“Ele bleob el mlo chederdall ra ngemed . . . e loia er ngii chomelatk.”​—ROM 8:20.

1, 2. (a) Ngera uchul me a omelatk er a diak a ulebengelel el klengar el ngar er a chutem a klou a ultutelel el kired? (b) E ngera uchul me a rebetok el chad a diak loumerang er ngii?

 KE LOCHA dirk melatk er a deurreng el blo molechesuar er sera omsubii el kmo a rechad a dikea lemad e te bai sebechir el melemolem el kiei el diak a ulebengelel el ngar er tia el chutem. (Johanes 17:3; Chocholt 21:3, 4) Ke locha dirrek el mla ouchais er tia el omelatk el mo er a rebebil. Me nguaisei, a omelatk er a diak a ulebengelel el klengar a klou a ultutelel er tia el ungil klumech el domerk er ngii. E le ngar er ngii a lerellii er a uldesued el kirel a klengar.

² Aike el klechelid er a Klsuul el Klekristiano a oltngakl er a klaumerang el kirel a omelatk er a diak a ulebengelel el klengar el ngar er tia el chutem. Me alta e a Biblia a olisechakl el kmo a chad a mo mad, engdi a betok el klechelid a olisechakl el kmo sel lemad a chad e ngngar er ngii a klisichel el di melemolem el ngar el ua reng. (Esekiel 18:20) Me nguaisei, e a rebetok el chad a oumededenger er a klengar el diak a ulebengelel el ngar er tia el chutem. Me ngsebeched el di kid  el oker er kid el kmo: A Biblia ngmelisiich er tia el uldasu? A lsekum e nguaisei, e ngoingerang e a Dios a ulechotii tia el uldasu el mo er a rechad?

“Mlo Chederdall ra Ngemed . . . e Loia er Ngii Chomelatk”

3. Ngmilekerang e obeketakl a moktek er a Dios er a uchelel a reksi?

³ Ngar er a uchelel a reksi e ngulebeketakl a moktek er a Jehovah el kirel a klechad. A Dios a mileketeklii el kmo a Adam a mle sebechel el kiei el mo cherechar a lsekum e ngmelemolem el olengesenges er ngii. (Genesis 2:9, 17; 3:22) A rengelekel a Adam a ulterekokl el mlo medengelii a rebetel a chad er a klengit e le ngmla er ngii a olechotel. Ngmle telenget a siseball el mo er a sers er a Eden me a rechad a mlo chuodel e mlad. (Genesis 3:23, 24) A klemengetel a klengar er a rechad a mirrael el mo kedeb. A Adam a kiliei el 930 el rak. A Sem a kiliei el 600 el rak er a uriul er a ieleb, e a ngelekel el sechal el Arpaksad a kiliei el 438 el rak. A Tera el demal a Abraham a kiliei el 205 el rak. A Abraham a kiliei el 175 el rak, e a ngelekel el Isak a mlo 180 a rekil me a Jakob a mlo 147 a rekil. (Genesis 5:5; 11:10-13, 32; 25:7; 35:28; 47:28) A rebetok el chad a ulterekokl el mlo medengelii a uchul me a klengar a di mirrael el mo kekedeb, e le a omelatk el kirel a diak a ulebengelel el klengar a mla remiid. Ngmla er ngii a ungil el uchul e te uluumerang el kmo a klengar a sebechel el moluut?

4. Ngera uchul me tirke el blak a rengrir el chad er a irechar a uluumerang el kmo a Dios a mo olutii sel klengeltengat el lurridii a Adam?

⁴ A Tekingel a Dios a kmo: “Ele bleob el mlo chederdall ra ngemed . . . e loia er ngii chomelatk.” (Rom 8:20) Ngera el omelatk? A kot el ulaoch er a Biblia a melutk el kirel a “uldidellel a rsechel a redil” el mo rukemii a bdelul a bersoech. (Monguiu er a Genesis 3:1-5, 15.) Ngike el telbiil el ngalek a mesterir a reblak a rengrir el chad a omelatk el kmo a Dios a mo otutii a moktek er ngii el kirel a klechad. Ngmilsterir a rechad el ua Abel me a Noah a klaumerang el kmo a Dios a mo olutii sel klengeltengat el lurridii a Adam. Tirka el chad a milechesuar el kmo a bo lobangch a kotel a uach e tiang a uldimukl er  ngii a kodellel a chad.​—Genesis 4:4; 8:20; Hebru 11:4.

5. Ngerang a ochotii el kmo a Abraham a uluumerang er a okiis?

⁵ Ka molatk er a Abraham er a bo lemeasem a klaumerang er ngii er a lodersii “a Isak el mo tenget . . . [el ngii a] dital ngelekel.” (Hebru 11:17) Ngera uchul me ngkilengei el meruul er tiang? (Monguiu er a Hebru 11:19.) A Abraham a mla er ngii a uchetemel a klaumerang er ngii er a okiis. Me alta e a Abraham me a Sara a mechudelang e dikea el sebechir el omechell, engdi a Jehovah a rirelleterir el mo sebechir el oungalek. (Genesis 18:10-14; 21:1-3; Rom 4:19-21) A Abraham a dirrek el uluumerang er a tekingel a Jehovah el kmo: “Ele ng okiu a Isak e ng mor ngii a re ngelekem el ngalek er a telbiil.” (Genesis 21:12) Me nguaisei, a Abraham a mla er ngii a ungil el uchul e nguluumerang el kmo a Dios a mo okisii a Isak er a kodall.

6, 7. (a) A Jehovah ngrirellii a ngera el telbiil el obengkel a Abraham? (b) Sel telbilel a Jehovah el mo er a Abraham ngulterekeklii a ngera el omelatk el kirel a klechad?

⁶ A Jehovah a rirellii a telbiil el obengkel a Abraham el kirel a klengelakel er ngii me a lechub a ‘ruldidellel a rsechel’ el klaumerang er ngii a uchul. (Monguiu er a Genesis 22:18.) Me ngulebeketakl el kmo a Jesus Kristus a ngike el “rasech” er a telbiil. (Galatia 3:16) A Jehovah a dilu er a Abraham el kmo a “ruldidellel a rsechem” a mo “betok el mo ua ildisel a btuch er a eanged ma lechub e ng chelechol er a rriil,” el diak el mochur a ildisir. (Genesis 22:17) Tia el ildois a ulebeketakl er a uriul. A Jesus Kristus me a tirke el 144,000 el mo mengedereder el obengkel el ngar er a Rengedel a mo churrengelii tia el ildois. (Galatia 3:29; Chocholt 7:4; 14:1) Ngoeak a Rengedel a Messias e a “bek el beluu er a beluulechad a mo olengit er ngak el mo omekngeltengat er tir.”

⁷ A telbiil el lerirellii a Jehovah a dimlak el sebechel a Abraham el mo medengelii a cherrungel el belkul. Engdi a Biblia a melekoi el kmo “Le ngmellatk er sel mats el dechor er chomekedecheraol.” (Hebru 11:10) E tia el mats a Rengedel a Dios. Ngmo sebechel a Abraham el nguu tia el klengeltengat a lsekum e nglmuut el mo ngar. Ngoeak a okiis e ngsebechel el mo nguu a diak a ulebengelel el klengar el ngar er tia el chutem. Tirke el mo suobel er a Armageddon me a tirke el mo mekiis er a kodall a ngar er ngii a techellir el mo kiei el diak a ulebengelel.​—Chocholt 7:9, 14; 20:12-14.

“Ng Dikea le Sebechek el Di Lmuk”

8, 9. Ngera uchul me a babier er a Job a diak di el cheldecheduch el kirel a ringel el blo lecharm er ngii a ta el chad?

⁸ Ngngar er ngii a chad el ngklel a Job el kiliei er a taem er a profet el Moses me a Josef el ngelekel a ngelekel a ngelekel a Abraham. A Moses a locha milluches er a babier er a Job el mesaod er a uchul me a Jehovah a kilengei me a Job el chuarm me aike el tekoi el dilubech el mlo er ngii er a uriul. Me nguaisei, a babier er a Job a ouchais a tekoi el lechilarm er ngii a ta el chad me a tekoi el ngar er ngii a ultutelel el mo er a rokui el blebelel a Dios. Tia el babier a meketeklii a melemalt el omengederederel a Jehovah e dirrek el ouchais el kmo a blakerreng me a omelatk er a klengar er a remesiungel a Dios el ngar er tia el beluulechad a uldimukl er sel tekoi el dilubech er a sers er a Eden. A Job alta e ngdimlak lodengelii sel tekoi el kirel a omengederederel a Dios engdi ngdimlak lebechititerir tirke el tedei el sechelil me lerellii el mo omdasu el kmo ngdimlak el blak a rengul. (Job 27:5) Tia el tekoi a sebechel el smisiich a klaumerang er kid e ngosukid el mo blak a rengud el mengebkall er a omengederederel a Jehovah.

⁹ A uriul er a lemereko el mengedecheduch tirke el leko te sechelil a Job, e a Elihu el “ngelekel a Barakel, el uldidellel a rsechel a Bus” a milengedecheduch. E ngera rirellii el mo mengedecheduch? Ngdilu el kmo: “Ng merengela er ngak el mengiil el mo mengedecheduch, ng dikea le sebechek el di lmuk.” (Job 32:5, 6, 18) Alta e a mlukreng el tekingel a Elihu a mlo tmaut er a uriul er a rengelel a Job, engdi aika el tekingel a ngar er ngii a belkul el mo er a rebebil. Ngmesterir a reblak a rengrir el chedal a Jehovah a ungil el omelatk.

10. Ngerang a ochotii el kmo a klemechel a Jehovah el mo er a derta el chad a ngar er ngii a lmuut el klou el belkul?

 ¹⁰ A lebebil er a taem e a Jehovah a meketakl a klemechel el mo er a derta el chad el ngii a dirrek el ngar er ngii a belkul el mo er a rokui el chad. Tiang a sebeched el mesang er sel ulochel a Daniel el kirel sel kerrekar er a lemukel el ngar er a berrusel a King Nebukadnesar er a Babilon. (Daniel 4:10-27) Me alta e a otutel tia el berrous a ngar er ngii a lerellii er a Nebukadnesar engdi ngngar er ngii a lmuut el klou el belkul. Ngmelutk el kirel a omengederederel a Jehovah el kirel tia el chutem el oeak a klengelakel er a King el David, el ngii a liluut el obeketakl er a uriul er a 2,520 el rak el ulemuchel er a rak er a 607 er a uchei er a taem er a Jesus. a A omengederederel a Dios a ulemuchel er a bo le King a Jesus Kristus er a Rengedel el ngar er a eanged er a 1914. Ka di molatk er a rolel sel bo longedereder a Rengedel a Dios e bo lotaut a omelatk el kirel klechad!

“Ng Diak Le Bor a Belurir a Re Mla Mad!”

11. Ngera ngochotii el kirel a Dios a tekingel a Elihu?

¹¹ A Elihu a ulenger er a keril a Job el kirel ‘a anghel el mei el mo sobecheklii; ng tang er a re betok el telael el anghel.’ E mekerang a lsekum ngika el anghel a “mo mengull el meluluuch er a Dios el oba deurreng”? A Elihu a melekoi a tekingel a Dios el kmo: “Mkedekedii me lorael! Ng diak le bor a belurir a re mla mad. Tiakid a char el melubet er ngii. A bedengel a mo merael el mo ngeasek e lmuut el mo mesisiich.” (Job 33:23-​26) Me aika el tekoi a ochotii el kmo a Dios a kongei er a olubet el kirir a remla obult el chad.​—Job 33:24.

12. Ngera el omelatk el kirel a klechad a denguu er a tekingel a Elihu?

¹² A Elihu a locha dimlak lodengelii a cherrungel el belkul a olubet, el di ua reprofet el dimlak lodengei a cherrungel el belkul aike el tekoi el lulluches. (Daniel 12:8; 1 Petrus 1:10-​12) Me nguaisei, engdi a tekingel a Elihu a meskid a omelatk el kmo ngmo er ngii a taem e a Dios a mo ngubetii a klechad er a telemellel a cheluodel me a kodall el oeak a olubet. A tekingel a meskid a ungil el omelatk er a diak a ulebengelel el klengar. E a babilengel a Job a dirrek el olecholt el kmo ngmo er ngii a okiis.​—Job 14:14, 15.

13. Ngera belkul a tekingel a Elihu el mo er a Rekristiano?

¹³ Chelechang, e a tekingel a Elihu a melemolem el klou a belkul el kirir a rebetok el milliol el  Kristiano el tir a oba omelatk el mo suobel er a telemellel tia el mekngit el beluulechad. Tirke el mechuodel el mo suobel a lmuut el mo ngeasek. (Chocholt 7:9, 10, 14-17) Me a lmuut el tang, a omelatk el mo mesterir tirke el mo mekiis a melemolem el uchul a deurreng el kirir a reblak a rengrir el chad. Tirke el Kristiano el oba omelatk el mo er a eanged me tirke el ‘ngodech el chermel [a Jesus] el sib’ el mo kiei er tia el chutem, a kirir el olecholt er a klaumerang er tir er a olubet el tengetengel a Kristus.​—Johanes 10:16; Rom 6:23.

A Kodall a Mo Mokngemed er Tia el Beluulechad

14. Ngera olecholt el kmo a rechad er a Israel a uluusbech er a lmuut el klou er a di Llach er a Moses me bo el sebechir el oba omelatk er a diak a ulebengelel el klengar?

¹⁴ A klengelakel er a Abraham a mlo ileakl el renged er sera bo el ileakl el chedal a Dios. A Jehovah a milsterir a Llach e dilu el kmo: “Sel moltaut a llechuk e moltirakl a ikel kdu er kemiu, e kom osobel a klengar er kemiu.” (Levitikus 18:5) Engdi tir el dimlak el sebechir el kiei el oltirakl a Llach a uchul me te mlukerrekeriil el okiu a Llach el mlo uchul me te uluusbech er a olubet.​—Galatia 3:13.

15. A David ngmlukreng el mo meluches a ngera el klengeltengat el kirel a ngar er a medad el klebesei?

¹⁵ Uriul er a taem er a Moses, e a Jehovah a ulemekreng er a rebebil el milluches er a Biblia el mo mesaod er a omelatk er a diak a ulebengelel el klengar. (Psalm 21:4; 37:29) El uai tiang, a David el milluches er a Psalm el mesaod el kirel a kltang er a re mengull el ngar er a Sion a kmo: “Le sei a le tilbir a RUBAK el mo omekngeltengat er ngii​—ng klengar el diak a ulebengelel.”​—Psalm 133:3.

16. Ngera el telbiil a lerirellii a Jehovah el kirel a ngar er a medad el klebesei el okiu a Isaia?

¹⁶ A Jehovah a ulemekreng er a Isaia el mo omlaoch el kirel a diak a ulebengelel el klengar el ngar er tia el chutem. (Monguiu er a Isaia 25:7, 8.) A klengit me a kodall a ua “chucheb” el mengucheb el ua lomekberaod er a klechad. A Jehovah a oterekeklii el mo er a rechedal el kmo a klengit me a kodall a mo mokngemed “er a beluulchad el rokir.”

17. Ngera el ulaoch el kirel a Messias a mekengii a rael el mo er a diak a ulebengelel el klengar?

¹⁷ Ka molatk er sel omeruul el ngar er a Llach er a Moses el kirel a kaming el mlengilt el mo er a Asasel. Sel Sils er a Tngakireng er a bek el rak, e a ngar er bab el priist a “mo kmed erebital chimal er bebul a bdelul ngiil kaming e mo olecholt  a rokui el delengerenger ma klengit ma ultok er a re chad er a Israel, me ng ua isei e ng oiuid el mor a bdelul a kaming. E sola e a tal chad el meltutk el kirel a mo choteklii ngikel kaming el mor a medideriik el beluu.” (Levitikus 16:7-10, 21, 22) A Isaia a ulemlaoch el kirel a Messias el mo kutmeklii a rolel e ngmo choroid a secher me a “ringel” me a kngterir a rebetok el chad el mekengii a rael el mo er a diak a ulebengelel el klengar.​—Monguiu er a Isaia 53:4-6, 12.

18, 19. Ngera el omelatk a ngar er a Isaia 26:19 me a Daniel 12:13?

¹⁸ A Jehovah a dilu er a rechedal el okiu a Isaia el kmo: “Tirkel mlad el chedad a lmuut el mo chad! A cheklechir a lmuut el mo mekiis. Tirkel ulekedurs er a debellir a mo mekiis e mo mengitakl er a deurreng. A RUBAK a mo omekngar er tirkel meketeketang er a le mad el ua nguches a lomngim er a chutem.” (Isaia 26:19) A Chuodel Renged a meketeklii a omelatk el kirel a okiis me a klengar er tia el chutem. A Jehovah a ulterekeklii er a Daniel er a bo el bekord el dart a rekil el kmo: “Ke mo mad, e ngdi ke mo mekiis el mo melai omeksullem er sel ulebongel taem.”​—Daniel 12:13.

¹⁹ A omelatk el kirel a okiis a uchul me a Maria a milengedecheduch er a Jesus el kirel a ochedal el kmo: “Ak medengei el kmo ngmekiis ra blsechel chokiis er sel uriul sils.” (Johanes 11:24) Aike el osisecheklel a Jesus me a mlukreng el tekoi el lulluches a redisaiplo er ngii, ngmlo ngodechii tia el omelatk? A Jehovah ngdirk melemolem el omsang a klechad tia el omelatk er a diak a ulebengelel el klengar er tia el chutem? Kede mo mesaod a nger er aika el ker er a ongingil el suobel.

[Footnote]

Ngsebechem el Mesaod?

• Ngokiu a otutel a ngera el omelatk e a bleob a mlo “chederdall ra ngemed”?

• Ngerang a ochotii el kmo a Abraham a uluumerang er a okiis?

• A tekingel a Elihu el mo er a Job ngmsang a klechad a ngera el omelatk?

• Ngmekerang a Chuodel el Renged e melisiich er a omelatk el kirel a okiis me a diak a ulebengelel el klengar el ngar er tia el chutem?

[Aike el Ker er a Suobel]

[Siasing er a 11 el llel]

A tekingel a Elihu el mo er a Job a meskid a omelatk el kmo a klechad a mo mimokl er a cheluodel me a kodall

[Siasing er a 12 el llel]

Ngmloterekokl el mo er a Daniel el kmo ngmo ‘mekiis el mo ngmai omeksullel er sel ulebongel taem’