1, 2. Kiko Hesus a hasi e anochi di 14 di nisan di aña 33? (Wak e promé plachi.)

TABATA e anochi di 14 di nisan di aña 33, i luna yen tabata bria riba Herúsalèm. Hesus ku su apòstelnan a kaba di selebrá e Pasku Hudiu ku ta konmemorá kon Yehova a libra Israel for di Egipto un 1.500 aña promé. I awor Hesus a establesé un sena spesial ku su 11 apòstelnan fiel. Mediante e sena akí su disipelnan lo a sigui konmemorá su morto ku lo a tuma lugá promé ku e dia akí a kaba. *—Mat. 26:1, 2.

² Hesus a hasi un orashon, kaba el a pasa e pan sin zürdeg pa e apòstelnan i a bisa nan: “Tuma, kome.” Despues, el a kue un kopa di biña, bolbe gradisí Dios i bisa nan: “Boso tur bebe for di dje.” (Mat. 26:26, 27) Hesus no a duna nan nada mas di kome ni di bebe despues di esaki, pero sí el a papia hopi kos importante ku nan durante e anochi históriko ei.

3. Ki preguntanan e artíkulo akí lo kontestá?

³ Asina Hesus a establesé e konmemorashon anual di su  morto ku Beibel ta yama tambe “e Sena di Señor,” òf Memorial. (1 Kor. 11:20) Algun pregunta ku ta surgi relashoná ku esei ta: Pakiko nos tin ku konmemorá e morto di Hesus? Kiko e pan ku e biña ta representá? Kon nos por prepará nos mes pa e Konmemorashon di Hesus su morto, òf Memorial? Ken mester kome e pan i bebe di e biña? I kon kristiannan ta mira nan speransa?

4. Kiko Hesus a logra ku su morto?

⁴ Komo desendiente di Adam, nos a heredá piká i morto. (Rom. 5:12) No tin niun hende imperfekto ku por duna Dios un reskate pa libra su mes òf pa libra otro hende. (Sal. 49:6-9) Sinembargo, ora Hesus a muri, el a paga e úniko preis di reskate ku Dios por a aseptá: su kurpa perfekto i su sanger. El a entregá su bida pa nos i a presentá e balor di e reskate ei na Dios. Kiko el a logra ku esei? Ku nos por ser librá for di piká i morto i haña e regalo di bida eterno.—Rom. 6:23; 1 Kor. 15:21, 22.

5. (a) Kiko ta mustra ku Dios i Kristu ta stima nos? (b) Pakiko nos mester ta presente na e konmemorashon di e morto di Hesus?

⁵ Dios a demostrá su amor pa hende ora el a entregá su Yu komo e reskate. (Huan 3:16) Hesus tambe a demostrá ku e stima nos ora el a entregá su bida komo un sakrifisio pa nos. For di promé ku Hesus a bini na tera—tempu ku e tabata sirbi komo Dios su “trahadó eksperto”—su “delisia tabata den e yunan di hende.” (Pro. 8:30, 31) Nos ta masha gradisidu pa loke Yehova i su Yu a hasi pa nos! Esei ta motivá nos pa ta presente na e konmemorashon di e morto di Hesus i asina obedesé su mandamentu pa ‘sigui hasi esaki na mi memoria.’—1 Kor. 11:23-25.

6. Kon nos mester mira e pan ku e biña di Memorial?

⁶ Ora Hesus a establesé e Memorial, e no a hasi un milager i kambia e pan ku e biña den su karni i su sanger literal. El a bisa di e pan: “Esaki ta representá mi kurpa.” I el a bisa di e kopa di biña: “Esaki ta representá mi ‘sanger di e pakto,’ ku lo mi drama pa hopi hende.” (Mar. 14:22-24) Ta bisto anto ku nos mester mira e pan ku e biña simplemente komo símbolo, òf emblema.

7. Kiko e pan sin zürdeg ta representá?

⁷ E anochi sumamente importante ei di aña 33, Hesus a usa e pan sin zürdeg ku a sobra di e sena di Pasku Hudiu. (Éks. 12:8) Tin biaha Beibel ta usa zürdeg pa representá piká. (Mat. 16:6, 11, 12; Luk. 12:1) Pues, Hesus a usa pan sin zürdeg pasobra esei tabata un bon representashon di su kurpa sin piká. (Heb. 7:26) Ta p’esei nos tambe ta usa pan sin zürdeg na Memorial.

8. Kiko e biña ta representá?

⁸ E biña ku Hesus a usa dia 14 di nisan di aña 33 a representá su sanger, òf bida, i meskos ta konta pa e biña ku nos ta usa awe na Memorial. El a muri na Gólgota, un lugá pafó di Herúsalèm, i a drama su sanger pa “pordon di piká di hopi hende.” (Mat. 26:28; 27:33) Pues, e pan ku e biña ta simbolisá e sakrifisio sin igual ku Hesus a ofresé na fabor di humanidat obediente. Si realmente nos ta apresiá e regalo presioso ei, nos lo prepará nos mes pa e konmemorashon anual di e Sena di Señor.

9. (a) Pakiko ta importante pa nos sigui e programa di lesamentu di Beibel di Memorial? (b) Kiko e reskate ta nifiká pa bo?

⁹ Kon nos por prepará nos mes pa Memorial? Un manera ku nos por prepará nos  kurason ta di sigui e programa di lesamentu di Beibel ku tin den e foyeto di teksto di dia Analisá e Skritura Tur Dia. Segun ku nos ta lesa e pasashinan di Beibel, nos por meditá riba loke Hesus a hasi djis promé ku su morto. * Un ruman muhé a skirbi: “Nos ta spera ansiosamente pa Memorial yega. Kada aña ku pasa, e ta bira mas spesial. Mi ta kòrda ku mi a kuminsá sinti un apresio profundo pa e reskate . . . na momento ku mi tabata pará den e kas funerario ta mira mi kerido tata defuntu. . . . Ta bèrdat ku mi tabata sa tur e tekstonan relashoná ku e tema ei i mi por a splika nan bon bon! Pero, ta ora m’a sinti e doló di morto di mi tata, m’a bin komprondé realmente kiko e reskate presioso lo logra pa nos, i mi kurason a kasi dal un salto di alegria.” P’esei, ora nos ta prepará pa e Konmemorashon, ta bon pa nos reflekshoná riba e manera ku e sakrifisio di Hesus lo libra nos for di e kastigu di piká i morto.

10. Kiko mas nos por hasi pa prepará nos mes pa Memorial?

¹⁰ Un otro manera ku nos por prepará nos mes pa Memorial ta di oumentá nos aktividat di sirbishi, kisas trahando komo pionero ousiliar durante e temporada di Memorial. Nos por purba di invitá mas tantu hende posibel pa bini na e Sena di Señor. Nos lo sinti un goso ora nos ta papia tokante Yehova, tokante su Yu i tokante e bendishonnan ku tin den tapara pa hende ku ta agradá Yehova i alab’é.—Sal. 148:12, 13.

11. Kon algun ruman di Korinto a tuma di e símbolonan di Memorial na un manera indigno?

¹¹ Segun ku nos ta prepará nos mes pa e Sena di Señor, ta bon pa meditá riba loke apòstel Pablo a skirbi e kongregashon kristian na Korinto. (Lesa 1 Korintionan 11:27-34.) Pablo a bisa ku si un hende kome e pan òf bebe di e biña na un manera indigno, e ta “kulpabel pa loke ta e kurpa i e sanger di Señor.” Pues, promé ku un persona ungí tuma di e símbolonan, e mester “saminá su mes kuidadosamente” i hasi sigur ku Dios ta aprobá su komportashon. Pasobra si no ta asina, i tòg e tuma di e símbolonan, e ora ei e “ta kome i bebe kondenashon kontra su mes.” Debí na komportashon  inapropiá, hopi di e kristiannan di Korinto tabata “débil i malu, i basta a bai sosegá [den morto spiritual].” Kisas algun di nan a kome i bebe asina tantu promé òf durante e Konmemorashon ku nan no tabata alerta, ni den sentido spiritual ni mental. Nan a mustra gran falta di rèspèt pa e okashon, i p’esei nan no tabatin e aprobashon di Dios ora nan a tuma di e símbolonan.

12. (a) Ku kiko Pablo a kompará e Memorial, i ki spièrtamentu el a duna e rumannan ku ta tuma di e símbolonan? (b) Si un ruman ku ta tuma di e símbolonan a kometé un piká serio, kiko e mester hasi?

¹² Pablo a kompará e Memorial ku un komementu ku vários invitado, i el a spièrta esnan ku tabata kome: “Boso no por ta bebe di e kopa di Yehova i di e kopa di demoño; boso no por ta kome na ‘e mesa di Yehova’ i na e mesa di demoño.” (1 Kor. 10:16-21) Si un ruman ku ta tuma di e símbolonan na e Sena di Señor a kometé un piká serio, e mester bai serka e ansianonan pa haña yudansa spiritual. (Lesa Santiago 5:14-16.) Den kaso ku e persona ungí ei a ‘produsí fruta ku ta mustra ku el a arepentí,’ e ora ei lo e no ta demostrando un falta di rèspèt pa e sakrifisio di Hesus si e tuma di e pan ku e biña.—Luk. 3:8.

13. Pakiko ta bon pa nos hasi orashon tokante e speransa ku Dios a duna nos?

¹³ Lo ta bon tambe pa ora nos ta prepará nos mes pa e Konmemorashon, nos meditá huntu ku orashon pa hasi sigur di e speransa ku Dios a duna nos. Niun sirbidó dediká di Yehova i fiel siguidó di su Yu lo no ke tuma di e símbolonan di Memorial sin ku e tin prueba konvinsente ku e ta un kristian ungí. Esei lo ta un falta di rèspèt pa e sakrifisio di Hesus. Pero, kon un persona por determiná si e tin ku tuma di e símbolonan òf nò?

14. Ken tin mag di tuma di e símbolonan di Memorial?

¹⁴ E rumannan ku ta tuma di e pan ku e biña ta kompletamente konvensí ku nan ta forma parti di e pakto nobo. Hesus a bisa di e biña: “E kopa akí ta representá e pakto nobo a base di mi sanger.” (1 Kor. 11:25) Via profeta Yeremías, Dios a bisa ku lo e sera un pakto nobo ku tabata diferente for di e pakto di Lei ku el a sera ku e israelitanan. (Lesa Yeremías 31:31-34.) Dios a sera e pakto, òf aliansa, nobo akí ku e ungínan, e Israel spiritual. (Gal. 6:15, 16) E sakrifisio di Hesus a hasi e pakto akí bálido mediante e sanger ku el a drama. (Luk. 22:20) Hesus ta e Mediador di e pakto nobo, i e ungínan leal ku ta den e pakto nobo lo risibí un herensia selestial.—Heb. 8:6; 9:15.

15. Ken ta den e pakto di Reino, i si nan keda fiel, ki privilegio nan lo tin?

¹⁵ E ungínan sa ku nan tambe ta forma parti di e pakto di Reino. (Lesa Lukas 12:32.) Hesus a sera e pakto akí ku su siguidónan fiel ku a keda huntu kuné i ku tambe a “sufri meskos kuné.” (Flp. 3:10) I debí na e pakto di Reino akí, tur ungí fiel lo reina huntu ku Kristu pa semper den shelu. (Rev. 22:5) P’esei ta na su lugá ku e kristiannan akí ta tuma di e pan ku e biña durante e Sena di Señor.

16. Duna un splikashon kòrtiku kiko Romanonan 8:15-17 ta nifiká.

¹⁶ Solamente e personanan ku tin e testimonio di spiritu santu ku nan ta yu di Dios tin mag di tuma di e símbolonan di Memorial. (Lesa Romanonan 8:15-17.) Tuma nota ku Pablo a usa e palabra arameo “Aba,” ku ta un nòmber di kariño ku un mucha lo a usa pa su tata i ta reflehá tantu e kariño di e palabra “papi” komo e rèspèt di e palabra “tata.” Pues, “Aba” ta ekspresá e relashon  spesial ku e ungínan tin ku Yehova despues ku nan a risibí “un spiritu di yu adoptá.” Yehova su spiritu “ta duna testimonio huntu ku [nan] spiritu,” di manera ku nan sa fuera di tur duda ku nan ta su yunan ungí. Esaki no ke men ku nan ta djis pèrdè smak di biba riba tera. Mas bien, nan tin sigur ku si nan keda fiel te na morto, nan lo ta rei den shelu huntu ku Hesus. Awe, ta un restu so tin di e 144.000 siguidónan di Kristu ku “a ser skohé pa Esun Santu,” Yehova. (1 Huan 2:20; Rev. 14:1) Ta e spiritu di Yehova ta pone nan bisa: “Aba, Tata!” Esta un relashon presioso nan tin ku Dios!

17. Ki speransa e ungínan tin, i kon nan sa ku nan ta ungí?

¹⁷ Si bo ta un kristian ungí, e speransa selestial lo ta un di e kosnan ku bo ta menshoná frekuentemente den bo orashonnan personal. I e Skritura lo tin un nifikashon spesial pa bo. Por ehèmpel, ora Beibel ta papia di e matrimonio den shelu entre Hesukristu i su “brùit,” bo sa ku esei ta apliká na bo i bo ta anhelá pa e momento yega. (2 Kor. 11:2; Huan 3:27-29; Rev. 21:2, 9-14) Ora Yehova ta ekspresá su amor pa su yunan spiritual den su Palabra, bo sa ku ta ku bo e ta papia. I ora Beibel ta duna instrukshon na Dios su yunan ungí, spiritu santu ta motivá bo pa obedesé e instrukshonnan ei i bisa den bo kurason: “Esaki ta apliká na mi.” Asina e spiritu santu di Dios ta “duna testimonio” na bo spiritu ku bo tin e speransa di bai shelu.

18. Ki speransa e ‘otro karnénan’ tin, i kiko bo ta pensa di esei?

¹⁸ Di otro banda, si bo ta forma parti di e “multitut grandi” di “otro karné,” Dios a duna bo e speransa di biba riba tera. (Rev. 7:9; Huan 10:16) Bo ta deseá di biba pa semper den Paradeis, i bo ta gusta meditá riba loke Beibel ta bisa tokante kon bida lo ta den futuro riba tera. Bo ta spera ansiosamente di disfrutá di pas huntu ku bo famia i otro hendenan hustu. Bo ta anhelá pa e dia yega ku lo no tin hamber, pobresa, sufrimentu, malesa ni morto mas. (Sal. 37:10, 11, 29; 67:6; 72:7, 16; Isa. 33:24) Bo ta ansioso pa yama bonbiní na bo sernan kerí ku lo resusitá i ku tambe lo tin e speransa di biba pa semper riba tera. (Huan 5:28, 29) Esta gradisidu bo ta ku Yehova a duna nos e speransa maravioso akí! Aunke bo no ta tuma di e pan ku e biña, bo ta asistí na Memorial pa mustr’é ku bo ta masha gradisidu pa e sakrifisio di reskate di Hesukristu.

19, 20. (a) Kiko bo tin ku hasi pa bo speransa bira realidat? (b) Dikon lo bo no ke pèrdè e Konmemorashon?

¹⁹ Sea ku bo speransa ta pa biba riba tera òf den shelu, e por bira realidat solamente si bo demostrá fe den Yehova Dios, den Hesukristu i den e reskate. Na e Konmemorashon, lo bo tin oportunidat pa meditá riba bo speransa i riba e gran importansia di e morto di Hesus. Pues, pone komo meta pa bo ta un di e miónes di hendenan rònt mundu ku lo asistí na e Sena di Señor na un Salòn di Reino òf na un otro lugá, riba djabièrnè 3 di aprel 2015, despues ku solo baha.

²⁰ Ora nos prepará nos mes pa asistí na e Konmemorashon ku e aktitut korekto, nos lo ta mas gradisidu ainda pa e sakrifisio di reskate di Hesus. Si nos skucha e diskurso di Memorial ku atenshon, nos lo ser motivá pa mustra amor na nos próhimo i konta nan kuantu Yehova ta stima nos i kiko ta su propósito pa nos. (Mat. 22:34-40) Pues, no pèrdè e Sena di Señor!