KID a kiei er a beluulechad el mui er a betok el kakerous el bedengel a klechelid. A ta er a omesuub a ouchais el kmo, ngngar er ngii a 19 el meklou el cheldebechel er a klechelid me 10,000 el mekekerei el klechelid el meliuekl er a beluulechad. Aika el betok el kakerous el klechelid a mesterir a rechad a techellir el melilt er a klechelid el sorir. Me a ker a kmo, ngklou a ultutelel a klechelid el mngiltii?

A rebebil a melekoi el kmo a kakerous el klechelid a di ua kakerous el rael el mo er a chimo el rois. Me ngngar er a osengir a rechad e aike el kakerous el rael a rokui el di mo er a ta el basio. Te dirrek el melekoi el kmo ngar er ngii a di ta el Kedidai el Dios, me a rokui el klechelid a di merael el bedul ngii.

A Rokui el Rael Ngmerael el Bedul a Dios?

Ngera ngdilu a Jesus, el klou el sensei, el kirel tia el tekoi? Ngdilu er a rulebengkel el kmo, “Bo msiseb er chobutek el siseball.” E le ngera uchul? “A siseball el mora tellemall a klou, ma rael er ngii a meteu, me te betok ar chad el soiseb er ngii. E a siseball el mora klengar chobutek, ma rael er ngii a kekerei, me te mekesai ar chad el metik er ngii.”​—Matteus 7:13, 14.

A Jesus ngmillekoi el kmo a bebil el klechelid a merael el bedul a “tellemall”? Me a lechub e ngdilu el kmo ngdi tirke el diak el oumerang er a Dios a merael er a meteu el rael, e tirke el oumerang er ngii el ngar er a kakerous el klechelid a merael er a obutek el rael el mo er a klengar?

Uriul er a losaod aika el eru el rael, e a Jesus a di mle mereched el melekoi el kmo: “Mkekerengemiu rar klsuul profet, toubail ra sib e ekor kemiu, e a chelsel a rengrir a bekeu el merechorech el okami.” (Matteus 7:15) E dirrek el dilu el kmo: “Ngdiak el tirikel rokui el dmu er ngak el kmo ‘Rubak, Rubak,’ a mo soiseb ra rengedel a eanged, ngdi tirikel meruul a soal a Demak el ngara eanged a mo soiseb.” (Matteus 7:21) Me a chad el melekoi el kmo ngprofet me a lechub e ngmelekoi el kmo a Jesus a “Rubak” er ngii, a  omdasu el kmo ngchad er a klechelid e oumerang er a Dios. Ngdi a tekingel a Jesus a kmal bleketakl el kmo ngdiak el rokui el mengeteklel a klechelid me a rokui el klechelid a ungil.

Ngsebeched el Dongchii a Obutek el Rael?

Ngdiak el rokui el klechelid a mo er a Dios. Me a leuaisei, e kede mekerang e metik er a mera el klechelid el mo uchul a klengar er a chelsel aika el betok el telael el klechelid? Ka molatk er tia el okesiu: Oleko ke mla remiid er a chelsel a klou el mats e melasem el osiik a ngeso me bo el sebechem el metik er sel basio el soam el mo er ngii. E a ta el chad a kmu er kau el kmo morael el bedul a ongos. E a kuk tang a kmo morael el bedul a ngebard. E a lmuut el tang a kmo mngiltii sel soam el rael e mokiu ngii. E sola e a tang a meskau a map el olecholt er a melemalt el rael me ngsebechem el ousbech er ngii. Ngulterekokl el sel mnguu tia el map e ngmocha klou a rengum el medengei el kmo ngmocha sebechem el mo er sel bo er ngii.

Me ngdi osisiu, kede ousbech er a melemalt el ulekrael me bo el sebeched el metik er a mera el klechelid. E tia el ulekrael a sebeched el metik er ngii el ngar er a Biblia. E ngii el Biblia a oterekeklii el kmo: “Ele chedaol Llechukl el rokui a melluches luleak a [r]eng ra Dios, me ngngarngii a blkul er chosisechakl, ma chomellach, ma chomekmelemalt, ma chomekrael el mora llemalt.”​—2 Timoteus 3:16.

Ngulterekokl el ngar er ngii a mla moiuid el Biblia el ngar er a omelekingem el sebechem el ousbech er ngii el osiik er a mera el klechelid. A Resioning er a Jehovah a mla otebedii a oidel a Biblia, el omekedong er ngii el New World Translation of the Holy Scriptures (English). Ngdi lsekum kau a kuk ngodech a klechelid er kau, e ngsebechem el ousbech er a Biblia er kau el mo dongchii a melemalt me a klsuul el klechelid. Me nguaisei, aika el suobel a mileketmokl el ousbech er a Biblia el tekoi er a Belau el ngii a lousbech er ngii a betok el klechelid er a Belau.

Bo el sebechem el omekesiu aike el klemedengei er kau er aike el tekoi el lolekoi a Biblia sel mosuub aika el ongingil el suobel. Lak mobes a tekingel a Jesus el kirel a mera el klechelid. Ngdilu el kmo: “Nguaisei el bek lungil kerrekar chourodech a ungil el rodech, ma mekngit el kerrekar chourodech a mekngit el rodech. A ungil kerrekar a diak el sebechel lourodech a mekngit el rodech, ma mekngit el kerrekar a diak el sebechel lourodech a ungil rodech.” (Matteus 7:17, 18) Ka me bo domes a edei el ungil el rodech el Biblia a ousbech el melangch er a “ungil kerrekar.”

[Blurb er a 3 el llel]

A Biblia a kot el klou a ultutelel el map el sebechel a chad el ousbech er ngii el mo metik er a mera el klechelid

[Baks er a 4 el llel]

Ngsebechel el Di Blakerreng e Ungiang?

Ngar er a chelsel a betok el klechelid, e te ngar er a ngii a reblak a rengrir el olengeseu er a rebebil. Me a leuaisei, a lsekum a chad a blak a rengul er a klaumerang er ngii e kiei el ungil a klengar er ngii, e ngar er ngii a ultutelel a klechelid er ngii?

Ka molatk er a Saulus el chad er a Judea, el mlo Kristiano el apostol el Paulus er a kot el dart el rak. Ngkmal mle blak a rengul er a klechelid er a Judea, e tia mlo uchul e ngmillasem el olekngemed er sel omengull er a rultirakl er a Kristus, e le ngulemes er ngii el kmo ngklsuul. (Rellir 8:1-3; 9:1, 2) Engdi ngoeak a klechubechub er a Dios, e a Saulus a mlo melechesuar el kmo a blakerreng er a rechad el mo er a klechelid er tir, a sebechel el rulleterir el mo blak a rengrir el mo er a Dios el ngar er a cheleuid el rolel. (Rom 10:2) Me sera lesuub a betok el kirel a soal a Dios me a moktek er ngii, e ngildechii a blekerdelel e mlo omuchel el mengull el teloi er tirke el chad el uleltirakl er a Jesus Kristus, el lulemekcharm er tir er a uchei.​—1 Timoteus 1:12-16.