Ngera Uchul Me Ngkmal Klou a Telemellel a Chebechiil?

“E ar Farisee a mlo kmeed er [a Jesus] el mengarm er ngii, me tuleker er ngii el kmo, ‘Ngdi subed a le ngarngii a ngeral uchul ma sechal le chitii a bechil?’ ”​—Matteus 19:3.

A REBEBIL el kiliei er a taem er a Jesus a dirrek el mle cheldeng a rengrir el kirel a chebechiil me ngmle betok a kerrir me a omesodir el kirel. Misei e a Jesus a dilu er tir el kmo: “Ngdirekak mchiuii a kmo ngikel ulemeob a rirelleterir ar chad ra kot luchul el sechal ma redil, e sola e dula el kmo, ‘Mitiai a uchul ma chad a mecherei a demal ma delal e mo obengkel a bechil, me tir el terung a mo tal chelechad’? Me ngdikea lterung, ele te ta ku el chelechad. Misei a uchul a ikel bla lodak a Dios, lak a chad el smaod.” * (Matteus 19:4-6) Me ngkmal bleketakl a moktek er a Dios el kirel a chebechiil el kmo ngkirel el melemolem el diak a ulebengelel.

Ngar er a chelsel a betok el beluu er chelecha el taem, e ngbekord el 40 el basent me a lechub e nglmuut el betok el chebechiil a metemall me a lechub e ngmedort. Me tiang ngbelkul a kmo a ulekrael el debetik er a Biblia el kirel a chebechiil a mla mo diak a ultutelel? Me a lechub e a chebechiil el moak a dimlak a ungil el uchetemel el sebechel el smisichii?

Ka molatk er tia el okesiu. A reteru el obekel a mechar a teblo el osisiu a teletelel el mlai. A ta er tirke el obekel a kmal ungil mengetmokl er a mlirir, e dirrek el kmal kerekikl sel lomekall er ngii me ngdiak el metemall tia el mlirir. E tirke el kuk ta er a obekel a di ousbech er tia el mlirir el kmal di meterekakl er ngii, e diak longetmokl er ngii me a lomekall e te kmal diak el kerekikl, me ngmetemall ngii el mlirir. Me chelechang e ngtecha a uchul a telemellel a mlai, ngsel mlai me a lechub e te rechad el oumlai er ngii? Ngbleketakl el kmo ngngerechelir a rechad el oumlai el mengetmokl er a mlirir.

Me ngdi osisiu, a oumesingd el chebechiil a metemall el diak el belkul a kmo ngdimlak a ungil el uchetemel me a lechub e lak a llach el kirel a chebechiil. A betok el miliol el ungil el chebechiil a ochotii el kmo ngkmal sebechel el mo ungil a chebechiielir a rechad. E a chouaike el ungil el chebechiil a kmal uchul a deurreng me a ultebechel el klechad el kirir a derta el chad me a telungalek me a dirrek el chelsel a beluu. Me tiang a meketeklii el kmo a chebechiil a kmal ousbech er a ungil el omengetmokl me a dirrek el ungil el ulekerreu me bo el sebechel el melemolem el ungil, el di ua mlai el de kerekikl el mengetmokl er ngii e ngmelemolem el ungil el merael.

Me a uleklatk me a ulekrael el debetik er a Biblia el kirel a omengetmeklel me a klisichel a chebechiil a kmal oureor er a chelsel a dirk mloak el chebechiil me a lechub e ngmeketeketang el chebechiil. Ngar er a ongingil el llel tia el babier e ngsebeched el mo omes a bebil el ungil el kerebai el kirel a chebechiil.

[Footnote]