Delbochel el Uldasu 3: A Rokui el Ungil el Chad a Mo er a Eanged
Ngerang a uchelel tia el delbochel el uldasu? A uriul er a kodellir a rechapostol er a Jesus, er a uchelel a ongeru el dart el rak, e a Remengeteklel a Ikelesia er a uchelel a mlo merael a chisir. A New Catholic Encyclopedia (2003), Volume 6, er a 687 el llel, a mesaod er a osisecheklir el kmo: “Ngmle klou a klaumerang er a rebetok el kmo a soul el mla meakl er a cheklechel er a uriul er a lemad, e mla meketmokl aike el kirel el ruoll el mo mengikiid er ngii, a di mereched el mo nguu a klengar el ngar er a deurreng er a eanged.”
Ngerang melekoi a Biblia? “Te ngeltengat ar medemedemek, le te mo oudiukes ra belulechad.”—Matteus 5:5.
Alta e a Jesus a tilbir el mo er a redisaiplo er ngii el kmo ngmo “kutmeklii” a basio el kirir el ngar er a eanged, engdi ngulechotii el kmo ngdiak el rokui el melemalt el chad a mo er sei. (Johanes 3:13; 14:2, 3) Ngkora milluluuch el kmo a soal a Dios bo lemeketmokl “ra belulechad el ua chomerellel ra eanged?” (Matteus 6:9, 10) A leuaisei, e ngngar er ngii a teblong el omeksaul el kirir a remelemalt. Te ngar er ngii a remekesai el mo mengedereder el ngar er a eanged el lobengkel a Kristus, engdi a ruumesingd el chad a mo kiei el diak a ulebengelel el ngar er tia el chutem.—Chocholt 5:10.
A lorael a taem el mei, e sel ikelesia er a uchelel a mlengodech a uldesuir el kirel a ngerechelir er tia el beluulechad. Me ngera mlo rsel? A The New Encyclopædia Britannica a melekoi el kmo: “Sel uleketmokl el ikelesia a miltechir a longiil er ngii el Rengedel a Dios.” Ngmlo meleketek er a klisichel el loeak a balatiks e chiloit a bleketakl el tekingel a Jesus el mo er a rulebengkel el kmo te “diak le klalo ra belulechad.” (Johanes 15:19; 17:14-16; 18:36) Ngar er a eungel a ulekrael er a Emperor Constantine er a Rom, e a ikelesia a kilengei el ngmodech a bebil er a klaumerang er ngii, el ta er ngii el klaumerang a kirel a mera el teletelel a Dios.
Momekesiu aika el bades er a Biblia: Psalm 37:10, 11, 29; Johanes 17:3; 2 Timoteus 2:11, 12
KLEMERANG EL TEKOI:
A ruumesingd el chad a mo kiei el diak a ulebengelel el ngar er a beluulechad el diak el bo er a eanged
[Credit Line]
Art Resource, NY