Mchiis er a Bedeklel a Diabelong!

‘Mchiis er a bedeklel a Diabelong.’​—2 TIMOTHY 2:26.

NGMEKERANG A OMONGER?

Ngkired el mekerang a lsekum e ngmekngit a uldesued el kirir a rebebil?

Ngera kede suubii er a omerellel a Pilatus me a Petrus el kirel a orimel me a dakt er a rechad?

Ke mekerang e diak el sal mo mekngit a ukltkem?

1, 2. Ngera el bedeklel a Diabelong a bo dosaod er tia el suobel?

 A DIABELONG a melasem el omdechem er a remesiungel a Jehovah. Engdi ngdiak leua chad el blechoel el omekoad a charm el ludechem. Ngbai omdechem er a rechad e meruul er tir me te mo meruul a soal.​—Monguiu er a 2 Timothy 2:24-​26.

² A chad el omdechem a charm a blechoel el ousbech a bedikl. Me ngmelasem el oltobed er a charm er a blil me bo lsebechel el medeklii. Me a lechub e ngrullii a bedeklel el berrotel me ngdiak el sebechel a charm el mesang me ngsebechel el obedikl er ngii. A Diabelong a dirrek el ousbech a bedikl el omedikl er a remesiungel a Dios. Me a lsekum ngdiak el soad el obedikl, e ngkirel el mo biusech a medad me bo lsebeched el dmangch a bedeklel. Ngar er tia el suobel, e kede mo mesaod a rolel a doliub er kid er a edei el bedeklel a Diabelong. Aikang a (1) omelaes, (2) dakt er a rechad me a orimel, (3) me a mekngit el ukltked. E a ongingil el suobel a mo mesaod a lmuut el erung er a bedeklel.

LAK MOLAES

3, 4. Ngera sebechel el duubech a lak dekerekikl a cheldechedechad? Mosaod.

³ A charm sel lengar er a chelsel a oreomel e ngselebechakl. Me a chad el omedikl a sebechel el sosebii a oreomel me ngchemiis a charm el me tuobed er a blil, e ngmdechemii. Me ngdi osisiu, chelsel a ongdibel er a Rekristiano e a rudam me a rudos a selebechakl. Engdi a Diabelong a soal el omuchel a mondai er a chelsel a ongdibel el mo uchul e ngmo kesib a rengrir a rechad e tuobed el merael me bo lsebechel el mdechemeterir. Me a lsekum e ngdiak dekerekikl, e kede mekerang e ua dolengeseu er a Diabelong el belkul a kmo kede mla obedikl er a bedeklel?

⁴ A Jakobus a dilu el kmo a churad a di ua ngau. (Monguiu er a Jakobus 3:6-8.) Me a lsekum e ngdiak dekerekikl a  tekinged, e ngsebeched el omuchel a mondai er a chelsel a ongdibel. Tiang mekerang e mo uaisei? Oleko a odam a otebedii a subed er a miting el kirel a odos el mo pioneer. E a uriul er a miting e a reteru el odos a dmak el mesaod er sel subed. Me a tang a kmo ngkmal ungil e le ngmlo sebechel el mo pioneer, e oureng el kmo ngmo ungil a urerel. E ngike el tang a kmo, ngmlo pioneer e le ngdi soal el meruul a chisel er a chelsel a ongdibel. Ngtecha er tir a soam el mo sechelil? Ngbleketakl el kmo ngtecha er tir a sebechel el omekdubech a mondai er a chelsel a ongdibel el okiu a cheldechedechal.

5. Kede mekerang e mo diak dolaes?

⁵ Kede mekerang e mo diak dolaes? A Jesus a dilu el kmo: “A ikel omichoech er a reng a me tuobed er a ngor.” (Mateus 12:34) Me a kot e ngkired el merriter er a rengud e mo kerekikl me lak domekeroul a uldasu el rullid el mo melaes. El ua tiang, sel domes er a odam el blak a rengul el oureor el mesiou er a ongdibel, e ngmo ua ngerang a uldesued? Kede mo omdasu el kmo ngmesiou e le ngsoal el oldeu er a rengul a Jehovah me a lechub e ngkuk di melatk a mo uchul a klungiolel? A lsekum e ngblechoel el mekngit a uldesued el kirir a rudam er kid, e lak dobes el kmo a Diabelong a dirrek el dilung a osisiu el tekoi el kirel a blak a rengul el mesiungel a Dios el Job. (Job 1:9-​11) Me a lsekum e ngmekngit a uldesued el kirel a ta er a odam, e ngungil a dorriter er a uldesued. Ngngar er ngii a uchul e kede omdasu el uaisei, me a lechub e kede mla mo ua rechad er chelecha el taem er a ulebongel el dikea loubltikerreng?​—2 Timothy 3:1-4.

6, 7. (a) Ngera bebil el uchul me kede melaes? (b) Ngkired el mekerang a lsekum kede motuub?

⁶ Ka momdasu a bebil er a uchul e ngmekngit a uldesued el kirir a rebebil. Nglocha soad el meruul a tekoi el olechau a osengir a rechad me bo lechat er kid. Me a lechub e kede melaes er a rebebil el olecholt el kmo kede kuk ungil er tir. Me sel loruul a ungil a rebebil e kede mo melaes er tir e le kede medengei el kmo ngmle kired el meruul er sel tekoi e dimlak derellii. Ngdi mo uchul a klou el tellemall a lsekum e ngkldidairreng me a chelechei me a lechub e ngchelitechetul a rengud a uchul e kede mo melaes er a rebebil.

⁷ Ngkuk uangerang a lsekum e ngngar er ngii a ungil el uchul e kede melaes er a ta er a chad. El ua tiang, alta e a chad a dillii a tekoi el tilemellii a rengud. Ngsebechel el mo mekngit a rengud, engdi ngdiak el kired el meruul a osisiu el tekoi el mo er ngii, e le ngdi rullii tia el tekoi el lmuut el mo mekngit. E tia el blekeradel a diak el soal a Dios, e ngbai soal a Diabelong. (2 Timothy 2:26) Ngbai kired el oukerebai er a Jesus, e le “ser a le motuub e ng dimlak lolaitechei el oltuub; . . . e bai di [mle] ultuil omeltkel er a Dios el melemalt a loukerrekeriil.” (1 Petrus 2:21-​23) A Jesus a uluumerang el kmo a Jehovah a mo mesmechokl a tekoi er sel soal el rolel me a temel.  Me ngkired el mo uai ngii el oumerang er a Dios. Me sel dolisiich er a rebebil el oeak a tekinged, e ngtoketekii a budech me a kltarreng er a chelsel a ongdibel.​—Monguiu er a Efesus 4:1-3.

LAK MOBEDIKL ER A DAKT ER A RECHAD ME A ORIMEL

8, 9. Ngera uchul me a Pilatus a ulterekeklii a Jesus el mo okodall?

⁸ A charm sel lobedikl e ngdikea a ilmeklel el merael. Me ngdi osisiu, a chad el mo medakt er a rechad a mo diak a ilmeklel el melilt a tekoi el loruul. (Monguiu er a Osisechakl 29:25.) Me bo dosaod e dengai a klubeled er a reteru el chad el ulbedikl er a dakt er a rechad.

⁹ A Pontius Pilatus el Kabernor er a Rom a mle medengei el kmo a Jesus a diak a telemellel el chad, me ngdimlak el soal el omals er ngii. Me ngdilu el kmo “ng diak a ngeral . . . uchul e ng kirel el mo okodall.” Engdi ngulterekeklii a Jesus el mo okodall. E ngera uchul? E le ngmlo medakt er a rechad. (Lukas 23:15, 21-​25) A seked a ulerrimel er a Pilatus el mo meruul a sorir er a loldiu el kmo: “Kau cho mngebetii, e ng diak msechelil a merreder er a Rom!” (Johanes 19:12) Me nglocha mle medakt el ngubetii a Kristus, e le ngmo uchul e ngoridii a deruchellel el kabernor, e dirrek el sebechel el mo okodall. Me ngulbedikl er a dakt er a rechad e mlo meruul a soal a Diabelong.

10. Ngera uchul me a Petrus a uluumededenger er a Kristus?

¹⁰ A apostol el Petrus a ta er a kmal mle kmeed el sechelil a Jesus, e dimlak lemedakt el ouchais el kmo a Jesus a Messias. (Mateus 16:16) Ngmillemolem el obengkel a Jesus er sel taem el rebebil er a rultirakl er ngii a chilitii, el tekoi el ledilung a Jesus a uchul. (Johanes 6:66-​69) Me sera lemei a recherraro el me melai er a Jesus, e a Petrus a uleba saider el mesebechakl er ngii. (Johanes 18:10, 11) Engdi uriul e a dektel er a rechad a rirellii el mo oumededenger er a Jesus Kristus. Me ngika el apostol a ulbedikl el telkib el taem e le ngdektel er a rechad a uchul me ngmlo diak el blak a rengul el meruul a llemalt.​—Mateus 26:74, 75.

11. Ngkired el mo mesisiich el oltngakl a ngera el tekoi?

¹¹ A Rekristiano a kirir el mesisiich el oltngakl a orimel el mo meruul a tekoi el diak loldeu er a rengul a Dios. A remerredered me a rebebil a locha mo orrimel er kid el mo meruul a mekngit me a lechub e ngdeleboes el omeruul. A Rekristiano a locha mo measem er a rechad el orrimel er tir el cheat er a skuul, e omes a siasing er a remeau, e melamech a dekool, e ousbech a mekngit el kar, e melim a rrom, e meruul a deleboes. Me a dakt er a rechad me a orimel el mo meruul a mekngit, a di ua bedikl el sebechel el medeklid. Me ngerang a ngosukid me ngdiak dobedikl?

12. Ngera kede suubii er a omerellel a Pilatus me a Petrus?

¹² Ngera kede suubii er a omerellel a Pilatus me a Petrus? A Pilatus a dimlak a klou el klemedengei er ngii el kirel a Jesus. Ngdi mle medengei el kmo a Jesus a dimlak a kngtil, e dirrek el mle ileakl el chad. Engdi ngmle kedidai a rengul e dimlak lebetik a rengul er a mera el Dios. Me ngmle beot er a Diabelong el ousbech er ngii el mo meruul a soal. E a Petrus a mla er ngii a klemedengei er ngii, e dirrek el mle betik a rengul er a Dios. Engdi ngmlo er ngii a taem el mlo diak el tabesul a omerellel, e mlo medakt er a rechad, e dirrek el mlorimel. Me a uchei er a lobdechem a Jesus, e a Petrus a uluusimang el melekoi el kmo: “A re chad a mo choitau, e ngdi ngak a kmal diak bo kchitau!” (Markus 14:29) Oleko Petrus a uluumerang er a Dios el ua ngike el milluches er a Psalm, e ngulterekokl el mle ungil el kutmeklii el kirel a omelsemai el mo er ngii er a uriul. Ngika el chad a milengitakl el kmo: “A RUBAK obengkek me ng diak bo kmedakt; ngera ng sebechir a re chad el remuul el mer ngak?” (Psalm 118:6) Ngar a ulebongel el kesus er a Jesus er tia el chutem, e ngngiluu a  Petrus me a relmuut el teru el apostol el mo er a sers er a Gethsemane. A Jesus a ullengit er tir me lolemolem el di mekar, engdi ngiliit a mederir. Me sel taem er a lolekiis er tir a Jesus, e ngdilu el kmo: “Mongkar e moluluuch me lak kom rebet er ongetikaik el mor a klengit.” (Markus 14:38) Engdi Petrus a liluut el imiit a medal, e a uriul e ngmlorimel, e dirrek el mlo medakt er a rechad.

13. Ngmekerang a doltngakl a orimel el mo meruul a mekngit?

¹³ Me a omerellel a Pilatus me a Petrus a osisecheklid el kmo a lsekum e ngsoad el mo diak demedakt er a rechad me a orimel, e ngkirel el mo er ngii a klemedengei er kid, klengariourreng, tabesul osenged er a tekoi, e betik a rengud e meluu er a Jehovah. Me a klaumerang er kid el ultuil er a melemalt el klemedengei er a Dios a rullid el mo bekeu el mesaod a tekoi el doumerang. E tiang a smisichid me ngmo diak demedakt er a rechad. Ngdiak el kired el mo omdasu el kmo kede kmal mesisiich. Ngbai kirel el mo ngariou a rengud e blechoel el olengit er a oureor el klisichel a Jehovah el melisiich er kid me lak demorimel el mo meruul a mekngit. Me a bltkil a rengud el mo er ngii a kirel el smisichid el mo oltirakl a llechul me ngdiak doruul a tekoi el sebechel el rulleterir a rechad el mo mekngit a uldesuir el kirel a Jehovah. Ngdirrek el kired el mo ungil el kutmeklid er a uchei er a lebo er ngii a orimel. El ua tiang, ngkired el meluluuch el obengterir a rengeleked e olisechakl er tir el mo meduch el oltngakl a omengesuseu er a rebebil el mo meruul a mekngit.​—2 Korinth 13:7. *

LAK EL SAL MO MEKNGIT A UKLTKEM

14. A Diabelong ngsoal a bo domdasu a ngerang el kirel a mekngit el deriruul er a uchei?

¹⁴ A lebebil er a taem e a chad a meruul a bedikl el ousbech er a klou el chelechedal a kerrekar me a lechub e ngbad el klebikl er bebul sel rael el leblechoel el merael er ngii a charm. Ngdirrek el sorsii sel basio el oba cheleatel me sel lesbechii er a cheleatel a charm e a chelechedal a kerrekar me a lechub e ngbad a ruebet el lotelechii. Me ngdi osisiu, e ngsebechel el kmal mo mekngit a ukltked el di ua bla demotilech er a chelechedal a kerrekar me a lechub e ngbad. Sel dolatk er a kngtid, e ngsebeched el mo omdasu el kmo kede “kmal mla metemall . . . e ongingd er a ringel.” (Monguiu er a Psalm 38:3-5, 8.) A Satan a soal a bo domdasu el kmo kede kmal mekngit el chad el diak el sebeched el oltirakl a llechul a Jehovah me ngdiak el sebeched el nguu a klechubechub er ngii.

15, 16. Ke mekerang e diak el sal mo mekngit a ukltkem?

¹⁵ Ke mekerang e diak el sal mo mekngit a ukltkem? A lsekum ke mla mo er a oberaod el klengit, e ngkirem el mereched el sumecheklii a deleuill er kau me a Jehovah. Bo molengit a ngeso er a remechuodel. (Jakobus 5:14-​16) Bo er aike el sebechem el sumecheklii a tekoi el mtilemellii. (2 Korinth 7:11) Lak bo lemechitechut a rengum er a omellach el mnguu, e le ngolechotel a bltikerreng er a Jehovah. (Hebru 12:6) Moterekeklii a rengum me lak mluut el mo meruul a osisiu el tekoi el uchul e ke mlo er a klengit. Me sel mouuchel er a rengum e mobult er a kngtim, e bo moumerang el kmo a Dios a sebechel el ousubes er kau el okiu a olubet el tengetengel a Jesus Kristus.​—1 Johanes 4:9, 14.

¹⁶ A rebebil a melemolem el mekngit a ukltkir, alta e te mla musubes el kirel a kngterir. Me a lsekum e nguaisei a uldesuem, e lak mobes el kmo a Jehovah a uluusubes er a Petrus me a rebebil el apostol el chilitii a Jesus er sera lsal ousbech er tir. Ngdirrek el uluusubes er a chad el milsuld a ngklel el mekngit el rolel a deleboes a uchul, e le ngii el chad a uluuchel er a rengul e ulebult. (1 Korinth 5:1-5; 2 Korinth 2:6-8) Ngbetok a chisir a rechad el ngar er a Biblia el rirebet  er a oberaod el klengit engdi a Dios a uluusubes er tir e le te ulebult er a kngterir.​—2 Kronika 33:2, 10-​13; 1 Korinth 6:9-​11.

17. Ngera ngrullii el kirem a olubet el tengetengel a Jesus?

¹⁷ A Jehovah a ousubes e obes a kngtim a lsekum e ke obult e kongei er a klechubechub er ngii. Omomdasu e ngolengesonges sel olubet el tengetengel a Jesus, me a Jehovah a diak el sebechel el ousubes a kngtim? A lsekum ke omdasu el uaisei, e ke mla obedikl er a ta er a bedeklel a Satan. Ngsoal a obo momdasu el kmo a olubet el tenget a olengesonges me a Jehovah a diak el sebechel el ousubes a rokui el klengit. Engdi a kngtil a chad a kmal sebechel el musubes a lsekum e ngouuchel er a rengul e obult er a kngtil. (Osisechakl 24:16) A klaumerang er kau el kirel a olubet a sebechel el rullau el mo diak el sal mekngit a ukltkem e smisichau me ke mesiou er a Dios el oba rengum me a uldesuem me a klengar er kau el rokir.​—Mateus 22:37.

KEDE MEDENGEI A ULEKBETIL A SATAN

18. Kede mekerang e oibngid er a bedeklel a Diabelong?

¹⁸ A Satan a diak lomekerreu el kmo ngmekerang a lomedikl er kid, engdi kid a medengei a ulekbetil me ngsebeched el oleiub er kid er ngii. (2 Korinth 2:10, 11) Me sel doluluuch el olengit er a llomeserreng el mo outekangel a omelsemai, e ngdiak demudechem er ngii. A Jakobus a milluches el kmo: “A le ngar ngii er kemiu olengesonges er a llomeserreng, e lolengit er a Dios, me le bsang; ele Dios a ungil a tekingel el diak a le kiresii er a ngii di le chad.” (Jakobus 1:5) Me a omerelled a kirel el mo oltirakl a nglunguched, e mo blechoel el mesuub er a Biblia e kiei el oltirakl a omellach er ngii. Me aike el babier el oltobed a blak a rengul e mellomes a rengul el mesiou a osisecheklid el mo medengei a bedeklel a Diabelong me a rolel a doliub er kid er ngii.

19, 20. Ngera uchul me ngkired el ouketui a mekngit?

¹⁹ A nglunguuch me a omesubel a Biblia a mekurulii a bltkil a rengud el kirel a ungil el tekoi. Engdi ngdirrek el klou a ultutelel el dosuub el mo ouketui a mekngit. (Psalm 97:10) Sel dolatk er a telemellel a ngibeserreng, e ngngosukid el mo oltngakl a mekngit el uldasu. (Jakobus 1:14, 15) Ngkired el mo ouketui a mekngit e mo betik a rengud er a ungil el tekoi. E sel bo deuaisei, e ngdiak dobedikl er a bedeklel a Satan e le kede mo ouketui ngii el tekoi.

²⁰ Ngkmal dmeu a rengud e le Dios a olengeseu er kid me ngdiak dobedikl er a bedeklel a Satan! A Jehovah a ousbech er a oureor el klisichel, Tekingel, me a cheldebechelel el mesebechakl er kid “er Ngikel Mekngit.” (Mateus 6:13) A ongingil el suobel a mo mesaod er a rolel e ngsebeched el oibngid er a lmuut el eru el bedeklel a Diabelong el bla lousbech el omedikl er a remesiungel a Dios.

[Footnote]

[Aike el Ker er a Suobel]

[Siasing el ngar er a 24 el llel]

A omelaes a sebechel el omekdubech a mondai er a chelsel a ongdibel

[Siasing el ngar er a 27 el llel]

Ngsebechel el mo diak el sal mekngit a ukltkem