“E promé filósofonan kristian a adoptá e konsepto griego di inmortalidat di alma. Pa nan, alma ta algu ku Dios a krea i hinka den e kurpa humano na momento di konsepshon.”​—The New Encyclopædia Britannica (1988), Volúmen 11, página 25.

“E alma ku peka lo muri.”​—Ezekiel 18:4.

Relashoná ku kreashon di e promé alma humano, Beibel ta bisa: “Yehova Dios a forma hende di stòf di suela i a supla den su nanishi e rosea di bida, i hende a bira un alma [hebreo, né·fesh] bibu.”​—Génesis 2:7, NW.

E palabra hebreo né·fesh, tradusí komo “alma,” ta nifiká ‘un kriatura ku ta hala rosea.’ Ora Dios a krea e promé hòmber, Adam, no ta un alma inmortal el a hinka den dje sino e forsa di bida. I pa Adam por a keda na bida e mester a hala rosea. P’esei, ora Beibel ta papia di “alma,” e ta referí na henter e ser bibu. Na momento ku e alma no tin e forsa di bida mas ku Dios a dun’é originalmente, e ta muri.​—Génesis 3:19; Ezekiel 18:20, NW.

E doktrina di inmortalidat di alma a lanta preguntanan manera: Unda e almanan ta bai despues di morto? Kiko ta sosodé ku alma di e malbadonan? Ora e supuesto kristiannan a adoptá e mito di alma inmortal, nan a haña nan ta aseptá un otro mito mas: e mito di fièrnu di kandela.

Wak tambe e versíkulonan di Beibel akí: Eklesiastés 3:19; Mateo 10:28; Echonan 3:23