E Skritura Griego Kristian ta menshoná e senturionnan romano vários biaha. E ofisial di ehérsito ku a supervisá e ehekushon di Hesus tabata un senturion. Kornelio, e promé persona no-hudiu ku a bira kristian, tambe tabatin e rango ei. Tantu e ofisial ku mester a supervisá e sutamentu di Pablo komo Hulio, kende a hiba Pablo Roma, tambe tabata senturion.—Marko 15:39; Echonan 10:1; 22:25; 27:1. *

Un senturion normalmente tabata dirigí un grupo di mas o ménos 50 pa 100 sòldá na pia. E tabatin e tarea di entrená i disipliná e sòldánan, inspekshoná nan armadura i ekipo di guera i dirigí nan ora di bai guera.

E rango di senturion tabata e posishon di mas haltu ku un sòldá romano por a haña. Esnan ku tabatin e posishon akí tabata sòldánan ku a sirbi pa hopi tempu i ku mester tabata bon lider. E disiplina i efisiensia di e poderoso ehérsito romano tabata dependé di e senturionnan akí. Segun un dikshonario, “mayoria di senturion tabata e sòldánan ku mas eksperensia i esnan mas vèrsá den nan trabou den e ehérsito.”

Spilnan djawendia ta trahá di glas. En kambio, den tempu bíbliko generalmente nan tabata traha spil di metal bon di pòlish, mayoria di biaha di bròns, pero tambe di koper, plata, oro òf un meskla di oro ku plata ku yama elektrum. E promé biaha ku Beibel ta menshoná spil ta en konekshon ku e konstrukshon di e tabernakel, e promé sentro di adorashon na Israel. Pa e okashon ei, hende muhé a kontribuí ku spil pa traha un labamano sagrado i su pia di bròns. (Éksodo 38:8) Probablemente, mester a smèlt e spilnan pa por a traha e labamano.

Vários biaha ku arkeólogonan a koba na Israel i den e region den bisindario, nan a haña spil huntu ku prenda i otro ophetonan ku hende muhé tabata usa komo adorno pa nan kurpa. Por lo general, e spilnan akí tabata rondó i e man tabata trahá di palu, metal òf ivor. Mayoria di biaha e mannan ei tabata dekorá ku e forma di kurpa di un hende muhé. Un banda so di e spil tabata di pòlish.

Kontrali na spil di glas djawendia, e spilnan di antigwedat tabata dòf. Esei kisas ta loke apòstel Pablo tabata ke men ora el a bisa: “Awor nos ta mira un forma vago komo si fuera ta den un spil di metal nos ta wak.”—1 Korintionan 13:12.