A Tekoi el Lullisechakl a Jesus el Kirel

“A Jesus a mle ulterekokl a rengul el kmo ngii ngtechang, e mla er ker el mei, e ngera uchul me ngmlei er a chutem, e ngera el tekoi a bo loruul er a ngar medad el taem.”​—AUTHOR HERBERT LOCKYER.

ME A uchei er a bo dekengei e doumerang a tekoi el lullisechakl a Jesus, e ngkired el mo medengei a bebil el tekoi el kirel ngika el chad. Ngika el Jesus, ngua techa el chad? E ngmla er ker el mei? E ngerang a mle moktek er a klengar er ngii? Ngoeak aike el eua el Evangkelio er a Matteus me a Markus me a Lukas me a Johanes, e ngsebeched el mo medengei a klemera el tekoi el lullisechakl a Jesus el kirel.

Ngkiliei er a eanged er a uchei er a be lemechell er a chutem A Jesus a mle ta el losaod er a klebkall el lulebang “er uchei ra le meruul a belulechad.” (Johanes 8:58) A beluulechad a mla er ngii er a uchei er a lobeob a Adam, e ngii el Adam a kiliei el bekord el 4,000 el rak er a uchei er a lemei er a chutem a Jesus. Me nguaisei, engdi a Jesus a di mla ngar er ngii er a uchei er a lebebii a chutem a Dios. Me a leuaisei, e a Jesus ngmla er ker er a uchei? Ngdilu el kmo: “Ele ngak [a] mlara eanged el me metengel.”​—Johanes 6:38.

A Ngelekel a Dios A Jehovah a ngar er ngii a rebetok el anghel el ngelekel el sechal, engdi a Jesus a ileakl el Ngelekel. Ngii el Jesus a mellekoi el kirel el kmo ngii a “dital Ngelekel a Dios.” (Johanes 3:18) Tia el tekoi a belkul a kmo a Jesus a mle kot el blebelel a Jehovah. Me nguleak ngika el di ta el Ngelekel, e a Jehovah a mileob a rokui el tekoi.​—Kolose 1:16.

“Ngelekel a chad” Ngmle betok el taem el Jesus a uluusbech er tia el tekoi el melekoi el kirel. (Matteus 8:20) Ngulechotii el kmo ngii a mle mera el chad, el dimlak el anghel el ulemail er ngii er a bedengir a rechad. Me ngoeak a chedaol el reng er a Dios, e nguliulii a klengar er a Ngelekel er a eanged el mei er a chutem, er a chelsel a omecherellel a klikiid el ekebil el Maria. Me ngoeak itiang, e a Jesus a mlechell el cherrungel el chad.​—Matteus 1:18; Lukas 1:35; Johanes 8:46.

A telbiil el Messias A redil er a Samaria a dilu er a Jesus el kmo: “Ak medengei el kmo, a Messias a mei.” Me a “Jesus a dilu er ngii el kmo, ‘Ngak, el mengedecheduch er kau, a ngii.’” (Johanes 4:25, 26) A tekoi el “Messias” me a “Kristus” a belkul a kmo “Ngike el Ngellitel.” A Dios a ngileltii a Jesus el mo meruul er a ileakl el tekoi el kirel a otutel a telbilel.

A uchul me a Jesus a mlei er a chutem A Jesus a mle ta el lolekoi el kmo: “Ngkirek el mo omerk ra ungil klumech ra rengedel a Dios era ikel kuk bebil ra mats; itiai a uchul ma kmlodurch.” (Lukas 4:43) Me alta e ngmirruul a betok el ungil el tekoi el mo er a rechad el uluusbech a ngeso, engdi a ureor er a berkel a klumech er a Rengedel a Dios a mle kot el klou a ultutelel el tekoi el lurruul er ngii. Kede mo mesaod aike el tekoi el lullisechakl el kirel a Renged er a uriul.

Ngbleketakl el kmo, a Jesus a mle ileakl el chad. * Kede mo mesuub el kirel a klengar er ngii er a eanged el ngii a mo smisiich a tekoi el ledilung er a lengar er tia el chutem. Me ngdiak lemechas a rengud el kmo a klumech el lulemerk er ngii a mla ngmodech a klengar er a rebetok el miliol el chad.

[Footnote]