NGAR er a taem er a Biblia, e a mesiou a uluungerachel er a blil me a lechub e ngkloklel a ta er a chad. A tekoi er a Hebru me a Grik el moiuid el “mesiou” a lebebil er a taem e ngmelekoi el kirel a chad el oungerachel me a lechub e ngtebechelel a blai.

A Josef el ngelekel a Jakob, er a lesibai er a Ekipten, e ngmlo mesiou el ngar er a blil a mastang er ngii. A mastang er ngii el chad er a Ekipten a “ulterekokl a rokui el kloklel er a Josef me bo longedmokl.” (Gen. 39:2-6) E a uriul, e ngii el Josef a mlo klou a klisichel el mengedereder er a beluu er a Ekipten, e dirrek el millutk er a mesiou el mo oungerachel er a blil.​—Gen. 44:4.

Ngar er a taem er a Jesus, e tirke el mla er ngii a chetemir a kiliei er a mats el cheroid er a sersir. Me te millutk er a remesiou el mo oungerachel a ureor er a sersir.

Me ngtechang a rredemelel tia el deruchall er a omesiou? Sera taem er a rechapostol, e a chad er a Rom el chad er a omeluches el Columella a milsaod el kmo, a sibai el mo er tia el deruchall er a mo mesiou a kirel el chad el mla “mesuub el mo ungil meruul a ureor.” Ngkirel el chad el “ulemes el kmo a rechad er a ureor a rirekui a urerir engdi ngdiak lemeringel a tekingel.” Ngdirrek el millekoi el kmo: “E sel klou a ultutelel el tekoi el kirel a mesiou a kmo, ngdiak el kirel lomdasu el kmo ngmedengei a rokui el tekoi, e dirrek el kirel el mesuub a beches el tekoi.”

A Tekingel a Dios a ousbech er a okesiu er a mesiou me a urerel el mesaod a bebil er a ureor el meketmokl er a chelsel a ongdibel er a Rekristiano. El ua tiang, a apostol Petrus a millisiich er a Rekristiano el mo ousbech a duch er tir el lebilsterir a Dios el mo “kesiou, el ua ungil tebechelel a bek el bedengel a grazia er a Dios.”​—1 Pe. 4:10, BT.

A Jesus a milsaod el kirel a mesiou el ngar er a okesiu el llechukl er a Lukas 16:1-8. Ngdirrek el ngar er a ulaoch el kirel a demiel el King, e ngmillisiich er a rultirakl er ngii el kmo ngmo tutkii a “blak a rengul e mellomes a rengul el mesiou” me a lechub a “blak a rengul mesiou.” A klou el ngerechelel ngika el mesiou a mo mesterir a rultirakl er a Kristus a rokui el kall er a klereng el lousbech er a taem er a ulebongel. (Mt. 24:45-47; Lk. 12:42) Kede mera el oba omereng el saul el sebechel a blak a rengul mesiou el kutmokl a babier el kired el rokui.