“A diak a ullebengelel klengar tiakid el bo lodengelkau el dital meral Dios, ma Jesus Kristus el ngikel mulderchii.”​—Johanes 17:3.

NGERANG A CHETITUOKL EL TEKOI? A rebebil a melekoi el kmo ngdiak a Dios, e a rebebil a oumerang el kmo ngii a kmal klou el klisiich. Tirke el oumerang el kmo ngmera el ngar er ngii a Dios a kakebosech a osisecheklir el kirel ngii el Dios me aike el blekerdelel.

KE MEKERANG E SMODII SEL CHETITUOKL EL TEKOI? A ta er a rolel e kede mo nguu a klemedengei el kirel a Dios a oeak sel domes a blebelel. A apostol el Paulus a kmo: “Le sel diak le meues el blekerdelel a Dios, el diak a ullebengelel klisichel ma klechelid er ngii a domtab el bleketakl meues ra ikel ulebeob ra uchelel a belulechad.” (Rom 1:20) Ngsebeched el suub a betok el kirel a llemesel me a klisichel ngike el Ulemeob el oeak sel domes a blebelel.​—Psalm 104:24; Isaia 40:26.

Me a lsoad el mo nguu a mera el klemedengei el kirel aike el blekerdelel a Dios, e a derta me a derta er kid a kired el menguiu er a Tekingel a Dios, el Biblia, e di kid el merriter er ngii. Lak bechititerir a rechad me lomekrael er a uldesuem, e bai bo moltirakl er a ulekrael er a Biblia el kmo: “E lako bo blekerdelel tial belulechad, e bai mngedechemiu loeak  a ukbechesul a reng er kemiu, e bo msal medengei el kmo ngngera soal a Dios, me ngngera ungil lodeuir a rengul a Dios.” (Rom 12:2) Me a leuaisei, e me bo dosaod a klemerang el tekoi el kirel a Dios el ngar er a Biblia.

A Dios a ngar er ngii a ileakl el ngklel. A ngklel a Dios a llechukl er a Biblia el tekoi er a Hebru el betok el telael el taem. Ngar er a betok el oidel a Biblia er a Psalm 83:18 e ngkmo: “Bo lodengei el kmo, ng di kau el tang a [Jehovah], ke ngarbab el merreder er a beluulchad el rokir.”

A Jehovah el Dios a sebechel el omelechesiu a tekoi, e sebechel el metemall a rengul el omerellir a rechad a uchul. A uriul er a lotebedeterir a rechad er a Israel er a klsibai er a Ekipten, e ngmle betok el taem el luleltngakl a mellomes el ulekrael er ngii. Me a mekngit el omerellir a kmal ulemtok er ngii e rirellii el mo “mekngit a rengul.” A omerellir a “ulemekringel er ngiil Chedaol Dios er a Israel.”​—Psalm 78:40, 41.

A Jehovah a omekerreu er a derta me a derta er kid. A Jesus a dilu er a redisaiplo er ngii el kmo: “A teblol sisebangiau ngkora moterau ra chimol sens? E lmuutkung ma lak le kenge Demmiu e ngdiak el rebet a chimo er ngii ra chutem. El mo lmuut ra chui ra bdelmiu me ngdi ulecherangel el rokui. Misei e lako medakd; e kom kuk ngaruchei ra betok el sisebangiau.”​—Matteus 10:29-31.

A Dios a diak longetukel a kakerous el bedengir a rechad me a lechub e ngsiukang er tir. A apostol el Paulus a dilu er a rechad er a Grik el ngar er a Athen el kirel a Dios el kmo: “E rirelleterir ar chad ra bek el beluu el ulemekdubech er tir ra dital chad e ulemekingar er tir era bebul a chutem el rokir.” E dirrek el dilu el kmo a Dios “a diak le cheroid ra di derta er kid.” (Rellir 17:26, 27) A apostol el Petrus a kmo: “A Dios a diak longetukel rar chad, me tirikel meluu ra Dios e meruul a llemalt a le ngiiteterir ra bek el beluu.”​—Rellir 10:34, 35.

NGERA KEDE NGUU ER NGII? A rebebil a “blak a rengrir el bedul a Dios, e ngdi ngiil blakerreng a diak le ngara meral klemedengei.” (Rom 10:2) A lsekum e ke medengei a mera el osisecheklel a Biblia el kirel a Dios, e ngsebechem el mo mesisiich er a techall el mo mecheuid e dirrek el sebechem el lmuut el mo ‘kmeed ra Dios.’​—Jakobus 4:8.

A lsoam a lmuut el omesodel, e momes er a 1 el bliongel el dai er ngii a kmo, “Ngerang a Klemerang el kirel a Dios?” el ngar er a babier el What Does the Bible Really Teach? a (Ngerang a Mera el Osisecheklel a Biblia?)

[Footnote]

[Siasing er a 6 el llel]

A ta er a rolel e kede nguu a klemedengei el kirel a Dios a oeak sel domes a blebelel