Durante holokousto, òf e periodo di Segundo Guera Mundial, tabatin 35.000 Testigu di Yehova na Alemania i na e paisnan bou di mando di e régimen nazi. Mas o ménos 1.500 di e Testigunan ei a muri durante e tempu ei. Nos no sa kon nan tur a muri. Ainda tin hende ta investigá loke a pasa durante e periodo di Segundo Guera Mundial. P’esei, algun di e sifranan i otro detaye den e artíkulo akí por kambia ku tempu.

•  Kon algun Testigu di Yehova a muri?

•  Dikon e Testigunan a ser persiguí?

•  Unda nan a muri?

•  Informashon tokante algun Testigu di Yehova ku a ser ehekutá

•   Ehekushon: Kasi 400 Testigu di Yehova a ser ehekutá na Alemania i na e paisnan ku tabata bou di mando di e régimen nazi. Mayoria di e Testigunan ei a ser sentensiá na morto den korte, i despues nan a ser dekapitá. Algun di e Testigunan a ser ehekutá sin un kaso den korte. Nan a ser horká òf tirá mata (fusilá).

•   Enkarselá den kondishon ekstremo: Mas ku 1.000 Testigu di Yehova a muri den kampo di konsentrashon i prizòn nazi. Algun di e Testigunan ei a muri di kansansio pasobra e trabounan ku nan a ser fòrsá pa hasi tabata muchu pisá pa nan. Ademas, algun di e Testigunan a muri pa motibu di tortura, hamber, friu, malesa òf pa falta di kuido médiko adekuá. Ademas, na final di Segundo Guera Mundial, algun di e Testigunan a muri poko despues ku nan a ser liberá. Nan a muri pa motibu di maltrato kruel.

•   Otro kousa di morto: Algun Testigu a muri den kamber ku a ser yená ku gas. Algun Testigu a ser fòrsá pa partisipá den eksperimento ku remedi òf eksperimento ku tratamentu médiko. I algun Testigu a muri pa motibu ku nan tabata pasa nan angua pa mata nan.

 Testigunan di Yehova a ser persiguí pasobra nan tabata obedesé loke Beibel ta bisa. Ora ku e gobièrnu nazi tabata ke fòrsa e Testigunan pa hasi kos ku ta bai kontra Beibel, e Testigunan a nenga di hasi esei. E Testigunan a skohe pa “obedesé Dios na promé lugá, i no hende.” (Echonan 5:​29) Laga nos analisá dos manera ku nan a demostrá esei.

1.   Nan a keda neutral den asuntu polítiko. E Testigunan di Yehova ku tabata biba bou di e régimen nazi tabata neutral den asuntu polítiko meskos ku tur Testigu di Yehova den e tempu akí. (Huan 18:36) P’esei, nan no a . . .

   •   sirbi den servisio militar ni apoyá e guera den ningun manera.​—Isaías 2:4; Mateo 26:52.

   •   vota den elekshon ni djòin ningun organisashon nazi.​—Huan 17:16.

   •   saludá suástika òf bisa “Heil Hitler!”​—Mateo 23:10; 1 Korintionan 10:14.

2.   Nan a sigui praktiká nan fe. Testigunan di Yehova a ser prohibí di praktiká nan fe. Apesar di esei, nan . . .

   •   a sigui tene reunion pa hasi orashon i adorá Dios huntu.​—Hebreonan 10:24, 25.

   •   a sigui prediká e mensahe di Beibel i kompartí literatura bíbliko ku otro hende.​—Mateo 28:19, 20.

   •   a sigui mustra bondat na nan próhimo, inkluso hende ku ta hudiu.​—Marko 12:31.

   •   no a renunsiá nan fe; nan a nenga di firma un dokumento ku ta bisa ku nan lo stòp di ta un Testigu di Yehova.​—Marko 12:30.

 Robert Gerwarth, un profesor di historia, a bisa ku Testigunan di Yehova ta e úniko grupo bou di e gobernashon nazi ku a ser persiguí eksklusivamente pa motibu di nan kreensianan religioso. a E prezunan ku tabata den kampo di konsentrashon huntu ku e Testigunan tabata atmirá e Testigunan pasobra nan no tabata renunsiá nan fe. Un persona di Austria ku tabata den un kampo di konsentrashon a bisa: “Nan no ta bringa den guera. Nan tabata preferá di muri na lugá di mata un hende den guera.”

•   Kampo di konsentrashon: Mayoria di Testigu di Yehova a muri den kampo di konsentrashon. Nan a ser enkarselá den, entre otro, e siguiente kamponan di konsentrashon: Auschwitz, Buchenwald, Dachau, Flossenbürg, Mauthausen, Neuengamme, Niederhagen, Ravensbrück i Sachsenhausen. Informashon verídiko ta indiká ku mas o ménos 200 Testigu di Yehova a muri na e kampo di konsentrashon di Sachsenhausen.

•   Prizòn: Algun Testigu di Yehova a muri despues ku nan a ser torturá den prizòn. Algun otro Testigu a muri di herida ku nan a sufri durante interogashon.

•   Lugá di ehekushon: Mayoria di Testigu di Yehova a ser ehekutá na prizòn na Berlin-Plötzensee, na Brandenburg i na Halle/Saale. Ademas, tin dokumento ku ta konfirmá ku tin mas o ménos 70 otro lugá ku Testigunan di Yehova a ser ehekutá.

•  Nòmber: Helene Gotthold

   Lugá di ehekushon: Plötzensee (Berlin)

   Helene tabata kasá, i e tabatin dos yu. El a ser arestá vários biaha. Na aña 1937, el a pèrdè barika pa motibu di e maltrato severo ku el a haña. Dia 8 di desèmber 1944, Helene a ser dekapitá pa medio di guiotina na un prizòn na Plötzensee, Berlin.

•  Nòmber: Gerhard Liebold

   Lugá di ehekushon: Brandenburg

   Gerhard tabatin 20 aña di edat ora el a ser dekapitá dia 6 di mei 1943. Esei tabata dos aña despues ku su tata a ser dekapitá na mesun prizòn. Gerhard a skirbi e siguiente karta pa su famia i komprometida: “Si no tabata pa poder di Señor, lo mi no por ta determiná pa enfrentá pena di morto.”

•  Nòmber: Rudolf Auschner

   Lugá di ehekushon: Halle/Saale

   Rudolf tabatin 17 aña di edat ora ku el a ser dekapitá dia 22 di sèptèmber 1944. Den e último karta ku el a skirbi su mama promé ku su morto, el a bisa: “Hopi ruman a enfrentá pena di morto promé ku mi, awor ami tambe ta bai sigui den nan pasonan.”