PA KONTESTÁ e pregunta akí, laga nos analisá brevemente dos ehèmpel di huisio divino ku tin den Beibel: e Diluvio di tempu di Noe i e destrukshon di e kananeonan.

LOKE HENDE SA BISA: “Ta hopi kruel di parti di Dios pa manda un diluvio ku a kaba ku tur hende, ku eksepshon di Noe i su famia.”

LOKE BEIBEL TA BISA: Dios a deklará: “Mi no tin plaser den e morto di e malbado, ma mas bien ku e malbado bira for di su kaminda i biba.” (Ezekiel 33:11) Pues Dios no a gosa ora el a destruí e malbadonan den tempu di Noe. Ta dikon el a destruí nan anto?

Beibel ta splika ku ora Dios a trese e huisionan ei riba hende malbado di pasado, el “a pone un ehèmpel di loke lo pasa ku hende malbado.” (2 Pedro 2:5, 6) Kiko Dios a demostrá pa medio di e ehèmpel òf patronchi ku el a pone?

Na promé lugá, el a demostrá bon kla ku aunke e tin duele di destruí hende malbado, e no ta pasa por haltu di e manera kruel ku nan ta trata otro hende i e ta tene nan responsabel pa nan aktonan. Den futuro lo e eliminá tur inhustisia i sufrimentu.

Na di dos lugá, Dios su aktonan di pasado ta demostrá ku den su gran amor semper el a spièrta hende promé ku e ehekutá su huisio. Por ehèmpel, el a laga Noe, un predikadó di hustisia, spièrta e hendenan di su tempu. Pero nan a ignor’é. Beibel ta bisa: “Nan no a hasi kaso te ora e Diluvio a bini i lastra nan tur bai kuné.”—Mateo 24:39.

Dios su patronchi a kambia den transkurso di tempu? Nò. El a spièrta su pueblo Israel ku si nan a imitá e maldat di e nashonnan rònt di nan, lo el a laga nan enemigunan invadí nan, destruí Herúsalèm i hiba nan den koutiverio. Apesar di e spièrtamentu ei, Israel a imitá e maldat di e nashonnan bisiña. Asta nan a sakrifiká nan yunan na dios falsu. Yehova a tuma medida kontra nan? Klaru ku sí, pero solamente despues ku el a manda profeta pa spièrta nan bes tras bes pa kambia nan aktitut promé ku tabata lat. Yehova asta a bisa nan: “Siguramente, SEÑOR Dios no ta hasi nada, sin ku e revelá su konseho sekreto na su sirbidónan, e profetanan.”—Ámos 3:7.

 KIKO ESAKI TA NIFIKÁ PA BO? E patronchi ku Yehova a establesé den pasado ta duna nos speransa. Nos por tin e siguransa ku pronto lo e destruí tur hende kruel. Beibel ta bisa: “Hasidónan di maldat lo wòrdu kòrtá kitá afó . . . Ma e humildenan lo heredá e tera, i lo deleitá nan mes den pas abundante.” (Salmo 37:9-11) Kiko bo ta pensa di un huisio ku ta libra hende di sufrimentu? E ta algu kruel òf miserikòrdioso?

LOKE HENDE SA BISA: “Destrukshon di e kananeonan tabata un krímen di guera kruel, meskos ku e genosidionan di nos tempu.”

LOKE BEIBEL TA BISA: “Tur [Dios] su kamindanan ta hustu; [e ta] un Dios di fieldat i sin inhustisia.” (Deuteronomio 32:4) No por kompará un akto di hustisia divino ku guera di hende. Dikon? Pasobra kontrali na hende, Dios sí por lesa loke un persona tin den su kurason.

Por ehèmpel, ora Dios a husga e statnan di Sódoma i Gomora i a disidí di destruí nan, e fiel hòmber Abraham a puntra su mes si e desishon tabata hustu. E no por a imaginá su mes ku un Dios di hustisia lo a “destruí e hustu huntu ku e malbado.” Ku pasenshi Yehova a sigurá Abraham ku si tabatin sikiera dies hende hustu na Sódoma, lo e no destruí e stat pa motibu di nan. (Génesis 18:20-33) Ta bisto anto ku Dios a saminá kurason di e hendenan ei i a mira kon malbado nan tabata.—1 Krónikanan 28:9.

Meskos tambe, Dios a mira e maldat di e kananeonan i ku su rason el a ordená nan destrukshon. Nan tabata notorio pa nan krueldat; por ehèmpel, nan tabata sakrifiká nan yunan den kandela na nan diosnan. * (2 Reinan 16:3) E kananeonan tabata sa ku Yehova a manda Israel poderá di e tera. Esnan ku a opta pa keda i bringa kontra e israelitanan no solamente a oponé nan sino tambe Yehova, kende a duna sufisiente prueba ku e tabata ku su pueblo.

Sinembargo, Yehova a tene miserikòrdia ku e kananeonan ku a bandoná nan práktikanan malbado i aseptá su normanan moral. Por ehèmpel, el a pordoná bida di e prostituta Rahab i su famia. Anto ora e habitantenan di Gabaon, un stat di Kanan, a pidi klemensia, el a spar bida di tantu nan komo nan yunan.—Hosue 6:25; 9:3, 24-26.

KIKO ESAKI TA NIFIKÁ PA BO? Nos por siña un lès importante for di e huisio kontra di e kananeonan. Kada dia nos ta mas i mas serka di e “dia di huisio i di destrukshon di hende malbado.” (2 Pedro 3:7) Si nos ta stima Yehova i ta obedes’é, nos lo biba den un mundu sin sufrimentu ora e eliminá tur esnan ku ta rechasá su gobernashon hustu.

Komo muestra di su amor, Yehova ta rekordá nos ku desishonnan ku mayornan tuma tin konsekuensia pa nan yunan. E ta bisa den su Palabra: “Skohe bida pa bo biba, abo i bo desendientenan, dor di stima SEÑOR bo Dios, dor di obedesé su bos i dor di tene duru na dje.” (Deuteronomio 30:19, 20) E palabranan ei ta di un Dios kruel òf di un Dios ku ta stima hende i ku ke pa nan tuma bon desishon?