A RAK er a rechad er a Hebru er a lengar er a Beluu er a Nglat a ulemuchel er a temel omesib el chutem me a omelalem el dellomel, e tia el taem a dodengelii er chelechang el kmo ng September/​October.

A rechad a milluk a ildisel a sils er a derta el buil er a kalender loltirakl er a buil, el ngii a 29 me a lechub e ng 30 el klebesei a klemengetel. Te milluk er a klemengetel a rak loltirakl er a sils. Me nguaisei engdi a rak loltirakl er a buil a kedeb er a rak loltirakl er a sils. Me ngmle kirir el osiik a rolel e aika el teblong a mo chatter. Te mirruul uaisei loeak sel lolechel a lmuut el bebil er a sils me a lechub e losisebii a lmuut el ta er a buil er a kalender er uchei er a lomuchel ongingil el rak. Ngoeak tiakid el rolel e a kalender er tir a mo chatter er a temel omeridm me a lechub e ngomelalem el dellomel.

Me nguaisei engdi Dios a dilu er a taem er a Moses el kmo a rak er a klechelid omuchel er a buil el Abib me a lechub e ng Nisan el dodengelii er chelechang el March/April. (Exo. 12:2; 13:4) A chedaol el sils el mla er ngii er tia el buil a mle uldimukl er ngii a omeridm el barley.​—Exo. 23:15, 16

A ta el chellimosk el Emil Schürer, a dilu el ngar er a babilengel el The History of the Jewish People in the Age of Jesus Christ, (175 B.C.–A.D. 135) el kmo: “Ngkmal mle beot a bo dodengei el kmo ngoingerang e kede osisebii a lmuut el ta er a buil er a kalender. A Baskua el mle kirir el meruul er ngii er a orakiruu er a buil el Nisan (14 Nisan), a kirel isel sils el ta klemengetel a llomes me a ilkolk. A lsekum e te mtebengii er a ulebengelel a rak el kmo a sils er a Baskua a lomechur er ngii e ngdiak bo lurrebet er tiakid el sils el ta klemengetel a llomes me a ilkolk, e te dochelir a lmuut el ta er a buil er a uchei er a Nisan.”

A Resioning er a Jehovah ousbech er tiakid el rolel sel lolterekokl er a sils er a Chedaol Belsoil er a Rubak, el ngii a urrebet er a Nisan 14 er a kalender er a rechad er a Hebru. Ongdibel el meliuekl er a beluulechad el rokir a di cheroid e te ouchais er tir er tia el date er a Chedaol Belsoil. *

Engdi te milekera rechad er a Hebru e mo medengei el kmo a buil ngomuchel el mo merek er oingerang? Chelecha e ngkmal sebeched el di omes er a babier el kalender me a lechub e ngkalender el ngar er a electronic device er kid. Me nguaisei, a taem er a Biblia dimlak lebeot el uai chelechang.

Sera taem er a Ieleb e a ta el buil a mle 30 el klebesei a klemengetel. (Gen. 7:11, 24; 8:3, 4) A uriul, e a buil er a kalender er a Rechijudea dimlak el ulterekokl el 30 el klebesei. Ngar er a kalender er a rechad er a Hebru e a buil ulemuchel er a tebengel a tabelbuil. Tia 29 me a lechub e ng 30 el klebesei er uriul er a uleak uchei el buil.

A ta el taem e a David me a Jonathan a milsaod el kirel a buil er a kalender el kmo: “A klukuk e ng ungilklebesei er a Tabelbuil.” (1 Sa. 20:5, 18) Me ngngar tia el taem er tir e a buil a di cheroid e te oterekokl. Me nguaisei engdi ngmekera chad er a Israel e medengei el kmo a beches el buil a mla omuchel? A Mishnah, el cheldellel aika el rokui el llecherir me a siukang er a Rechijudea ouchais a bebil omesodel tiang. Ngouchais el kmo sel taem er a lluut el mo remei a rechad er a Israel er a blebaol er a Babilon, e a Ngarbab el Kort er a Rechijudea a mlo ulsiseb er ngii. Ngar er aike el euid el buil el lemla er ngii a chedaol sils, e a rechedal tia el kort a mo kldibel er sel 30 el klebesei er a buil. Tirka el chad a mle ngerechelir el lolterekokl el kmo a ongingil buil ngomuchel er oingerang. Te mekera lolterekokl er tiang?

Te mla er ngii a rechad el mlara ike el mekedidai el basio el meliuekl er a Jerusalem lomes er a eanged er a klebesei losiik er a tebengel a tabelbuil. Sel lesang e te di mereched louchais er a Ngarbab el Kort er a Rechijudea. A rechedal tia el kort sel bo lomdasu el kmo ngmla mo ungil a ildisel a sioko er a tabelbuil, e te mesubed er a uchelel a beches el buil. Engdi ngmekera a lsekum e ngmo er ngii a eabed me a lechub a chetechat el tonget osengir me ngdiak el sebechir loterekeklii a  tebengel a tabelbuil? A buil el lemla er ngii a mo 30 el klebesei a klemengetel e uriul er ngii ngomuchel a beches el buil.

A Mishnah ouchais el kmo a Ngarbab el Kort er a Rechijudea uluuchais er a rechad er a beches el buil loeak a lebekerdii a ngau er bebul a Rois Olib, el ngii a mle kmeed er a Jerusalem. Aike el bebil er a mekedidai el basio er a Israel a dirrek el bilekard a ngau er ngii el mesubed er a rechad. Uriul er isei e te dirrek el rirelleterir a ruderuchel el mo mesubed er a rechad. Me a Rechijudea er a Jerusalem me a Israel el rokir me a rengar er a lmuut el bebil er a basio a mlo medengelii a uchelel a beches el buil. Me a rokui el chad a mle sebechir el meruul aike el chedaol el sils er osisiu el taem.

Nglocha mo ngosukau el mo ungil medenge buil, chedaol el sils, me a blekerdelel a eanged er a taem er a rechad er a Israel sel momes er tia el chart.