Hesus a muri pa hende por haña pordon pa nan pikánan i pa nan por haña bida eterno. (Romanonan 6:23; Efesionan 1:7) E morto di Hesus a proba tambe ku un hende por keda leal na Dios asta bou di e pruebanan di mas pisá.​—Hebreonan 4:15.

 Ban wak kon e morto di un hòmber por logra asina tantu.

1.   Hesus a muri pa “pordon di nos pikánan.”—Kolosensenan 1:14.

    E promé hende, Adam, a ser kreá perfekto, sin piká. Sinembargo, el a skohe pa desobedesé Dios. E desobedensia di Adam, òf su piká, a afektá tur su desendientenan. Beibel ta splika ku “mediante desobedensia di esun hende ei hopi a bira pekadó.”—Romanonan 5:19.

    Hesus tambe tabata perfekto, ma nunka el a peka. P’esei, e por ta “un sakrifisio di rekonsiliashon pa nos pikánan.” (1 Huan 2:2) E desobedensia di Adam a kontaminá e famia humano ku piká, ma e morto di Hesus a kita e mancha di piká for di tur hende ku ta pone fe den dje.

    Den un sentido, Adam a bende nos ku piká. Pero ora ku di su mes boluntat Hesus a muri na fabor di humanidat, el a kumpra humanidat bèk. Komo resultado, ‘si sosodé ku un hende kometé piká, e tin un ayudante serka e Tata: Hesukristu, un persona hustu.’—1 Huan 2:1.

2.   Hesus a muri “pa tur ku pone fe den dje no bai pèrdí, ma haña bida eterno.”—Huan 3:16.

    Aunke Adam a ser kreá pa biba pa semper, ora el a peka, el a haña e kastigu di morto. Pa medio di Adam, “piká a drenta mundu, i morto pa medio di piká, i asina morto a pasa pa tur hende pasobra nan tur a peka.”—Romanonan 5:12.

    Na kontraste, e morto di Hesus no solamente a kita e mancha di piká pero tambe e sentensia di morto pa tur hende ku pone fe den dje. Beibel ta resumí e asuntu di e manera akí: “Meskos ku piká a reina komo rei huntu ku morto, asina tambe bondat inmeresí por reina komo rei mediante hustisia ku ta hiba na bida eterno pa medio di Hesukristu, nos Señor.”—Romanonan 5:21.

    Naturalmente, ainda nos niun no por biba pa semper. Sinembargo, Dios ta primintí ku lo e duna hende hustu bida eterno i ku lo e resusitá hende morto pa asina nan por benefisiá di Hesus su sakrifisio di reskate.​—Salmo 37:29; 1 Korintionan 15:22.

3.   Hesus “a bira obediente te na morto,” i asina el a proba ku un hende por keda fiel na Dios bou di kualke tèst òf prueba.—Filipensenan 2:8.

    Apesar ku Adam tabatin un mente i kurpa perfekto, el a desobedesé Dios pasobra e tabatin un deseo egoista pa algu ku no a pertenesé na dje. (Génesis 2:16, 17; 3:6) Despues, Dios su enemigu di mas grandi, Satanas, a bisa ku niun hende lo no obedesé Dios si no ta pa deseonan egoista, foral nò si nan bida ta den wega. (Yòb 2:4) Sinembargo, e hòmber perfekto Hesus a obedesé Dios i a keda leal na dje i a asta muri un morto bergonsoso i doloroso. (Hebreonan 7:26) Esaki a mustra di unabes i pa semper ku hende por keda fiel na Dios bou di kualke tèst òf prueba.

Pregunta tokante e morto di Hesus

•   Dikon Hesus mester a sufri i muri pa salba humanidat? Dikon Dios no a djis kanselá e sentensia di morto?

   E lei di Dios ta bisa ku “e salario ku piká ta paga ta morto.” (Romanonan 6:23) En bes di skonde e lei akí for di Adam, Dios a bis’é ku e kastigu pa desobedensia lo ta morto. (Génesis 3:3) Ora Adam a peka, Dios, “kende no por gaña,” a ten’é na su palabra. (Tito 1:2) Adam a pasa no solamente piká pa su desendientenan, sino tambe e pago di piká, esta, morto.

   Aunke hende pekadó meresé e kastigu di morto, Dios a duna nan ‘e rikesa di su bondat inmeresí.’ (Efesionan 1:7) Dios su provishon pa salba humanidat, mandando Hesus komo un sakrifisio perfekto, tabata sumamente hustu i miserikòrdioso.

•   Ki ora Hesus a muri?

   Hesus a muri mas o ménos 3 or di atardi riba dia di e Pasku Hudiu. (Marko 15:33-37) Di akuerdo ku nos kalènder, e fecha ei ta korespondé ku djabièrnè, 1 di aprel di aña 33.

•   Unda Hesus a muri?

   Hesus a ser ehekutá na un lugá ku “nan ta yama Lugá di Karpachi, ku na hebreo yama Gólgota.” (Huan 19:17, 18) Den tempu di Hesus, e lugá akí tabata “pafó di porta di e stat” di Herúsalèm. (Hebreonan 13:12) Kisas e tabata riba un seru, pasobra Beibel ta bisa ku tabatin algun hende ku tabata wak e ehekushon di Hesus “for di un distansia.” (Marko 15:40, Beibel Santu) Sinembargo, no por bisa ku siguridat unda presis Gólgota tabata keda.

•   Kon Hesus a muri?

   Aunke hopi hende ta pensa ku Hesus a ser krusifiká, esta, matá na un krus, Beibel ta bisa ku Hesus a ser kologá na un staka, òf palu. (Echonan 5:30). E eskritornan di Beibel a usa dos palabra griego pa referí na e instrumento ku nan a mata Hesus na dje: staurós ku xýlon. Hopi eksperto a konkluí ku e palabranan akí ta referí na un staka, òf balki, di palu pará règt.

•   Kon nos mester rekordá e morto di Hesus?

   Riba e anochi di e Pasku Hudiu anual, Hesus a reuní ku su siguidónan i a instituí un manera simpel pa rekordá su morto i a bisa nan: “Sigui hasi esaki na mi memoria.” (1 Korintionan 11:24) Despues di algun ora, nan a mata Hesus.

   E eskritornan di Beibel a kompará Hesus ku e lamchi ku nan a sakrifiká riba e dia di Pasku. (1 Korintionan 5:7) Meskos ku e selebrashon di Pasku a kòrda e israelitanan ku nan a ser librá for di sklabitut, asina tambe, e Konmemorashon di e morto di Hesukristu ta kòrda kristiannan ku nan a ser librá for di piká i morto. E hudiunan tabata selebrá e Pasku tur aña riba 14 di nisan segun e kalènder lunar. Di igual manera, e kristiannan di promé siglo a konmemorá e morto di Hesus un biaha pa aña.

   Tur aña, miónes di hende rònt mundu ta konmemorá e morto di Hesus riba e fecha ku ta korespondé ku 14 di nisan.