Mi a nase na Calgary, un stat na provinsia di Alberta, Canada. Mi mayornan a divorsiá ora mi tabata chikí, i ami ku mi mama a bai biba serka mi welo i wela part’i mama. Nan tabata stima nos mashá, i mi tabata un mucha masha felis. Ainda mi ta kòrda e dushi tempu ku mi a pasa na chikí.

 Pero, mi bida a kambia drástikamente ora mi tabatin shete aña. Mi mama a bolbe kasa ku mi tata, i nos a bai biba na Merka, na e stat St. Louis, Missouri. Ta djis despues di esei, m’a bin ripará kon kruel mi tata tabata. Por ehèmpel, ora mi a yega kas despues di e promé dia na mi skol nobo, el a komprondé ku nan a pèst mi na skol i ku mi no a bringa bèk. El a rabia asina tantu ku el a bati mi pió ku e muchanan na skol! Mi a siña mi lès, i djei padilanti, mi a kuminsá bringa na skol.

 Mi tata su mal karakter a hasi mi mama bira un persona amargá, i tur ora nan tabata pleita masha pisá. Ku mi 11 aña, mi a kuminsá usa droga i bebe alkohòl. Mi a bira mas i mas agresivo i tabata bringa hopi riba kaya. Ya pa tempu ku mi a kaba skol sekundario, mi tabata un persona masha violento.

 Ku mi 18 aña, mi a drenta servisio militar merikano komo marinir. Mi tabata violento kaba, anto einan, mi a siña kon pa mata hende. Despues di sinku aña, mi a bandoná marina i a bai studia sikologia ku e speransa di haña un trabou na FBI. Mi a kuminsá ku mi estudio universitario na Merka. Despues, mi a muda bai biba na Canada i a sigui ku mi estudio einan.

 Na universidat, mi a keda kompletamente desapuntá den hende i den komunidat en general. Hende tabata masha egoista; mi tabata sinti ku nada no tabata bale la pena i tabata komo si fuera no tin solushon pa niun di e problemanan di humanidat. Mi a pèrdè tur speransa ku hende lo por drecha e mundu akí.

 Ora mi a nota ku bida no tin masha propósito, mi bida a kuminsá drei rònt di droga, alkohòl, plaka i sèks. Mi tabata bai di un fiesta pa otro i di un hende muhé pa otro. Debí na mi entrenamentu militar, mi tabata sinti mi fuerte i tabata bringa kada bes. Mi tabatin mi propio norma di loke ta hustu òf inhustu i tabata konfrontá tur persona ku segun mi tabata trata otro hende inhustu. En realidat, mi a bira mas violento ku promé.

 Un dia, ami ku un amigu tabata den bodega di mi kas. Nos tabata bou di influensia pisá di droga i tabata preparando un kargamentu ilegal di mariwana pa bende. Mi amigu a puntra mi si mi ta kere den Dios. Mi a bis’é: “Si ta Dios ta kousa e sufrimentu ku tin na mundu, mi no ke tin nada di hasi kuné!” Wèl, e siguiente dia, ku tabata e promé dia na mi trabou nobo, pa mi sorpresa, un kolega ku tabata Testigu di Yehova a puntra mi: “Bo ta kere ku ta Dios ta kousa e sufrimentu ku tin na mundu?” E pregunta ei a lanta mi interes. Durante e siguiente seis lunanan, nos a kòmbersá hopi, i el a mustra mi Beibel su kontesta riba algun di e preguntanan di mas difísil ku mi tabatin tokante bida.

 E tempu ei, mi tabata biba huntu ku mi namorada. E no tabata ke pa mi kont’é nada di e kosnan ku mi tabata siña. Un djadumingu, mi a bis’é ku mi a invitá e Testigunan pa bin duna mi lès di Beibel na kas. E siguiente dia, ora mi a yega kas for di trabou, mi a nota ku mi namorada a piki tur kos den kas i a bai laga mi. Mi a sali bai pafó i a basha na yoramentu. Mi a hasi orashon i a roga Dios yuda mi. Esei tabata e promé bes ku mi a usa Dios su nòmber personal, Yehova, den orashon.—Salmo 83:18, NWT.

 Dos dia despues, mi a kuminsá studia Beibel ku un pareha Testigu di Yehova. Despues ku nan a bai, mi a sigui e lesa e buki Bo por biba pa semper den Paradijs riba tera, i a kaba di les’é kompleto e anochi ei mes. a Loke mi a siña tokante Yehova Dios i su Yu, Hesukristu, a konmové mi kurason. Mi a komprondé ku Yehova tin kompashon i ta sinti doló ora nos ta sufri. (Isaías 63:9) Loke mas a konmové mi ta e amor ku Dios tin pa mi i e sakrifisio ku su Yu a hasi pa mi. (1 Huan 4:10) Mi a komprondé ku Yehova tabatin masha pasenshi ku mi “pasobra e no ta deseá pa ningun hende ser destruí, ma e ta deseá pa tur haña chèns di arepentí.” (2 Pedro 3:9) Mi a sinti ku Yehova tabata hala mi serka di dje.—Huan 6:44.

 E siman ei mes, mi a kuminsá bishitá e reunionnan. Mi tabatin kabei largu, renchi orea i un aparensia ku lo a spanta kualke hende, pero e Testigunan a trata mi komo si fuera mi tabata un famia ku nan tabatin basta tempu sin mira. Nan a aktua manera berdadero kristian. Mi a sinti komo si fuera mi a yega kas di mi welo i wela atrobe, pero ku un ambiente muchu mas mihó.

 Ku tempu, loke mi tabata siña den Beibel a kuminsá kambia mi bida. Mi a pela mi kabei, stòp ku tur práktika seksual inmoral, stòp di usa droga i stòp di bebe di mas. (1 Korintionan 6:9, 10; 11:14) Mi kier a agradá Yehova. Pues, ora mi a siña ku e no ta aprobá sierto kondukta, mi no a buska èksküs pa mi komportashon. Al kontrario, mi a sinti mi hopi malu. Mi tabata bisa den mi mes: ‘Mi no por hasi e kos ei mas.’ Mesora, mi tabata purba di kambia mi manera di pensa i di aktua. Poko tempu despues mi a kuminsá sinti kiko ta e benefisionan di hasi kos manera Yehova ke. Dia 29 di yüli 1989, seis luna despues ku mi a kuminsá studia Beibel, mi a batisá komo un Testigu di Yehova.

 Beibel a yuda mi kambia mi personalidat. Den pasado, mi tabata reakshoná violentamente kontra un hende agresivo. Pero awor, mi ta hasi mi bèst pa “keda na pas ku tur hende.” (Romanonan 12:18) No ta ku mi mes forsa mi a logra esei. Mi ta gradisí Yehova pa e poder ku su Palabra i su spiritu santu tin pa yuda hende kambia nan bida.—Galationan 5:22, 23; Hebreonan 4:12.

 Awor, na lugá di laga violensia, droga i deseo inmoral dominá mi, mi ta hasi esfuerso pa agradá Yehova i dun’é lo mihó. Mi ta hasi esfuerso tambe pa yuda otro hende konosé Yehova. Algun aña despues ku mi a batisá, mi a bai biba na un otro pais kaminda tin nesesidat di mas hende den e trabou di prediká e bon notisia. Atraves di e añanan, mi tabatin e goso di duna hopi hende lès di Beibel, i mi a mira kon Beibel a kambia nan bida tambe. Mi ta masha kontentu ku mi mama tambe a bira Testigu di Yehova, en parte debí na e kambionan positivo ku el a mira den mi aktitut i kondukta.

 Na 1999, na El Salvador, mi a asistí na e skol ku awe yama Skol pa Predikadó di Reino. E skol ei a siña mi pa bira un mihó predikadó, pa duna siñansa den kongregashon i pa kuida e rumannan den kongregashon. Mas despues den e aña ei, mi a kasa ku Eugenia, mi esposa stimá. Huntu, nos ta sirbi komo predikadó di tempu kompleto na Guatemala.

 Awor, mi bida tin propósito, i mi ta masha felis; mi no ta sinti mi sin speransa mas. Mi ta pone na práktika loke mi a siña den Beibel, i esei a libra mi di inmoralidat seksual i violensia i a duna mi un bida yen di pas i amor.