Abo ta pensa ku kos lo bira mihó den futuro? Hopi hende ta purba di keda positivo apesar di e problemanan serio ku nos ta enfrentá awe. Pero di bèrdat nos por spera ku kos lo bira mihó? Sí! Beibel ta duna nos berdadero speransa pa un mihó futuro.

•  Ki speransa Beibel ta duna?

•  Loke Beibel ta primintí ta zona muchu bon pa ta bèrdat?

•  Kon e promesanan di Beibel lo kumpli?

•  Na ki tempu e promesanan akí lo kumpli?

•  Kon e promesanan den Beibel por yuda nos awe?

 Den Beibel nos ta mira ku hende lo enfrentá problema masha difísil. Sinembargo, Beibel ta primintí ku e problemanan akí lo no afektá nos pa semper. Laga nos wak algun ehèmpel.

•   Problema: Hende ku no tin lugá di biba

   Loke Beibel ta bisa: “I nan lo traha kas i biba den nan.”—Isaías 65:21.

   Loke lo pasa den futuro: Hende lo tin nan mes kas.

•   Problema: Desempleo i pobresa

   Loke Beibel ta bisa: “Mi skohínan lo disfrutá di e obra di nan mannan pa hopi tempu.”—Isaías 65:22.

   Loke lo pasa den futuro: Tur hende lo disfrutá di trabou satisfaktorio.

•   Problema: Inhustisia

   Loke Beibel ta bisa: “Prensnan lo goberná ku [hustisia].”—Isaías 32:1.

   Loke lo pasa den futuro: Nunka mas hende lo no ser tratá inhustamente pa motibu di nan nashonalidat òf posishon sosial, i ningun hende lo no ta pober. Tur hende lo ser tratá na un manera hustu.

•   Problema: Mal nutrishon i hamber

   Loke Beibel ta bisa: “Lo tin abundansia di maishi den e tera, riba kabes di e serunan.”—Salmo 72:16.

   Loke lo pasa den futuro: Tur hende lo tin kuminda saludabel na abundansia. Ningun hende lo no bai drumi ku hamber ni sufri pa motibu di mal nutrishon.

•   Problema: Krímen i violensia

   Loke Beibel ta bisa: “Kada un di nan lo sinta bou di su palu di wendrùif i bou di su palu di figu, i ningun hende lo no spanta nan.”—Mikéas 4:4.

   Loke lo pasa den futuro: Tur hende lo sinti nan safe, pasobra lo no tin hende malbado mas riba tera, i “e hustunan lo heredá e tera.”—Salmo 37:10, 29.

•   Problema: Guera

   Loke Beibel ta bisa: “Nashon lo no lanta spada kontra nashon, i nunka mas nan lo train pa guera.”—Isaías 2:4.

   Loke lo pasa den futuro: Lo tin pas tur kaminda. (Salmo 72:7) Ningun hende lo no ta tristu pasobra un ser kerí di nan a muri den guera, ni ningun hende lo no bira refugiado pa motibu di guera.

•   Problema: Malesa

   Loke Beibel ta bisa: “Ningun habitante lo no bisa: ‘Mi ta malu.’”—Isaías 33:24.

   Loke lo pasa den futuro: Hende lo no sufri mas pa motibu di desabilidat òf pasobra nan ta malu. (Isaías 35:5, 6) Beibel ta asta primintí ku “lo no tin morto mas.”—Revelashon 21:4.

•   Problema: Daño na medio ambiente

   Loke Beibel ta bisa: “Tera seku i desierto lo ta kontentu, i Arabá lo regosihá i floria manera rosa.”—Isaías 35:1.

   Loke lo pasa den futuro: Henter tera lo bira un paradeis pa hende biba ariba, manera tabata Dios su propósito for di prinsipio.—Génesis 2:15; Isaías 45:18.

 Si bo ta sinti asina, ta komprendibel. Sinembargo, nos ta animá bo pa analisá loke Beibel ta bisa tokante futuro. Dikon? E promesanan ku tin den Beibel ta diferente for di e promesanan ku hende ta hasi i for di loke hende ta bisa lo sosodé den futuro. E promesanan ku tin den Beibel ta bini di Dios. Laga nos wak dikon esei ta hasi un diferensia asina grandi:

•   Nos por konfia Dios. Beibel ta bisa ku Dios “no por gaña.” (Tito 1:2) Ademas, ta Dios so tin e abilidat pa bisa di antemano loke lo pasa den futuro. (Isaías 46:10) Den Beibel tin vários ehèmpel ku ta mustra ku loke Dios bisa semper ta tuma lugá. Pa mas informashon, wak e vidio Kon Nos Por Tin Sigur Ku Loke Beibel Ta Bisa Ta Bèrdat?

•   Dios por solushoná nos problemanan. Beibel ta bisa ku Dios tin poder pa hasi ‘tur loke ta agrad’é.’ (Salmo 135:5, 6) Ku otro palabra, nada no por stroba Dios di kumpli ku su promesanan. Ademas, Dios ke yuda nos pasobra e ta stima nos.—Huan 3:16.

 Pero, kisas bo ta puntra bo mes, ‘Si Dios ke yuda nos i e tin e poder pa yuda nos, dikon ainda nos tin asina tantu problema?’ Pa haña kontesta pa e pregunta ei, wak e vidio Dikon Dios Ta Permití Sufrimentu?

 Dios lo usa su reino, un gobièrnu den shelu, pa kumpli ku su promesanan. El a nombra Hesukristu komo Rei di e reino ei i a dun’é outoridat pa kuida e tera i e hendenan riba dje. Ora Hesus tabata riba tera, el a kura hende malu, alimentá hende ku tabatin hamber, kontrolá e wer i resusitá hende ku a muri. (Marko 4:39; 6:41-44; Lukas 4:40; Huan 11:43, 44) Di e manera ei, el a mustra kiko lo e hasi komo Rei di Dios su Reino.

 Pa haña sa mas tokante kon Dios su reino lo benefisiá bo, wak e vidio Kiko e Reino di Dios Ta?

 Pronto! Kon nos por tin sigur di esei? Beibel a menshoná susesonan ku lo indiká ku Dios su Reino ta serka di kuminsá goberná tera. (Lukas 21:10, 11) Nos ta mira e susesonan ei tumando lugá awe.

 Pa haña sa mas, lesa e artíkulo “Na Ki tempu e Reino di Dios Lo Goberná Mundu?”

 Un eskritor di Beibel a kompará e speransa ku Beibel ta duna nos ku un “anker pa nos alma.” (Hebreo 6:19) Meskos ku un anker ta tene un barku stabil durante un tormenta, Beibel su speransa pa futuro por yuda nos trata ku e problemanan ku nos ta enfrentá awe. Nos speransa por yuda nos keda kalmu i felis, pensa bon i asta keda saludabel.—1 Tesalonisensenan 5:8.