Nos Lektornan Ta Puntra

Dios Ta Aprobá Poligamia?

Nò; e norma ku Dios a establesé den Edén ku e promé matrimonio tabata monogamia, es desir, ún esposa pa ún esposo. Despues Hesukristu a reafirmá e norma ei pa su siguidónan.—Génesis 2:18-24; Mateo 19:4-6.

Pero hòmbernan ku a biba promé ku era kristian, manera Abraham, Jakòb, David i Salomon no tabatin mas ku un esposa? Sí, pero segun Beibel, kon esei a bai? E ta menshoná e frikshon i pleitu ku a surgi den e famianan di Abraham i Jakòb pa motibu di poligamia. (Génesis 16:1-4; 29:18–30:24) Despues, e Lei di Dios a inkluí e mandato akí na kada rei: “E no mester tuma hopi esposa pa su mes, pa su kurason no desviá.” (Deuteronomio 17:15, 17) En bes di Salomon hasi kaso di e lei ei, el a bai asina leu di kasa ku mas ku 700 muhé! Lamentablemente, Salomon su kurason en bèrdat a desviá for di Yehova pa motibu di e mal influensia di su tantísimo esposanan. (1 Reinan 11:1-4) Ta bisto anto ku Beibel ta pone poligamia den un lus negativo.

Sinembargo, tin hende kisas ta puntra nan mes pakiko Dios a tolerá poligamia entre su pueblo. Wèl, pensa riba esaki: Bo a yega di keda ku un muebel pa un tempu maske a yega ora di kambi’é, podisé pa motibunan práktiko òf pasobra lo tabata muchu molèster pa deshasí di dje na e momento ei? Klaru ku e kaminda- i pensamentunan di Dios ta mas haltu ku di nos. (Isaias 55:8, 9) Sinembargo, nos por nota algun motibu práktiko pakiko el a tolerá poligamia pa un tempu.

Kòrda ku den Edén Yehova a primintí un “simia” ku na final di kuenta lo destruí Satanas. Mas despues, el a bisa Abraham ku lo e bira tata di un nashon grandi i ku e Simia, òf desendiente, primintí lo a bini di su liña di desendensia. (Génesis 3:15; 22:18) Satanas tabata determiná pa no laga e Simia ei yega. Pues el a buska tur manera di destruí e antiguo nashon di Israel. Hopi biaha el a pone Israel kai den piká pa asina e nashon pèrdè Dios su aprobashon i protekshon.

Pa kontrarestá e atakenan ei, Yehova bes tras bes a manda su profetanan pa spièrta su pueblo ora nan a desviá for di normanan hustu. Sinembargo, e tabata sa di antemano ku su pueblo hopi biaha lo no a obedesé ni e mandamentunan di mas básiko, manera esun ku a taha idolatria. (Eksodo 32:9) Si nan tabatin problema pa obedesé un lei asina básiko, kiko lo a para di nan obedensia na un lei kontra poligamia? Komo ku Yehova tin un komprondementu perfekto di naturalesa humano, el a mira ku no tabata tempu ainda pa prohibí poligamia, un kustumber ku ya tabata establesí pa hopi tempu kaba. Si Yehova lo a prohibí poligamia e tempu ei, lo tabata masha fásil pa Satanas pone Israel peka.

E echo ku Dios a permití poligamia pa un tempu tabatin mas bentaha. Esei a yuda e nashon di Israel krese rápidamente. Anto e poblashon grandi ei a yuda hasi sigur ku e nashon lo a sobrebibí te na yegada di e Mesias. Ademas, poligamia lo por a duna algun hende muhé un grado di protekshon, ya ku di e manera ei nan a haña un dak riba nan kabes i tambe un famia, den un tempu ku tabata peligroso.

Pero kòrda ku no ta Yehova a establesé poligamia. El a toler’é pa un tempu limitá, i durante e tempu ei el a pone reglanan estrikto pa evitá abusu. (Eksodo 21:10, 11; Deuteronomio 21:15-17) Ora Yehova a disidí di pone fin na e práktika di poligamia entre e hendenan ku tabata ador’é, el a usa su propio Yu pa reafirmá e norma matrimonial ku el pone den Edén. Asina Hesus a prohibí poligamia entre su siguidónan. (Marko 10:8) Anto e bèrdat akí a bira asta mas kla: E Lei di Moisés tabata bon pa su tempu, ma “e lei di Kristu” ta mihó ainda.—Galationan 6:2.