Dios Lo Kaba ku Maldat Sigur!

DIOS a duna nos su Palabra inspirá, den kua e ta splika pakiko hende ta hasi maldat. Ademas, el a duna nos boluntat liber i e abilidat di ehersé dominio propio. Pues, nos por skohe pa no hasi malu. (Deuteronomio 30:​15, 16, 19) P’esei, siendo ku nos tin e abilidatnan ei, nos por identifiká kualke mal inklinashon ku nos por tin i dal e pasonan nesesario pa eliminá esakinan. Na final di kuenta, si nos ta evitá di hasi loke ta malu, nos lo ta felis i e personanan rònt di nos tambe.—Salmo 1:1.

Sinembargo, ounke individualmente nos ta hasi masha esfuerso pa evitá di hasi malu, otronan sí ta sigui kometé maldat i ta kousa sufrimentu i hopi problema.  Beibel a spièrta: “Sabi esaki, ku den e último dianan tempunan trabahoso lo bin.” I pa mustra kiko ta hasi e dianan ei “trabahoso,” el a sigui bisa: “Hende lo ta stimadó di nan mes, stimadó di plaka, gabadó, arogante, blasfemadó, desobedesidu na mayornan, ingrato, impio, sin amor, irekonsiliabel, ku mala lenga, sin dominio propio, grosero, odiadó di loke ta bon, traidó, imprudente, sobèrbè, mas bien stimadó di plaser ku stimadó di Dios; ku tin aparensia di ta religioso bèrdè, ma ku ta nenga su poder; evitá e sorto di hendenan akí.”​—2 Timoteo 3:​1-5.

Bo a tuma nota ku e profesia akí ta usa e ekspreshon “e último dianan”? Kiko abo ta kere ku esaki ta nifiká? Mayoria di hende ta komprondé ku e ekspreshon “e último dianan” ta indiká ku algu ta yegando na su fin. Kiko ta yegando na su fin? Laga nos konsiderá loke Dios ta primintí den su Palabra.

E malbadonan lo ser eliminá kompletamente.

“Aki poko tempu e malbado lo no t’ei mas; maske kuantu bo buska su lugá, e lo no t’ei. Ma e humildenan lo heredá e tera, i lo deleitá nan mes den pas abundante.”​—SALMO 37:​10, 11.

“SEÑOR ta warda tur ku ta stim’é, ma tur e malbadonan e lo destruí.”​—SALMO 145:20.

Lo no tin opreshon mas.

“E lo libra esun den nesesidat ora ku e sklama pa yudansa, esun afligí tambe i esun ku no tin ningun hende pa yud’é. E lo reskatá nan bida for di opreshon i violensia.”​—SALMO 72:​12, 14.

“E kreashon mes tambe lo wòrdu librá for di su sklabitut na korupshon pa drenta den e libertat glorioso di e yunan di Dios.”​—ROMANONAN 8:21.

Dios lo satisfasé hende su nesesidatnan físiko.

“Kada un di nan lo sinta bou di su palu di wendrùif i bou di su palu di figu, i ningun hende lo no spanta nan.”​—MIKEAS 4:4.

“Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome; pasobra manera e dianan di un palu, asina e dianan di mi pueblo lo ta; i mi skohínan lo disfrutá di e obra di nan mannan pa hopi tempu.”​—ISAIAS 65:​21, 22.

Hustisia lo reina riba tera.

“Awor Dios lo no hasi hustisia na su skohínan ku ta sklama na dje di dia i anochi . . . ? Mi ta bisa boso ku e lo hasi hustisia pronto pa nan.”​—LUKAS 18:​7, 8.

“SEÑOR ta stima hustisia i no ta bandoná su santunan. Nan ta keda preservá pa semper.”​—SALMO 37:28.

“E habitantenan di mundu ta siña hustisia.”​—ISAIAS 26:9.

“Segun [Dios] su promesa nos ta sperando shelunan nobo i un tera nobo, den kual ta biba hustisia.”​—2 PEDRO 3:13.

 Hende Ta Kambia—Asta Awor

E promesanan ei sin duda ta hasi nos tur su kurason masha kontentu, ma ki garantia nos tin ku nan lo kumpli? Wèl, for di aworakí kaba nos tin prueba ku Dios lo kumpli ku su promesanan. Ki prueba nos tin? E echo ku rònt mundu miónes di hende ku tabata egoista, inmoral òf violento a kambia i a bira hende onesto, pasífiko i bondadoso. Sí, awendia, tin mas ku shete mion Testigu di Yehova, kendenan ta uní ku otro, formando asina un hermandat mundial. Kon bin? Pasobra nan a surpasá barera rasial, étniko, nashonalista, polítiko i ekonómiko, ku a kousa asina tantu odio, violensia i dramamentu di sanger atraves di historia humano. * E echo ku e kambionan ei ta tumando lugá awendia ta prueba konvinsente ku e promesanan di Dios lo kumpli na gran eskala.

Kon bin hende por hasi e kambionan ei? E kontesta ta sinta den e siguiente promesa bíbliko ku profeta Isaias a registrá:

“Lobo lo ta huntu ku lamchi di karné, leopardo lo kai drumi banda di lamchi di kabritu, i bisé, leon chikitu i bestia gòrdá lo ta huntu, i un mucha chikitu lo guia nan. . . . I leon lo kome yerba seku manera buey. Yu na pechu lo hunga banda di buraku di kolebra, i yu kitá for di pechu lo hinka su man den kueba di víbora. Nan lo no kousa daño ni destrukshon den henter mi seru santu, pasobra tera lo ta yen di e konosementu di SEÑOR, manera awa ta tapa laman.”​—Isaias 11:​6-9.

Akaso esaki ta djis un promesa ku un dia hende i bestia lo biba na pas ku otro? Nò, e ta enserá mas ku esei. Tuma nota ku e último parti di e pasashi ta menshoná kiko ta  pone hende hasi kambio. E ta bisa: “Tera lo ta yen di e konosementu di SEÑOR.” Awor, konosementu di Dios por kambia kondukta di bestia? Nò, pero e por i ta kambia hende sí! Pues, e profesia akí ta mustra bon kla ku aplikando siñansa bíbliko, hende ku kisas tin karakterístikanan animalístiko ta kambia i desaroyá un personalidat kristian.

Konsiderá e ehèmpel di Pedro. * Pedro a pensa ku e tabata lucha pa hustisia, i p’esei el a djòin un organisashon di terorista. Despues di a risibí entrenamentu, el a haña òrdu pa bula un edifisio kaminda polisnan tabata biba i traha. Durante su preparashonnan pa su atake terorista, nan a arest’é. Pedro a pasa 18 luna den prizòn, pero asta tras di trali el a sigui ku su aktividatnan rebelde kontra gobièrnu. Pero miéntras e tabata den prizòn, su kasá a kuminsá studia Beibel ku Testigunan di Yehova. Manera Pedro a sali liber, e tambe a kuminsá studia Beibel ku nan. I loke el a siña tokante Yehova Dios a motiv’é pa kambia su aktitut i su manera di mira bida. Pedro a bisa: “Mi ta gradisí Yehova ku nunka mi a mata ningun hende durante e añanan ku mi tabata terorista. Awor mi ta usa e spada di Dios su spiritu, esta Beibel, pa proklamá e mensahe di berdadero pas i hustisia—e bon notisia di e Reino di Dios.” Pedro a  asta bai bishitá e edifisio di polis ku e kier a destruí. Pero e biaha akí, ku e meta pa prediká e mensahe di pas i tokante e binidero mundu sin violensia.

Pues, e efekto poderoso ku e Palabra di Dios tin riba hende ta sufisiente motibu pa nos ehersé fe den Dios su promesa, esta, ku siguramente lo e kaba ku tur maldat. Sí, lo yega e tempu ku hende lo no hasi maldat mas pasobra nan a kambia i bira bon hende. Pronto Yehova lo destruí esun ku a originá maldat, esta, Satanas e Diabel, kende tras di kortina ta manipulá e asuntunan di mundu. Beibel ta bisa: “Henter mundu ta bou di kontròl di e malbado.” (1 Juan 5:19) Pero un djis aki, lo e no t’ei mas. I esnan ku opstinadamente ta nenga di bandoná nan mal kaminda tambe lo ser destruí. Lo ta masha dushi pa biba den e tempu ei!

Awor, kiko bo tin ku hasi pa bo por disfrutá di e tempu ei? Kòrda ku ta e ‘konosementu di Yehova’ ta motivá hende pa hasi kambio awe, i ta e mesun konosementu ei lo kousa kambionan mundial den e futuro serkano. Pues, si bo atkerí i apliká konosementu di Beibel—manera Pedro a hasi—bo tambe por tin e speransa di biba pa semper den un mundu den kua ‘hustisia ta biba.’ (2 Pedro 3:13) P’esei, nos ta animá bo mashá pa probechá di e oportunidat ku tin ainda pa siña tokante Dios i Hesukristu, pasobra esei por nifiká bida eterno pa bo.​—Juan 17:3.

[Nota]

[Komentario na página 9]

Bo tambe por tin e speransa di biba den un mundu den kua ‘hustisia ta biba.’​—2 PEDRO 3:13