Hesus Ta e Dios Todopoderoso?
Hesus Ta e Dios Todopoderoso?
Kontestanan komun:
▪ “Sí, Hesus mes ta Dios.”
▪ “Hesus ta Dios den karni.”
Kiko Hesus a bisa?
▪ “Si boso tabata stima mi, boso lo a regosihá, pasobra mi ta bai serka e Tata; pasobra e Tata ta mas ku mi.” (Juan 14:28) Hesus a rekonosé ku e i e Tata no ta igual.
▪ “Mi ta subi bai serka mi Tata i boso Tata, serka mi Dios i boso Dios.” (Juan 20:17) Hesus no a bisa ku e ta Dios sino a referí na Dios komo un otro Persona.
▪ “No ta ku mi mes outoridat mi a papia, ma e Tata ku a manda mi a duna mi mandamentu, kiko pa bisa i kiko pa papia.” (Juan 12:49) Hesus su siñansanan no a bini di dje sino di e Tata.
HESUS a bisa ku e ta Yu di Dios, no Dios Todopoderoso. Si Hesus tabata Dios, na ken el a hasi orashon tempu ku e tabata riba tera? (Mateo 14:23; 26:26-29) Ta ilógiko pa pensa ku Hesus tabata hasi komo si fuera e tabata papia ku un otro hende!
Ora ku dos disipel di Hesus a puntr’é pa un puesto spesial den su Reino, el a kontestá: “Pa sinta na mi man drechi i na mi man robes, esaki no ta keda na mi pa duna, ma ta pa esnan pa kendenan mi Tata a prepará esei.” (Mateo 20:23) Ta gaña Hesus tabata gaña nan ora el a bisa ku e no tin outoridat pa disidí esei? Klaru ku no! Mas bien, el a rekonosé humildemente ku ta Dios so tin outoridat pa tuma desishonnan asina. Hesus asta a splika ku tin algun kos ku ni e ni e angelnan no sa sino su Tata so.—Marko 13:32.
Hesus tabata ménos ku Dios solamente ora e tabata aki riba tera? Nò. Asta despues di su morto i resurekshon, Beibel ta mustra ku ketu bai Hesus tabata kai bou di Dios. Apòstel Pablo ta rekordá nos ku “Dios ta supremo riba Kristu.” (1 Korintionan 11:3, Today’s English Version) Beibel ta bisa ku den futuro “ora tur kos ta someté na Kristu, e Yu mes lo someté su mes na Dios, ku a someté tur kos n’e i asina Dios lo ta supremo riba tur kos i den tur kos.”—1 Korintionan 15:28, BPK.
Pues, ta bisto ku Hesus no ta e Dios Todopoderoso. Ta p’esei el a referí na su Tata komo “mi Dios.”—Revelashon 3:2, 12; 2 Korintionan 1:3, 4. *
[Nota]
^ par. 12 Pa mas informashon riba e tópiko akí, wak página 201-204 di e buki Kiko Beibel Ta Siña Realmente? publiká pa Testigunan di Yehova.
[Komentario na página 6]
Hesus a bisa ku tin algun kos ku ni e ni e angelnan no sa sino su Tata so