“Mi boka lo konta di bo hustisia i di bo salbashon henter dia.”—SAL. 71:15.

1, 2. (a) Kiko un persona ta indiká ora e dediká su mes na Yehova? (b) Kon e ehèmpel di Noe, Moises, Yeremías i Pablo por benefisiá nos?

ORA bo dediká bo mes na Dios i bira un siguidó batisá di Hesus, bo ta tuma e desishon di mas serio di bo bida. Ta komo si fuera bo ta bisa Yehova: ‘Mi ke pa abo ta mi Doño den tur aspekto di mi bida. Mi ta bo sirbidó. Mi ke pa abo bisa mi kon mi mester usa mi tempu, kiko mester ta mi prioridatnan i kon mi mester usa mi rekurso- i talentonan.’

² Si bo ta un kristian dediká, esei ta básikamente loke bo a primintí Yehova. Nos ke felisitá bo pa e bon desishon ei ku bo a tuma; bo a hasi loke ta korekto i sabí. Pero awor ku bo a aseptá Yehova komo bo Doño, kon lo bo tin ku usa bo tempu? E ehèmpel di Noe, Moises, Yeremías i apòstel Pablo por yuda nos analisá e pregunta ei. Nan tur a sirbi Yehova di henter nan alma. Nos situashon awe ta meskos ku di nan. E desishonnan ku nan a tuma a demostrá kiko ta nan prioridat i por animá nos pa analisá e manera ku nos ta usando nos tempu.—Mat. 28:19, 20; 2 Tim. 3:1.

PROMÉ KU DILUVIO

3. Den ki manera nos tempu ta meskos ku tempu di Noe?

³ Hesus a kompará e tempu di Noe ku nos tempu. El a bisa: “Meskos ku e dianan di Noe tabata, asina presensia di e Yu di hende lo ta.” E hendenan “tabata kome i bebe, hòmber i muhé tabata kasa, te riba e dia ku Noe a drenta den arka, i nan no a hasi kaso te ora e Diluvio a bini i lastra nan tur bai kuné.” (Mat. 24:37-39) Mayoria di hende awe ta biba trankil di nan sin preokupá ku e urgensia di nos  tempu. Nan no ta hasi kaso di e spièrtamentu ku e sirbidónan di Dios ta proklamá. Meskos ku e hendenan den tempu di Noe, hopi di nan ta asta hasi bofon di e idea ku Dios lo intervení den asuntu humano. (2 Ped. 3:3-7) Pero kon Noe a usa su tempu apesar ku e hendenan rònt di dje no tabata hasi kaso di su spièrtamentu?

4. Kon Noe a usa su tempu despues ku el a haña su tarea spesial serka Yehova, i dikon?

⁴ Dios a informá Noe ku e ta bai destruí tur hende malbado i a dun’é un tarea spesial. Noe e ora ei a traha un arka pa salba hende i bestia. (Gén. 6:13, 14, 22) Tambe el a proklamá e huisio ku Yehova tabata bai trese. Apòstel Pedro a yama Noe “un predikadó di hustisia,” loke ta indiká ku el a hasi esfuerso pa yuda su próhimo komprondé ku tabata urgente pa nan aktua. (Lesa 2 Pedro 2:5.) Bo ta kere ku lo tabata sabí pa Noe i su famia usa nan tempu pa kuminsá un negoshi òf pa bira mas eksitoso ku otro hende òf pa forma un bida kómodo pa nan mes? Klaru ku nò! Sabiendo kiko tabata na kaminda, nan a evitá tur loke por a kita nan atenshon for di nan tarea spesial.

LOKE UN PRENS DI EGIPTO A SKOHE

5, 6. (a) E edukashon ku Moises a haña tabata pa prepar’é pa kiko? (b) Dikon Moises no a probechá di e oportunidatnan ku e bida komo prens di Egipto a ofres’é?

⁵ Laga nos wak awor e ehèmpel di Moises. El a lanta den un palasio di Egipto komo yu di kriansa di e yu muhé di Fárao. Na mucha, “nan a eduká Moises den tur e sabiduria di e egipsionan.” (Echo. 7:22; Éks. 2:9, 10) E intenshon di e edukashon akí tabata probablemente pa prepar’é pa un karera komo prens den servisio di Fárao. E por a haña un puesto importante den e gobièrnu di mas poderoso di e tempu ei. Tambe e por tabatin e kosnan di luho, e privilegionan i e plasernan ku a kompañá un puesto asina. Pero ta esei tabata Moises su meta den bida?

⁶ Tempu Moises tabata chikitu, su berdadero mayornan probablemente a siñ’é loke Yehova a primintí su antepasadonan, Abraham, Isak i Yakòb. Moises tabatin fe den e promesanan ei. Lo e mester a pensa bon riba su futuro i su lealtat na Yehova. Pues, ora e momento a yega ku e mester a skohe entre ser un prens egipsio òf un esklabo israelita, kiko el a disidí? “El a skohe pa ser maltratá huntu ku e pueblo di Dios en bes di gosa di e plasernan pasahero di piká.” (Lesa Hebreonan 11:24-26.) Mas despues, el a usa su bida manera Yehova a instruyé. (Éks. 3:2, 6-10) Dikon Moises a hasi esei? Pasobra el a kere loke Dios a primintí i a yega na e konklushon ku lo e no tin ningun futuro den Egipto. I en bèrdat, poko despues di esei e dies plaganan di Dios a aplastá e nashon ei. Bo ta mira e lès ku tur hende dediká na Yehova por siña for di esaki awe? Nos  mester enfoká riba Yehova i su sirbishi, i no riba un karera òf kualke plaser di e mundu akí.

YEREMÍAS TABATA SA KIKO TA NA KAMINDA

7. Den ki sentido e situashon di Yeremías tabata meskos ku esun di nos?

⁷ Un otro hòmber ku a pone e sirbishi di Yehova na promé lugá tabata profeta Yeremías. Yehova a skohe Yeremías pa sirbi komo su profeta i a dun’é e enkargo di prediká e mensahe ku Yehova lo a trese huisio riba Herúsalèm i Huda apóstata. Den un sentido, Yeremías tabata biba “den e último dianan.” (Yer. 23:19, 20) E tabata sa bon bon ku e sistema den kua e tabata biba lo no a dura mashá.

8, 9. (a) Dikon Yehova mester a korigí Baruk su manera di pensa? (b) Kiko nos mester kòrda ora nos ta traha plan?

⁸ Kiko tabata e konsekuensia lógiko di loke Yeremías tabata kere? E no a purba di traha pa su futuro den e sistema ei ku tabata destiná na destrukshon. Lo no tabatin sentido pa e hasi esei. Ma su sekretario, Baruk, sí no a pensa asina. P’esei Dios a inspirá Yeremías pa bisa su sekretario: “Mira, loke mi a edifiká mi ta bai bash’abou, i loke mi a planta mi ta bai ranka, esta, henter e tera. Ma abo, bo ta buska kosnan grandi pa bo mes? No buska eseinan; pasobra mira, mi ta bai trese desaster riba tur karni . . . ma lo mi duna bo bo bida komo botin, na tur lugá ku bo bai.”—Yer. 45:4, 5.

⁹ Nos no sa sigur kiko tabata e “kosnan grandi” ku Baruk tabata buska pa su mes. * Pero loke sí nos sa ta ku e kosnan ei lo no a dura; nan lo a kaba ora Babilonia lo a konkistá Herúsalèm na aña 607 promé ku nos era. Kiko nos ta siña for di esaki? Wèl, nos mester plania pa futuro pa hasi sigur ku nos tin e nesesidatnan di bida. (Pro. 6:6-11) Pero lo ta sabí pa dediká gran parti di nos tempu i energia na aktividatnan ku no tin balor duradero? Ta bèrdat ku e organisashon di Yehova ta sigui plania pa Salònnan di Reino, sukursalnan i otro proyektonan teokrátiko nobo. Pero e proyektonan akí ta diferente, ya ku nan meta ta pa promové interesnan di Reino. Lo ta bon anto pa tur sirbidó dediká di Yehova tambe fiha e tipo di prioridatnan ei ora nan ta traha plan. Abo ta konvensí den bo kurason ku bo ta ‘buskando promé e Reino i e hustisia di Dios’?—Mat. 6:33.

MI “TA KONSIDERÁ NAN KOMO KOS DI BENTA AFÓ”

10, 11. (a) Riba kiko Pablo tabata konsentrá promé ku el a bira kristian? (b) Dikon Pablo su prioridatnan den bida a kambia kompletamente?

¹⁰ Por último, laga nos konsiderá e ehèmpel di Pablo. Promé ku el a bira kristian, e tabatin loke a parse un futuro prometedor. El a studia lei hudiu serka un di e maestronan mas famoso di su tempu. El a risibí sierto outoridat for di e sumo saserdote hudiu. I el a hasi mas progreso den hudaismo ku hopi hende di su edat. (Echo. 9:1, 2; 22:3; 26:10; Gal. 1:13, 14) Pero tur esei a kambia ora Pablo a realisá ku Yehova a rechasá e hudiunan komo nashon.

¹¹ Pablo tabata sa ku for di e punto di bista di Yehova un karera den e sistema hudiu no tabatin ningun balor; e nashon ei no tabatin futuro. (Mat. 24:2) E eks fariseo akí a haña un komprondementu nobo i mas kla di e propósito di Dios, i tambe el a risibí e privilegio di e sirbishi  kristian. El a asta bisa ku e kosnan ku ántes el a pensa tabata importante awor tabata “komo kos di benta afó.” Pablo a legumai su aktividatnan den hudaismo i a dediká e restu di su bida na predikashon di e bon notisia.—Lesa Filipensenan 3:4-8, 15; Echo. 9:15.

ANALISÁ BO PRIORIDATNAN

12. Riba kiko Hesus a konsentrá despues ku el a batisá?

¹² Noe, Moises, Yeremías, Pablo i hopi otro hende meskos ku nan a dediká mayoria di nan tempu i energia na aktividatnan teokrátiko. Nan ta bon ehèmpel pa nos. Naturalmente, e mihó ehèmpel di tur sirbidó dediká di Yehova ta Hesus. (1 Ped. 2:21) Despues ku el a batisá, el a dediká e restu di su bida riba tera na predikashon di e bon notisia i na duna onor na Yehova. Un kristian ku ta rekonosé Yehova komo su Doño ta konkluí for di esaki ku su sirbishi na Yehova mester tin prioridat den su bida. Esei ta bo prioridat? Kon nos por traha pa logra metanan teokrátiko i a la bes atendé otro responsabilidatnan nesesario?—Lesa Salmo 71:15; 145:2.

13, 14. (a) E organisashon di Yehova ta animá tur kristian dediká pa pensa riba kiko? (b) Ki satisfakshon e pueblo di Dios por tin?

¹³ Atraves di añanan, e organisashon di Yehova a animá kristiannan bes tras bes pa analisá huntu ku orashon si nan por traha pionero. E sirkunstansianan di vários sirbidó fiel di Yehova no ta permití nan dediká un promedio di 70 ora pa luna na e trabou di prediká. Nan no mester sinti nan malu pa esaki. (1 Tim. 5:8) Pero kiko di abo? Di bèrdat e trabou di pionero ta fuera di bo alkanse?

¹⁴ Pensa un ratu riba e goso ku hopi sirbidó di Yehova tabatin durante e temporada di Memorial di e aña akí. Durante luna di mart, e pioneronan ousiliar tabatin e oportunidat spesial di skohe si nan ta traha 30 òf 50 ora den sirbishi di vèlt. (Sal. 110:3) Miónes di ruman a traha pionero ousiliar, i bo por a sinti e gran entusiasmo i goso ku tabata reina den e kongregashonnan. Abo lo por regla bo asuntunan di tal manera ku bo por eksperensiá e goso ei riba un base mas regular? Ora un kristian dediká traha pionero, e ta sinti un gran satisfakshon i por bisa na final di kada dia: “Yehova, mi a hasi tur loke mi tabata por den bo sirbishi.”

15. Ki meta un hóben kristian lo mester tin ora e ta bai skol?

¹⁵ Podisé bo ta kabando skol, i bo tin bon salú i tiki responsabilidat. Bo a pensa seriamente riba e trabou di pionero regular? Na skol, maestronan sin duda ta kere ku e mihó kos ku bo por hasi ta di sigui un estudio avansá, òf bai universidat, i plania pa un karera den mundu. Sinembargo, nan konfiansa ta den un sistema sosial i finansiero ku no tin un futuro duradero. Di otro banda, si bo hasi e sirbishi di Yehova bo karera, lo bo ta dedikando bo tempu na metanan duradero ku ta bale la pena. Ademas, lo bo ta imitando e ehèmpel perfekto di Hesus. Esei ta un desishon sabí ku lo hasi bo felis, lo protehá bo i lo demostrá ku bo ta determiná pa kumpli ku bo dedikashon na Yehova.—Mat. 6:19-21; 1 Tim. 6:9-12.

16, 17. Menshoná algun pregunta ku kristiannan por hasi nan mes tokante nan empleo i otro aktividatnan.

¹⁶ Hopi sirbidó di Dios awe tin ku traha hopi ora pa nan por kubri e nesesidatnan básiko di nan famia. Pero algun di nan ta traha mas ora ku ta nesesario. (1 Tim. 6:8) E mundu komersial ta hasi tur su esfuerso pa konvensé nos ku nos  no por biba sin e tantísimo produktonan ku tin riba merkado i tur e modelonan nobo ku ta sali. Pero kristiannan berdadero no ke pa Satanas i su mundu disidí pa nan kiko mester ta na promé lugá. (1 Huan 2:15-17) Kiko di rumannan ku a baha ku penshon? E mihó manera ku nan por usa nan tempu ta di traha pionero, i asina nan ta pone e sirbishi di Yehova na promé lugá.

¹⁷ Tur sirbidó dediká di Yehova por puntra nan mes: Kiko ta e kos mas importante den mi bida? Mi ta pone interesnan di Reino na promé lugá? Mi ta imitá Hesus su aktitut di sakrifisio propio? Mi ta hasi kaso di su konseho pa siguié kontinuamente? Mi por ahustá mi programa di tal manera ku mi por dediká mas tempu na e trabou di prediká òf na otro aktividatnan teokrátiko? Asta si aworakí mi sirkunstansianan no ta permití mi hasi mas den sirbishi, mi ta sigui kultivá un spiritu di sakrifisio propio?

“TANTU E DESEO KOMO E PODER PA HASI”

18, 19. Kiko bo por pidi den orashon, i dikon Yehova lo keda kontentu ku e petishon ei?

¹⁸ Ta un goso pa mira e zelo di e pueblo di Dios. Pero algun ruman ku por traha pionero no tin masha gana di hasié òf ta sinti ku nan no ta kualifiká pa hasié. (Éks. 4:10; Yer. 1:6) Kiko nan por hasi? Nan por pidi Yehova yuda nan. Pablo a bisa su rumannan den fe ku Yehova ‘ta esun ku ta obra den nan i ta duna nan tantu e deseo komo e poder pa hasi tur loke ta agrad’é.’ (Flp. 2:13) Si bo no ta sinti e deseo pa hasi mas den bo sirbishi, pidi Yehova duna bo tantu e deseo komo e poder pa hasi esei.—2 Ped. 3:9, 11.

¹⁹ Noe, Moises, Yeremías, Pablo i Hesus tur tabata hòmbernan dediká. Nan a usa nan tempu i energia pa prediká Yehova su mensahe di spièrtamentu. Nan no a laga nada kita nan atenshon for di e trabou. Fin di e sistema aktual ta serka. P’esei, nos tur ku a dediká nos bida na Dios tin ku hasi sigur ku nos ta hasiendo tur nos esfuerso pa imitá e ehèmpelnan ekselente akí ku nos ta lesa di dje den Beibel. (Mat. 24:42; 2 Tim. 2:15) Di e manera ei nos por agradá Yehova i risibí hopi bendishon.—Lesa Malakías 3:10.

[Nota]

[Preguntanan di Estudio]

[Plachi na página 22]

Hende no a hasi kaso di e spièrtamentu di Noe

[Plachi na página 25]

Abo a pensa seriamente riba e trabou di pionero regular?