasi?’ (Heb. 12:17) Si nos ta reflekshoná riba preguntanan asina, esaki lo yuda nos “odia loke ta malu” i “pega na loke ta bon.” (Rom. 12:9) Anto si nos ta stima Yehova di bèrdat, nos lo traha duru pa protehá nos herensia spiritual.—Sal. 73:28.

15. Kon nos por prepará nos mes pa resistí kualke tentashon i a la bes protehá nos relashon ku Dios?

¹⁵ E di dos kos ku nos por hasi ta prepará nos mes pa resistí tentashon. Yehova a perkurá pa tur loke nos mester pa prepará  nos mes pa resistí tentashon i protehá nos relashon kuné. Su provishonnan ta, entre otro, estudio di Beibel, reunionnan kristian, sirbishi di vèlt i orashon. (1 Kor. 15:58) Kada bes ku nos hasi orashon i deshogá nos mes serka Yehova i kada bes ku nos partisipá plenamente den sirbishi kristian, nos ta preparando nos mes pa resistí tentashon. (Lesa 1 Timoteo 6:12, 19.) Pues, pa nos por resistí tentashon, nos tin ku sigui hasi bon uso di e provishonnan akí. (Gal. 6:7) Proverbionan kapítulo 2 ta enfatisá esaki bon kla.

16, 17. Kon nos por atkerí e abilidat di tuma bon desishon?

¹⁶ Proverbionan kapítulo 2 ta animá nos pa atkerí sabiduria i komprondementu. Esakinan ta regalonan for di Dios ku ta yuda nos diserní bon for di malu i disiplina propio for di satisfakshon propio. Pero ta solamente si nos ta dispuesto pa hasi esfuerso, nos lo tin éksito. Beibel ta konfirmá e bèrdat fundamental akí, bisando: “Mi yu, si bo kier risibí mi palabranan i warda mi mandamentunan den bo, hasi bo orea atento na sabiduria, i inkliná bo kurason na komprondementu; pasobra si bo sklama pa disernimentu, halsa bo bos pa komprondementu, si bo busk’é manera plata, i rondi’é manera tesoro skondí, e ora ei lo bo diserní e temor di SEÑOR, i deskubrí e konosementu di Dios. Pasobra SEÑOR ta duna sabiduria; for di su boka ta sali konosementu i komprondementu.”—Pro. 2:1-6.

¹⁷ No tin duda, si nos ke tin e kapasidat di tuma bon desishon, nos mester kumpli ku loke Proverbionan kapítulo 2 ta bisa. Pues, nos por resistí tentashon si nos ta laga Yehova su palabranan moldia nos, si nos ta sigui hasi orashon i pidi Dios su guia i si nos ta sigui buska e konosementu di Dios manera nos lo buska tesoronan skondí.

18. Kiko bo ta determiná pa sigui hasi, i dikon?

¹⁸ Yehova ta duna konosementu, komprondementu, disernimentu i sabiduria na esnan ku ta hasi esfuerso pa atkerí e regalonan akí. Mas nos buska i usa nan, mas nos lo hala serka Yehova. I e relashon íntimo ku nos lo tin ku Yehova Dios e ora ei lo protehá nos i yuda nos resistí tentashon ora esakinan presentá. Si nos ta mantené un bon relashon ku Yehova i tin un temor saludabel p’e, nos lo evitá di hasi loke ta malu. (Sal. 25:14; Sant. 4:8) Sí, nos amistat ku Yehova i e sabiduria ku e ta duna nos ta yuda nos tuma desishonnan sabí ku lo hasi su kurason kontentu i yuda nos protehá nos herensia spiritual.