Lukas, un eskritor di Beibel, a bisa tokante e relato ku el a skirbi di Hesus su bida: “Mi a investigá tur kos for di prinsipio ku eksaktitut.”—Lukas 1:3.

 Den e Evangelionan di Mateo, Marko, Lukas i Huan nos ta haña e relatonan tokante e bida di Hesus. E eskritornan ei a biba den e mesun tempu ku Hesus. Pero tin ekspertonan ta bisa ku rònt di siglo 4 hende a hasi kambio den e relatonan akí.

 Sinembargo, na komienso di siglo 20 investigadónan a haña un manuskrito di e Evangelio di Huan na Egipto. Awe e manuskrito ei ta konosí komo Papiro Rylands 457 (P⁵²) i ta ser konserbá na e Biblioteka John Rylands na Manchester (Inglatera). E ta kontené loke awe ta pará den Beibel na Huan 18:31-33, 37, 38.

 Esaki ta un dokumento masha balioso, pasobra e ta e manuskrito di mas bieu ku tin di e Skritura Griego Kristian (òf ‘Tèstamènt Nobo’). Hopi eksperto ta kere ku el a ser skirbí rònt di aña 125 despues di Kristu, apénas un 25 aña despues ku Huan a skirbi esun original. Loke tin skirbí den e fragmento akí ta kuadra kasi eksaktamente ku manuskritonan skirbí despues.