Despues ku Zarina a batisá na Rusia komo un Testigu di Yehova, el a bolbe na su pais natal den Asia Sentral, i e tabata determiná pa siña su dos yu muhénan e bèrdat tokante Beibel. Debí ku su situashon finansiero no tabata bon, e tabata biba den un apartamento di un kamber huntu ku su mayornan, su ruman hòmber i su ruman hòmber su esposa. E mayornan di Zarina a tah’é pa no siña su yunan tokante Beibel. Nan a bisa e nietanan tambe pa no papia ku nan mama tokante Beibel.

 Zarina a pensa profundamente kon pa yuda su yunan siña tokante Yehova. (Proverbionan 1:8) El a hasi orashon ferviente na Yehova i a pidié guia i sabiduria. Despues Zarina a hasi konforme su orashon i ora e tabata bai kana ku su yunan, e tabata papia ku nan tokante e maravianan di kreashon. Segun ku nan tabata kana huntu, Zarina tabata yuda su yunan haña interes den e Kreador.

 Despues, Zarina a pensa un manera pa sigui lanta e interes ei den su yunan usando e buki Kiko Beibel ta Siña Realmente? a E tabata skirbi algun paragraf i pregunta di e buki over, palabra pa palabra, riba vários pida papel. Zarina tambe tabata pone algun frase aserka pa yuda su yu muhénan komprondé e informashon mas mihó. Despues e tabata skonde e papelnan huntu ku un pòtlot bou di e wasmashin den baño. Ora e yu muhénan tabata den baño, nan tabata lesa e paragrafnan i skirbi nan kontestanan.

 Usando e método akí, Zarina a logra studia dos kapítulo di e buki Beibel ta Siña ku su dos yunan promé ku nan a logra haña un otro kaminda pa biba. Ei, e por a siña su yunan sin nada ku por a strob’é. Tur dos yu muhé a batisá na òktober 2016 i nan tabata kontentu ku nan mama a usa sabiduria i disernimentu pa eduká nan den sentido spiritual.