ALGUN tempu pasá, The Chosun Ilbo, un korant koreano, a publiká un artíkulo interesante titulá: “‘E Maravioso Shim Cheong,’ un Muhé Ku no Tabata Sa Nada di Hesus—Ta Fièrnu El A Bai?”

E título akí tabata un poko kontroversial pasobra segun un kuenta koreano, Shim Cheong ta un mucha muhé masha stimá ku ta sakrifiká su bida pa yuda su tata siegu. Den transkurso di añanan el a risibí hopi elogio. De echo, na Korea, Shim Cheong ta ser mirá komo un modelo di un yu muhé dediká.

Pa hopi hende, e idea ku un persona asina por ser kastigá den fièrnu djis pasobra e no tabata un kristian batisá a parse inhustu òf asta ofensivo. Al fin i al kabo, e historia supuestamente lo mester a tuma lugá hopi tempu promé ku e mensahe tokante Kristu a yega na e pueblo kaminda Shim Cheong tabata biba.

E artíkulo a inkluí un entrevista ku un pastor. Nan a puntr’é si tur hende ku muri sin haña chèns di konosé Hesus ta kondená pa bai fièrnu. Kiko el a kontestá? “Nos no sa. Nos ta djis asumí ku Dios lo mester tin un propósito òf destino [pa e tipo di hendenan ei].”

The New Catholic Encyclopedia ta bisa: “Pa un hende haña salbashon, e mester ta batisá. Kristu mes a bisa ku si un hende no nase di nobo di awa i di Spiritu Santu, lo e no por drenta den e Reino di Dios (Hn 3.5).” Pa e motibu akí, tin hende ta pensa ku si un persona muri sin ku el a batisá, e ta bai fièrnu di kandela òf ta sufri di un manera òf otro despues di morto.

Pero pa hopi otro hende, e idea akí ta apsurdo. Miónes i miónes di hende a muri sin ku nan a haña konosementu di Beibel. Nan meresé tormento eterno? Kiko Beibel ta bisa tokante e asuntu akí?

Beibel ta mustra bon kla ku Dios no ta kastigá hende ku a biba sin ku nan a haña sa kiko e ta rekerí di nan. Echonan 17:30 ta sigurá nos: “Dios a laga e tempunan ei ku hende tabata ignorante pasa numa.” Ki speransa Beibel ta ofresé pa hende ku a muri sin haña chèns di siña tokante Dios?

Nos por haña e kontesta den loke Hesus a bisa un di e malechornan ku a muri banda di dje. E hòmber a bisa Hesus: “Kòrda riba mi ora bo drenta bo Reino.” Kiko Hesus a kontest’é? “Di bèrdat mi ta bisa bo awe: Lo bo ta ku mi den Paradeis.”—Lukas 23:39-43.

Akaso Hesus a primintí e hòmber ku lo e bai shelu? Nò, pasobra e hòmber no a “nase di nobo” di awa i di spiritu. Esaki ta algu nesesario pa drenta e Reino di shelu. (Huan 3:3-6) Mas bien, Hesus a primintié ku lo e biba atrobe den Paradeis. Komo hudiu, lo e mester tabata sa di e Paradeis—e Hòfi di Edén—ku un tempu tabata eksistí riba tera i ku e promé buki di Beibel ta papia di dje. (Génesis 2:8) Hesus su promesa a duna e hòmber speransa di resusitá den un Paradeis riba tera.

De echo, Beibel ta primintí “ku lo bai tin un resurekshon di tantu hende hustu komo inhustu.” (Echonan 24:15) E palabra “inhustu” ta referí na tur esnan ku no a haña oportunidat pa kumpli ku Dios su normanan hustu pasobra nunka nan no a haña sa di nan. Hesus lo resusitá e malechor inhustu ku el a papia kuné i tambe miónes i miónes di otro hende ku a muri den nan ignoransia. Anto den Paradeis riba tera nan lo siña kiko Dios ta rekerí di nan, i nan lo haña e oportunidat pa demostrá ku nan stim’é i ke obedesé su mandamentunan.

Ora e inhustunan resusitá, akaso nan lo ser husgá a base di loke nan a hasi den pasado? Nò. Romanonan 6:7 ta bisa: “Esun ku muri ta keda apsolvé di su piká.” E inhustu lo a paga pa su pikánan ora e muri. Pues, nan lo ser husgá a base di loke nan hasi despues ku nan ser resusitá i no a base di loke nan a hasi den nan ignoransia promé ku nan a muri. Kiko esaki lo nifiká pa nan?

Despues di e resurekshon, e inhustunan lo haña oportunidat pa siña di e leinan di Dios, ku lo keda revelá den bukinan simbóliko. E ora ei nan lo ser husgá “segun nan obranan,” es desir, a base di si nan ta obedesé Dios su leinan òf nò. (Revelashon 20:12, 13) Pa hopi hende inhustu esaki lo no ta e di dos chèns, sino e promé biaha ku nan lo haña oportunidat pa siña hasi Dios su boluntat i haña bida eterno riba tera.

E siñansa di Beibel akí a yuda hopi hende bolbe haña fe den Dios. Yeong Sug tabata un di nan. El a ser lantá komo un katóliko deboto. Algun di su famianan asta tabata pastor. El a drenta un kombento ku e speransa di bira sùr. Mas despues, el a sali pasobra e kosnan ku el a mira pasa eiden a desapunt’é. Ademas, e no por a aseptá e doktrina di fièrnu di kandela pasobra e tabata haña e idea di torturá hende den kandela di fièrnu kruel.

E ora ei, un Testigu di Yehova a mustra Yeong Sug e siguiente palabranan den Beibel: “E bibunan sa ku nan lo muri, ma e mortonan no sa nada, ni nan no tin rekompensa mas, pasobra ningun hende no ta kòrda mas riba nan.” (Eklesiástes 9:5) E Testigu a yud’é komprondé ku su antepasadonan no ta ser tormentá den fièrnu. Mas bien, nan ta drumí den morto, wardando riba resurekshon.

Sabiendo ku hopi hende nunka a yega di tende di e bèrdat di Beibel, Yeong Sug a tuma na pechu e palabranan di Hesus na Mateo 24:14: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.” Awe, e ta prediká e bon notisia i ta kompartí ku otro hende su speransa maravioso basá riba Beibel.

Beibel ta bisa: “Dios no ta hasi distinshon di persona, sino ku e ta aseptá tur hende di tur nashon ku ta tem’é i ku ta hasi loke ta korekto.” (Echonan 10:34, 35) Esaki ta e hustisia perfekto ku nos tur por spera di Dios, kende ta “stima hustisia i huisio.”—Salmo 33:5.