Algun investigadó ta bisa ku kachó por usa nan olfato pa haña sa edat, sekso i beis di otro kachó. Bo por asta entrená kachó pa detektá material eksplosivo i droga. Hende ta usa prinsipalmente nan bista pa haña sa kiko ta pasa rònt di nan, pero kachó ta usa nan olfato pa sa esei. Ta komo si fuera nan ta “mira” ku nan nanishi.

 Pensa riba esaki: Kachó su olfato ta muchu mas mihó ku esun di nos. Segun U.S. National Institute of Standards and Technology, kachó por hole konsentrashon masha chikitu di un supstansia. Bo por kompará esei ku un persona ku por sinti e sabor di mitar telep di suku ku nan a basha den un pisina di tamaño olímpiko.

 Dikon kachó por hole asina bon?

•   Kachó su nanishi ta muhá, p’esei ta mas fásil pa e detektá parti masha chikitu di holó.

•   Kachó su nanishi tin dos kanal di airu—un pa hala rosea i un pa hole. Ora kachó ta buska un holó, airu ta pasa bai na e parti den su nanishi kaminda tin e sèlnan ku ta detektá holó.

•   E parti den kachó su nanishi ku ta responsabel pa detektá holó ta mas o ménos 130 centimeter kuadrá. Di un hende ta solamente 5 centimeter kuadrá.

•   Kompará ku nos nanishi, un kachó su nanishi tin 50 bes mas tantu sèl ku ta detektá holó.

 Esei ta pone ku kachó por distinguí e diferente komponentenan di un holó ku ta konsistí di vários ingrediente. Por ehèmpel, nos ta sinti holó di un sòpi, pero segun algun eksperto, un kachó ta hole kada un di e ingredientenan ku tin den e sòpi.

 Algun eksperto di un instituto ku ta investigá kanser ku yama Pine Street Foundation ta bisa ku kachó su selebro i nanishi ta traha huntu pa forma “un di e detektornan di holó mas sofistiká ku tin na mundu.” E sientífikonan ta hasiendo esfuerso pa krea “nanishi” elektróniko ku por detektá material eksplosivo, kontrabanda i malesa manera kanser.

 Kiko abo ta pensa? Olfato di kachó ta kasualidat òf diseño?