A bltikerreng a mekreos el deleuill er a delongelir a rechad. A chad el oubltikerreng a ochotii el okiu a omerellel me a cheldechedechal. Ngdirrek el kongei el ousbech a temel, klisichel me aike el ngar er ngii er ngii el olengeseu er tirke el betik er a rengul.

A Moses a mle betik a rengul er a Dios. El okiu a ngera el rolel? A 1 Johanes 5:3 a kmo: “Ele bltikerreng er a Dios a belkul a kmo kede oltirakl a llechul.” A Moses a kiliei el oltirakl er tia el tekoi. Me a bek el tekoi el mle soal a Dios a bo loruul a leriruul, alta e ngmle kirel el mo mengedecheduch er a Farao me a lechub e ngdi mle kirel el odersii a skersel el bedul a Bekerkard el Daob. A ble lebeot me a lechub e ngoberaod el tekoi, me a “Moses a riruul a ikel rokui el le dilu er ngii a RUBAK.”​—Exodus 40:16.

A Moses a dirrek el uluubltikerreng el mo er a rekldemel el chad er a Israel. Te mle medengei el kmo a Jehovah a uluusbech er ngii el omekrael er a rechedal, me te mlo er ngii el olengit a ngeso. A Bades a kmo: “Ma re chad a mle iliuekl er ngii er a tutau el mo kebesengei.” (Exodus 18:13-16) Ngulterekokl a Moses el kmal mlo mesaul a bedengel me a rengul e le ngta el sils el di lorrenges a mondai er a rechad. Me nguaisei, engdi ngkmal mle dmeu a rengul el olengeseu er a rebetik er a rengul.

Ngdimlak di lulerrenges er tir e ngdirrek el milluluuch el kirir a rebetik er a rengul el chad. Ngdirrek el milluluuch el kirir tirke el mle mekngit a omerellir el bedulngii! El ua tiang, sel taem el ochedal er a Miriam a milengeremrum er ngii, e a Jehovah a ulsecherii er a rakt el chebedes. Engdi a Moses a dimlak lolsiich a rengul er a belsel a Miriam e bai di mle mereched el meluluuch el kirel el kmo: “Dios momekungil er ngii, e ak kmal olengit er kau.” (Ulecherangel 12:13) Me sel klou el bltkil a rengul a Moses a uchul me ngmle sebechel el meluluuch el klikiid a uldesuel.

Ngsebeched el oukerebai er a Moses el omekeroul er a bltkil a rengud el mo er a Dios. Chouaitia el bltikerreng a rullid el mo ‘blak a rengud’ el olengesenges a llechul. (Rom 6:17) Me sel doruul el uaisei e kede mo odeuir a rengul a Jehovah. (Osisechakl 27:11) Ngdirrek el mo uchul a klungioled. Me sel dosiou er a Dios el oba mera el bltikerreng, e ngdiak di bo doruul a melemalt el tekoi e kede dirrek el mo dmeu a rengud el meruul!​—Psalm 100:2.

A ta er a rolel e kede oukerebai er a Moses a domekeroul er a bltkil a rengud el mo er a rebebil. Sel lebo lousbech a ngeso a rechedad me a resechelid, e a bltkil a rengud a rullid el mo (1) blak a rengud el orrenges er tir; (2) mo melechesuar a ringelir; e (3) rulleterir me te mo medengei el kmo ngbetik a rengud er tir.

Kede di ua Moses el sebeched el meluluuch el kirir a rebetik er a rengud. A lebebil er a taem e kede mo omdasu el kmo ngdiak el sebeched el ngosuterir er a mondai er tir. Me kede mo melekoi el kmo, “Becherei, ak di mo meluluuch el kirem.” Engdi lak mobes: “A nglunguchel a melemalt el chad a kmal klou a le rellii.” (Jakobus 5:16) A nglunguched a sebechel el rullii a Jehovah el mo meruul a tekoi el ngosuir ngii el chad, alta e ngdimlak lolatk a Jehovah el mo meruul er ngii. Me ngmera el klou a ultutelel el kired el meluluuch el kirir a rebetik er a rengud. *

Me kau, ke kongei el kmo ngsebeched el suub a betok er a kerebil a Moses? Alta e ngmle uai kid el di chad, engdi ngulechotii a klou el klaumerang, klengariourreng, me a bltikerreng. Me a dekerekikl el oukerebai er ngii e ngmo uchul a klungioled kid me a rebebil.​—Rom 15:4.