NGMLA ta el bo er ngii a mondai er kau e dimlak a chad el sebechel ngosukau? Kede kiei er a “blsechel a ringel” el ngii a sebechel rullid el mo mechitechut a rengud e feel el kmo ngkmal di kid el tang. (2 Ti. 3:​1, BT) Me nguaisei, ngsebechel diak di lekid loutekangel a mondai er a klengar. A Biblia a kmo te ngar ngii a remera el sechelid el sebechir el ngosukid “sel bo er ngii a chelebuul.”—Osi. 17:​17, NW.

A resechelil a apostol Paulus el lulebengkel el ngar omerael a kmal ngilsuir er a kakerous el rolel. (Kol. 4:​7-11) A Paulus er a lekelebus er a Rom e a resechelil a ngilsuir er aike el tekoi el dimlak el sebechel el di ngii el kutmokl. El ua tiang, a Epafroditus a ngilai ngeso luleldurokl a rudam me a rudos er a Filipi el mo msang a Paulus. (Fil. 4:18) A Tikikus a ullab a babilengel a Paulus el mora kakerous el ongdibel. (Kol. 4:7; momes er a study note.) Me alta Paulus a mle kelebus el di ngar er a blai e a uriul e ngmlora blil a kelebus, ngoeak a ngelsurir a resechelil e ngmle sebechel melemolem er a omesiungel. Ngmekera sebechem el mo mera el sechelei er chelecha el taem?

A experience er a rudam me a rudos ochotii el kmo ngkmal klou a ultutelel a bo demera el sechelei. Molatk er a odos el lulechotii el kmo ngmera el sechelil a Elisabet el regular pioneer er a Spain. A delal a Elisabet er a lebo el kasinoma e mo mad er a rektel, e a ta el odos a mle text er ngii a betok el message el mengai er a bades el melisiich er ngii. A Elisabet a kmo: “Aika el message a rirellak el mo feel el kmo ngkmal diak di lengak el tang e silsichak er a bek el sils el chobengelii a sils er ngak.”—Osi. 18:24.

Ngsebeched el smisiich a deleuill er kid me a rekldemed er a klemerang loeak sel dolengeseu er tir el mo omerk er a klumech e ngar er a miting. El ua tiang, kau, ngsebechem el offer a ride er a chudelang el odam me a lechub e ngodos el mora miting me a lechub ngodingel? Omoruul el uaisei e ngsebechel mo uchul a klasisiich er a delongeliu. (Rom 1:​12, BT) Me nguaisei, te ngar ngii a rebebil el Kristiano el diak el sebechir el mo cheroid er a blirir. Ngmekera sebeched el mo mera el sechelirir?

A rebebil er a rudam me a rudos er kid a ngar ngii a secherir me a lechub a blekeradel a uchul me ngdiak el sebechir el mei er a miting er a blil a ongdibel. Molatk er a David el mlo smecher el kasinoma. Ngmle betok er a elolem el buil el lolai a chemotherapy. Tiakid el taem e ngii me a bechil er a Lidia a di mlara miting loeak a Internet.

Ngera el support a lengilai er a resechelirir er a ongdibel? Uriul er a miting e a rebebil el ngar er a Blil a Ongdibel a mengedecheduch er tir loeak a videoconferencing. Me a lmuut kung, a David me a  Lidia sel longer er a miting e a uriul e te blechoel el melai omelisiich el text er a rudam me a rudos. Tiang ngerang ngrirellii? A David me a Lidia a mlo feel el kmeed er a rudam me a rudos er tir.

Kid, ngsebeched el melatk er tirke el diak el sebechir el tuobed er a blirir er a rolel a tekoi er a odingel? Ngoeak a mekekerei el omelodech e ngsebeched el lochotii er tir el ngkmo dirkak dobes er tir. (Osi. 3:27) Kau, ngsebechem el schedule a temem lobengterir el mo meruul a letter writing me a lechub ngomerk a klumech lousbech a dengua? Tirke el diak el sebechir el tuobed er a blirir a dirrek el sebechir el ngar er a miting me a miting er a odingel loeak a videoconference. A David me a Lidia kmal oba omereng el saul el mora ongdibel er tir el mirruul er tiang. A David a kmo: “A kedeb el taem lobengkel a group el mo oldingel me a omesaod me a nglunguuch a kmal silisichemam.” Me a lmuut kung a lsekum ng safe e sebechem el kutmeklii a rolel e ke nguu a chad el mosuub lobengkel el mo mesuub er a blil a odam me a lechub e ngodos el diak el sebechel el tuobed er a blil, e ngsebechem el kuk mong e meruul er tiang?

Sel doureor lobengterir a rudam me a rudos er kid el di ngar er a blai e deues er a medad aike el ungil blekerdelir e kede lmuut el mo kmeed er tir. El ua tiang, sel momerk er a klumech lobengterir tirka el rudam me a rudos e mesterir lousbech er a Biblia el rutechii a rengul a chad, e ke locha lmuut el kmal mo kmeed er tir. Sel em support er a rudam me a rudos er kau el ngar er a miting e oldingel, e nglmuut el mo betok a resechelim.—2 Ko. 6:13.

A Paulus a milechelaod a rengul e le sechelil er a Titus a ulebengkel. (2 Ko. 7:​5-7) Tia omeklatk er kid el kmo alta ngungil a dongelaod loeak a tekinged ngdirrek el kmal mo mengelaod er tir sel dongoit a taem el lobengterir e doruul aike el sebeched el lolengeseu er tir.—1 Jn. 3:18.

A rudam me a rudos er kid er a Russia a kutmeklii a klebokel el kerebai er a rolel a de support er a tang me a tang. Molatk er a experience er a Sergey me a bechil er a Tatyana. A rebulis a mle search er a blirir e a uriul e te ngiltiterir el mora blil a bulis e oker er tir a betok el ker. A Tatyana a ble le release er ngii el kot me ngmlo remei. A Sergey a kmo: “Ngdi mlo remei a [Tatyana] e a ta el odos el lulechotii a blekeu a mlei er a blimam. Relmuut el betok el sechelimam a mlei e ngosukemam el kutmeklii a blimam.”

A Sergey a dochelir el kmo: “Ngak a kmal soak a Osisechakl 17:17 (NW) el ngii a melekoi el kmo: ‘A mera el sechelid a olecholt a bltikerreng er a bek el taem, e ta er kid el sechal el mlechell el kirel sel bo er ngii a chelebuul.’ Tia el bades a mla lmuut el mo dmolech a belkul er ngak er tia el taem er a odechelakl el diak sebechek el di ngak el tang loutekangel. A Jehovah mla meskak a resechelik el loba blekeu el lolengeseu er ngak.” a

Kede kmal lousbech er a ngelsurir a resechelid er a chelsel aika el kmal meringel el taem. E lmuut el kmal mo ousbech er tir er a temel a kloul ringel. Me doruul aike el rokui el sebeched er chelechang el mo mera el sechelei!—1 Pe. 4:​7, 8.