1-2. Ngera ungil loruul er ngii a ruungalek sel loker er tir a ngelekir el kirel a Dios me a Biblia?

 TE BETOK a mo kongei el kmo, ngmeringel lureor a domekeroul er a rengalek. A lsekum koungalek, e aki kmal chemat er kau el meringel loureor el lolengeseu er a ngelekem el toketekii a mesisiich el klaumerang er ngii. (Dut. 6:​6, 7) Sel lorael el mo klou a ngelekem e nglocha mo oker el kirel a klaumerang er kid, el ua ngera uchul me ngngar ngii a ileakl el tekoi el Jehovah diak el soal a doruul.

² A uchelel e aika el keril a locha rullau el mo bekikl el kmo ngika ngesonges a klaumerang er ngii er a Dios me a Biblia. Me nguaisei engdi rengalek sel lorael el mo meklou e ngkirir loker a ker me bo lsebechir el smisiich a klaumerang er tir. (1 Ko. 13:11) Lak obekikl, ngbai sebechem lomes aika el keril a ngelekem el techall el ngosuir el mo meduch el melatk a tekoi.

3. Ngera kede mo mesaod er tia el suobel?

³ Ngar tia el suobel e kede mo mesaod er a rolel e a ruungalek a sebechir el ngosuir a ngelekir me a lechub e te rengelekir el (1) mo er ngii a mesisiich el klaumerang er tir er a Dios me a Biblia, (2) mo oba omereng el saul el kirel a llechul a Dios el kirel a ungil me a mekngit, e (3) mo meduch el mesebechakl er a klaumerang er tir.

MNGESUIR A NGELEKEM EL MO ER NGII A MESISIICH EL KLAUMERANG ER NGII ER A DIOS ME A BIBLIA

4. Ngera el ker a locha bo loker a ngalek, e ngerang?

⁴ A Rekristiano el loungalek a medengei el kmo tir el loumerang er a Dios a diak el belkul a kmo, a ngelekir a mo oumerang  er ngii el dirrek. Kau a dimlak mechell el ngar ngii a klaumerang er kau er a Jehovah me a ngelekem me ngdirrek. Cherengel a taem e a ngelekem a locha mo oker a ker el ua: ‘Ak mekera mo medengei el kmo ngngar ngii a Dios? Ngmera el sebechek loumerang aike el lolekoi a Biblia?’ Me a Biblia dirrek el melisiich er kid el mo ousbech er a ‘klisichel omelebedebeked’ e mo ‘merriter a rokui el tekoi.’ (Rom 12:​1, NW; 1 Th. 5:21) Engdi ngmekera omngesuir a ngelekem el smisichii a klaumerang er ngii?

5. Ngera sebechir a ruungalek el meruul el ngosuir a ngelekir el toketekii a klaumerang er tir er a Biblia? (Rom 12:​2, NW)

⁵ Molisiich er a ngelekem me di lengii el prove el mo er ngii el kmo a Biblia klemerang. (Monguiu er a Rom 12:​2, NW. a) A ngelekem sel loker a ker, e ngtechellem el lochotii er ngii a rolel e ngsebechel metik a nger er ngii lousbech aike el dongu er kid el kirel a research el ua Watch Tower Publications Index me a Research Guide for Jehovah’s Witnesses. Ngsebechel mora Research Guide e omes er cheungel a “The Bible,” e omes er a “Inspired by God” el mo metik aike el lochotii el kmo, a Biblia diak di lungil book el lulluches er ngii a rechad. Ngbai “meral tekingel a Dios.” (1 Th. 2:13) El ua tiang, ngsebechel research el kirel a Ninive el beluu er a Asiria er a irechar. A ngar er a mong e te mla er ngii a rebebil el chellimosk er a Biblia el dilu el kmo ngdimlak a ta lengar ngii a mats er a Ninive. Engdi ngngar aike el rak er a 1850 e te kiliis a olechotel tia el mats, lomeketakl er ngii el kmo a Biblia melemalt omesodel. (Sef. 2:​13-15) A lsoal a lmuut el komakai lomesodel a rolel e a temellel a beluu er a Ninive uleltaut a ulaoch er a Biblia, e ngsebechel lomes er a “Ke Medengei el Kmo Ngerang?” el suobel el ngar er a November 2021 el Ongkerongel. A ngelekem sel lomekesiu aike el lesuub er aika el babilenged er aike el lebetik er a encyclopedia me a source el sebeched el loumerang, e ngmo smisichii a klaumerang er ngii er aike el lolekoi a Biblia.

6. Ngmekera sebechir a ruungalek el mekengii a uldesuel a ngelekir? Mochotii a ta er a example. (Dirrek el momes er a siasing.)

⁶ Bekengii a uldesuel a ngelekem. A ruungalek a betok a techellir el mo mengedecheduch er a ngelekir el kirel a Biblia me a lechub e ngklaumerang er a Dios. Aika el techall a mo er ngii sel lsekum te mora museum, park, garden, me a lechub e ngta er a exhibit er a branch office er a Resioning er a Jehovah. El ua tiang, sel om tour er a museum me a lechub e ko meruul er ngii el virtually, e ngsebechem lochotii er a ngelekem a klalo me a lechub e ngtekoi er a ngar er a mong  el sebechel smisichii a klaumerang er ngii el kmo aike el lolekoi a Biblia a klemerang. A ngelekem, ngmedengei el kmo a ngklel a Dios a llechukl er a bad er a 3,000 el rak er a mla me mong el lokedongall el Moabite Stone? Ngsebechiu el mesa tia el bad er a Louvre Museum el ngar er a beluu er a Paris, France. Ngdirrek el ngar ngii a kata er tia el Moabite Stone el ngar er a display er a “The Bible and the Divine Name” el exhibit el ngar er a World Headquarters er a Resioning er a Jehovah er a Warwick, New York. Tia el bad ochotii el kmo a King Mesa er a Moab a mlo omtok er a Israel. E tia oltirakl aike el lolekoi a Biblia. (2 Ki. 3:​4, 5) A ngelekem sel leues er a medal a evidence el lochotii el kmo a Biblia melekoi a klemerang e kmal accurate, e a klaumerang er ngii a lmuut el mo mesisiich.—Momekesiu er a 2 Kronika 9:6.

7-8. (a) Ngera sebeched el suub er aike el kakerous el pattern el deues er a bleob? Mochotii a ta er a example. (Dirrek el momes er a siasing.) (b) Ngera el ker a sebechel ngosuir a ngelekem el smisichii a klaumerang er ngii er a Ulemeob?

⁷ Molisiich er a ngelekem el mo melatk aike el bla lebeob a Jehovah. Sel morael er a honto el beluu me a lechub e ngsers, e mngesuir a ngelekem el mo melatk a pattern el deues er a bleob. E ngerang? Aika el pattern ochotii el kmo ngngar ngii a kmal mellomes a rengul el mle design aikang. El ua tiang, a re scientist a mla mo betok el rak el losuub a spiral pattern. A ta er a scientist el ngklel a Nicola Fameli a melekoi el kmo sel momechur a ildisel a spiral pattern er a bleob e ke mo metik osisiu el pattern er a ochur. Aika el ochur okedongall el Fibonacci sequence. Ngsebechem el metik a spiral pattern er a betok el tekoi el ua katelengel a bebil galaxy me a pattern er a kai, llel a dellomel, me a bngal a sunflower. b

⁸ A ngelekem sel losuub a lmuut el betok er a class er ngii er a science, e ngmo suub a lmuut el bebil er a pattern er a bleob. El ua tiang, derta el snowflake a meruul er a osisiu el shape el di repeat a pattern er ngii. Tia el pattern okedongall el fractal. Fractal pattern a dirrek el debetik er a lmuut el bebil er a bleob. Engdi ngtecha rirellii me aika mlo rruul er a osisiu el pattern? Ngtecha ngike el mle kerekikl el meruul e olterekokl el mo uaisei? A ngelekem sel lebo el dmolech el melatk aika el ker e ngulterekokl el ngosuir el toketekii a mesisiich el klaumerang er ngii er a Dios el mileob a rokui el tekoi. (Heb. 3:4) A ngelekem sel lorael el mo klou e ngklou a ultutelel omngesuir el mo mtebengii a uchul me ngklou a ultutelel a lolengesenges a llechul a Dios. Ngsebechem el meruul er tiang loeak omoker er ngii el kmo, “A lsekum a Dios ulemeob er kid, omomdasu e ngmedengei a kot lungil ulekrael el doltirakl e kede metik er a deurreng?” Ngsebechem el louchais er ngii el kmo kede metik aika el ulekrael er a Biblia.

 MNGESUIR A NGELEKEM EL MO OBA OMERENG EL SAUL EL KIREL A LLECHUL A DIOS EL KIREL A UNGIL ME A MEKNGIT

9. Ngera uchul me a ngalek a locha mo oker el kirel a llechul a Dios el kirel a ungil me a mekngit?

⁹ A lebebil e a ngelekem a locha mo oker el kirel a tekoi el Biblia kmo ngmekngit. Molasem el mo medengelii a uchul me ngoker. Ngika ngdiak lekengei aike el lolekoi a Biblia el kirel a ungil me a mekngit me a lechub ngdi metitur el mesaod a klaumerang er ngii el mora rebebil? Ngii di el ta er a uchul me ngsebechem el ngosuir a ngelekem el mo oba omereng el saul el kirel a llechul a Dios el kirel a ungil me a mekngit loeak omosuub er a Mkiei el Mo Cherechar! lobengkel. c

10. Ngmekera sebechem el ngosuir a ngelekem el mo melatk er a deleuill er ngii me a Jehovah?

¹⁰ Molisiich er a ngelekem el mo mengreos er a deleuill er ngii me a Jehovah. Sel mosuub a Biblia lobengkel a ngelekem, e mousbech aike el ker me a okesiu el ngar er a Mkiei el Mo Cherechar! el melasem el mo medengelii a uldesuel. (Osi. 20:5) El ua tiang, a 8 el suobel omekesiu er a Jehovah el mora ungil friend el lomeskid a uleklatk el sebechel protect er kid e mo uchul a klungioled. A uriul er a omosaod er a 1 Johanes 5:​3, e ngsebechem el loker, “Sel dodengei el kmo a Jehovah a kmal lungil el Friend, e ngkirel el mo uangerang osenged el kirel aike el lolekoi er kid el meruul?” Tia locha kora kmal beot el ker engdi sel moker er ngii er a ngelekem e ngsebechel ngosuir el mo omes a llechul a Dios el lolechotel a bltkil a rengul el mei er kid.—Isa. 48:​17, 18.

11. Ngmekera sebechem el ngosuir a ngelekem el mo oba omereng el saul el kirel omellach er a Biblia? (Osisechakl 2:​10, 11)

¹¹ Mosaod er a rolel e a omellach er a Biblia a uchul a klungioled. Sel omdak el menguiu er a Biblia me a lechub e ng days text e mosaod er a rolel e a omellach er a Biblia mla ngosuir a telungalek er kau. El ua tiang, a ngelekem ngmesa klungiolel a demeringel loureor e bo de honest? (Heb. 13:18) Ngdirrek el sebechem smodii a rolel e a doltaut omellach er a Biblia a protect er a bedenged, uldesued, me a rengud. (Osi. 14:​29, 30) Sel mosaod aika el omellach el mora ngelekem e ke ngosuir el mo soal loltaut a ulekrael er a Biblia.—Monguiu er a Osisechakl 2:​10, 11.

12. Ngmekera ta el chedam e olengeseu er a ngelekel el mo mesa klungiolel a doltirakl omellach er a Biblia?

¹² A chedam el Steve er a France a smodii a rolel e ngii me a bechil olengeseu er a Ethan el teenage el ngelekir el mo mesa el kmo Jehovah a meruul a llach lengii el betik a rengul er kid: “Aki oker er ngii a ker el uai a, ‘Ngera uchul me a Jehovah soal a doltirakl omellach er ngii? Tia ngmekera ochotii el kmo ngbetik a rengul er kid? Ngera mo duubech okmo ngdiak moltirakl er tia el omellach?’” Chouaika el cheldecheduch a mla ngosuir a Ethan el remuul a llechul a Jehovah el mo llechul. A Steve a dochelir el kmo: “A turrekong er kemam a olengeseu er a Ethan el mo mesa el kmo a llomeserreng er a Biblia a kmal ngarbab er a llomeserreng er a rechad.”

13. Ngmekera sebechir a ruungalek el train er a ngelekir el mo oltaut omellach er a Biblia? Mochotii a ta er a example.

¹³ Em train er a ngelekem el mo oltaut omellach er a Biblia. A ta er a techall el sebechem el train er a ngelekem a sel lebo er ngii a project er a skuul el mo kirel menguiu er a book. Tia el book a locha ngar ngii a re characters er ngii el meruul a deleboes e violent. Engdi tia el book a remuul aika el tekoi el mo ua lak el mekngit e rullii a chad el menguiu el mo soal mo uai tir. Ngsebechem el melisiich er a ngelekem el mo melatk er a osengel a Jehovah el kirel a rechad el meruul e melekoi aika el omerellir tirka el characters er a book. (Osi. 22:​24, 25; 1 Ko. 15:33; Fil. 4:8) Tia locha mo ngosuir me sel bo loker er ngii a sensei me a rengalek er a skuul er  a uldesuel el kirel a book e ngsebechel lousioning el mo er tir.

EM PREPARE ER A NGELEKEM EL MO MESEBECHAKL ER A KLAUMERANG ER NGII

14. Ngera el subject a locha mo rullii a kekerei el Kristiano el mo medakt, e ngerang?

¹⁴ A remekekerei el Kristiano a lebebil e ngdiak a confidence er tir el mesebechakl er a klaumerang er tir. Te locha mo medakt sel lebo el kirir el mesaod er a uchul me ngdiak loumerang er a evolution. E ngerang? A resensei er tir a locha olisechakl el kmo a evolution a klemerang. A lsekum ke oungalek, e ngmekera sebechem el ngosuir a ngelekem el mo ulterekokl a rengul er aike el loumerang?

15. Ngera sebechel ngosuir a kekerei el Kristiano el mo ulterekokl a rengul er aike el loumerang?

¹⁵ Mngesuir a ngelekem el mo ulterekokl a rengul er aike el loumerang. A ngelekem a diak el kirel mo merur lengii loumerang el kmo ngngar ngii a Ulemeob. (2 Ti. 1:8) E ngerang? E le mo lmuut er a re scientist me te diak loumerang el kmo a klengar a di mle kiul el mo er ngii. Tirka el scientist a mes aike el ochotii el kmo ngngar ngii a mellomes a rengul el mileob aika el kmal chetituokel el ngar louteliil. Sei a uchul me ngdiak loumerang er a osisechakl er a evolution el lolisechakl er ngii er a betok el skuul el meliuekl er a beluulechad el rokir. Ngsebechem el ngosuir a ngelekem el smisichii a klaumerang er ngii me a blekengel sel bo lodengei aike el ulelterekokl a rengrir a rudam me a rudos el kmo, ngngar ngii ulemeob er a klengar. d

16. Ngmekera sebechir a ruungalek el ngosuir a ngelekir el mesebechakl er a klaumerang er ngii er a Ulemeob? (1 Petrus 3:15) (Dirrek el momes er a siasing.)

¹⁶ Em prepare er a ngelekem el mo mesebechakl er a uchul me ngoumerang el kmo ngngar ngii Ulemeob. (Monguiu er a 1 Petrus 3:15.) Nglocha kmal mo ngosuir omdak el review suobel er a jw.org el mesaod a blebelel a Dios me a evolution. E a ngelekem a sebechel ngiltii a explanation el lomdasu el kmo ngmo ngosuterir a rebebil el mo mtebengii el kmo ngngar ngii a Ulemeob. Em practice er ngii lobengkel. Momeklatk er ngii el kmo ngdiak lousbech el mengaititekangel er a rengalek er a skuul. Molisiich er ngii me a explanation er ngii di le simple e bleketakl a lsekum te ngar ngii a rebebil el sorir el lorrenges. El ua tiang, a ngalek er a skuul a locha mo melekoi el kmo: “Ngak a di oumerang aike el sebechek el mes, e kmal dirkak kisang a Dios.” A kekerei el Kristiano a sebechel dmu er ngii el kmo: “Kam imagine er kau el merael er a oreomel  el kmal cheroid er a lengar er ngii a rechad e mesang a chido el lungil chellades er a bad. E ke mo dmu el kmo ngerang? A lsekum a chido bleketakl lochotii el kmo ngngar ngii a chad el rirellii, e a melidiul me a rokui el ngar a ulterekokl el ngar ngii a mellomes a rengul el mileob!”

17. Ngmekera sebechir a ruungalek el melisiich er a rengelekir el mo osiik a techall el share a klemerang er a Biblia el mora rebebil?

¹⁷ Molisiich er a ngelekem me losiik a techall el share a klemerang er a Biblia el mora rebebil. (Rom 10:10) Ngsebechem lomekesiu omelasem er ngii el share a klaumerang er ngii el mora omelasem el mesuub el ousekool a klekedall er a ongngak. A uchelel e a chad a locha mesuub a chelitakl el beot a dousekool. A cherengel a taem e ngmo beot er ngii el lousekool er a klekedall er ongngak. Ngdi osisiu a uchelel e a kekerei el Kristiano a locha di simple a cheldechedechal sel le share er a klaumerang er ngii el mora rebebil. El ua tiang, ngsebechel loker er a ngalek er a skuul el kmo: “Ke medengei el kmo a re scientist a blechoel el copy a design er aike el leues er a charm me a dellomel? Ka me kuchotii er kau a kmal lungil video.” Uriul er a lochotii a video el ngar er a Was It Designed? el series e ngsebechel dmu el kmo: “A lsekum a scientist a nguu a credit el kirel a design el already e ng exist, e ngtecha kirel nguu a credit el kirel sel original?” Tia el simple el rolel a cheldecheduch a sebechel mekengii a uldesuel ngika el ngalek er a skuul e rullii el mo soal mesuub a lmuut el betok.

MOLEMOLEM LOLENGESEU ER A NGELEKEM EL SMISICHII A KLAUMERANG ER NGII

18. Ngmekera sebechir a ruungalek el melemolem el melisiich er a klaumerang er a ngelekir er a Dios?

¹⁸ Kede kiei er a beluulechad el mui er a rechad el diak a klaumerang er tir er a Jehovah. (2 Pe. 3:3) Me a leuaisei e kemiu loungalek sel mosuub a Biblia lobengkel a ngelekiu e molisiich er ngii me losuub a topic el mo kilungii a respect er ngii er a Tekingel a Dios me a llechul el kirel a ungil me a mekngit. Bekengii a uldesuel loeak omdak el mesaod a blebelel a Jehovah. Mngesuir el mo appreciate a ulaoch er a Biblia el mla tmaut. E a ngaruchei er ngii, moluluuch lobengkel a ngelekem e moluluuch el kirel. Sel moruul el uaisei e ngkmal sebechel mo ulterekokl a rengum el kmo a Jehovah mo omekngeltengat er a blakerreng er kau lolengeseu er a ngelekem el smisichii a klaumerang er ngii.—2 Kr. 15:7.