1-3. Mosaod er sel rolel er a lomeka er a seked a Jesus el ngar er a basio el kmeed er a Bethsaida. (Momes er a siasing er a uchelel a suobel.)

 KA MOLATK er tiang. (Monguiu er a Mateus 14:14-21.) Ngtelkib el taem er a uchei er a Baskua er a rak er a 32, e a bekord el 5,000 el sechal, el diak domechur er a redil me a rengalek a uleltirakl er a Jesus me a redisaiplo er ngii el mo er a cheloit el beluu el kmeed er a Bethsaida er a mo bedul a Daob er a Galilea.

² Me sera lesa seked, e a Jesus a kmal mlo chubteterir, me ngulemekungil er a resmecher e ullisechakl er tir a betok el tekoi el kirel a Rengedel a Dios. E mocha kebesengei, me a redisaiplo a dilu er a Jesus me lolmesumech er a rechad me lebo er aike el kmeed el basio e di el tir el omechar a kelir. Engdi a Jesus a dilu er a redisaiplo er ngii el kmo: “Kemiu bo besterir a kelir me lomengur!” Te mlo rrau a rengrir er a tekingel e le kall el lullab a di mle kleim el blauang me a teblo el mekekerei el ngikel.

³ A klechubechub er a Jesus a mlo uchul e ngrirellii a ta el mengasireng el tekoi el ngii a di chimo el ongasireng el llechukl er a chelsel aike el eua el Evangkelio. (Mk. 6:35-44; Lk. 9:10-17; Jn. 6:1-13) Me a Jesus a dilu er a redisaiplo er ngii me longudel er a rechad el mo dersokeim el chelludel me a derdart. A uriul er a loluluuch, e ngmocha omechebached er a blauang e merous aika el ngikel. Engdi ngdimlak di lengii el merous a kall, e ngbai ngilai “el mesterir a rubengkel me te mo omesterir a re chad.” Me a rechad a ulemengur el mo medinges. Ka di molatk: A Jesus a ulemeka er a rebetok el telael el okiu a chimorir a redi mekesai el disaiplo er ngii. *

4. (a) Ngera el kall a kmal mle soal a Jesus el merous er ngii e ngera uchul? (b) Ngera kede mo mesaod er ngii er tia el suobel me sel ongingil?

 ⁴ Engdi a Jesus a ileakl el kmal mle soal el omeka er a rechedal el ousbech a tekingel a Dios, e le ngmle  medengei el kmo ngmo uchul a diak a ulebengelel el klengar. (Jn. 6:26, 27; 17:3) Sel klechubechub er ngii el lulechotii er a lomekang er a seked a uchul me ngdirrek el milengoit er a klou el taem el olisechakl er a rulebengkel. (Mk. 6:34) Ngmle medengei el kmo ngdi kedeb a temel el ngar tia el beluulechad e di kmedung e nglmuut el mo er a eanged. (Mt. 16:21; Jn. 14:12) Me ngmekerang a Jesus a lengar er a eanged e lomekang er a rultirakl er ngii el ngar tia el chutem el olab a Tekingel a Dios? Ngmeruul er a osisiu el rolel el omekang er a rebetok el okiu a chimorir a remekesai. Me te rua techa tirka el di mekesai? Me bo desa sel rolel er a Jesus e nguluusbech er a redi mekesai el omeka er a rebetok el ngellitel er ngii er a irechar. E a ongingil el suobel e kede mo mesaod er a klou a ultutelel el ker el kmo: Kede mekerang e dongcheterir a remekesai el Kristus a ousbech er tir el omekang er kid er chelechang?

5, 6. (a) Ngera el klou a ultutelel el omelilt a lurruul er ngii a Jesus me bo el sebechir a rultirakl er ngii el mukerreu er a uriul er a kodellel? (b) Ngmilekerang a Jesus e osisecheklterir a rechapostol er ngii el mo meduch el meruul er a ngerachel el bo lenguu er a uriul er a kodellel?

⁵ A bekongerachel el bdelul a delengchokl a kutmokl a tekoi el mo uchul e ngsebechel a telungalek er ngii el ulekerreu er a uriul er a lemad. Me nguaisei, a Jesus el ngii a Bdelul a ongdibel er a Rekristiano a kiltmokl a tekoi me bo el sebechir a rultirakl er ngii el mo mukerreu er a uriul er a kodellel. (Efe. 1:22) El ua tiang, bekord el eru el rak er a uchei er a lemad, e ngmla er ngii a klou a ultutelel el omelilt el lurruul er ngii a Jesus. Ngilelteterir a remekesai el chad el bo lousbech er tir el omekang er a rebetok. Me bo dosaod.

⁶ Uriul er a loluluuch el ta el kesus, e a Jesus a childelterir a redisaiplo er ngii e ngilelteterir a re 12 el apostol er a delongelir. (Lk. 6:12-16) Ngar er aike el ongingil el eru el rak e ngmlo kmes a deleuill er ngii me tirka el 12 el apostol, me ngullisechakl er tir el okiu a tekingel me a omerellel. Ngmle medengei el kmo ngdirk betok a tekoi el kirir el mesuub. Ngullisechakl er tir el mo ungil rullii a omesiungir e dirrek el milsmechokl a omerellir. (Mt. 10:1-42; 20:20-23; Lk. 8:1; 9:52-55) Ngmirruul el uaisei e le ngmle soal el osisecheklterir el mo meduch el meruul er a ngerachel el bo lenguu er a uriul er a kodellel.

7. Ngerang dilung a Jesus el ngosukid el mo medengelii a ileakl el ngerechelir a rechapostol?

⁷ Ngera mo ngerechelir a rechapostol? A uchei er a Pentekost er a rak er a 33, e ngmle bleketakl el kmo a rechapostol a mo er ngii a ‘deruchellir er omesiou.’ (Rel. 1:20) Me ngera el ileakl el ngerachel a kirir el meruul er ngii? A uriul er a okisel e a Jesus a uluuchais er a nger er tia el ker el mo er a Petrus. (Monguiu er a Johanes 21:1, 2, 15-17.) Ngar er a delongelir a rebebil er a rechapostol, e a Jesus a dilu er a Petrus el kmo: “Momecheliu a chermek el sib.” Me a Jesus a ulechotii el kmo ngmo ousbech er a rechapostol er ngii el mo omeka er a rebetok el ousbech a Tekingel a Dios. Tiang a ochotii a ulekerreuil a Jesus el kirel a ‘chermel el sib’! *

8. Te milekerang a redirk mlo oumerang e ochotii el kmo te mle medengelterir tirke el uluusbech er tir a Kristus el omeka er a rechedal?

⁸ Ngulemuchel er a Pentekost er a rak er a 33, e a dirk milekiis er a kodall el Kristus a uluusbech er a rechapostol er ngii el omeka er a rekuk bebil el ngellitel. (Monguiu er a Rellir 2:41, 42.) A Rechijudea me a rekuk bebil el mlo ngellitel el Kristiano er seikid el taem a mle bleketakl er a uldesuir tia el tekoi, me te “mle blak a rengrir el mesuub osisecheklir  a re apostol.” Tirka el dirk mlo oumerang a mle songerenger er a Tekingel a Dios, e dirrek el mle medengei el kmo te mo ngmai er ker. Me ngmle blak a rengrir el orrenges er a rechapostol el mesaod a tekingel me a omerellel a Jesus e omeketakl a belkul a bades el mesaod el kirel. *​—Rel. 2:22-36.

9. Te milekerang a rechapostol e ochotii el kmo te kmal mle kerekikl er a ngerechelir el omekang a chermel a Jesus el sib?

⁹ A rechapostol a kmal mle kerekikl er a ngerechelir el omekang a chermel a Jesus el sib. Ka momtab er sel rolel er a losaod er a chetituokel el tekoi el dilubech er a chelsel a dirk milteketek el ongdibel. Ngmlo er ngii a omengeremrum “rar Chijudea lousbech a tekoi ra Griik el morar Chijudea lousbech a tekoi ra Hebru, ele ar mesobil el dil er tir a mlora kemikr er chomerukel el kall ra bek el sils.” Te milekerang a rechapostol el kirel tia el chetituokel el tekoi? Alta e a ruumesingd er tir a mirrous a kall er sera lomeka er a seked a Jesus engdi chelechang e te ngilelteterir a reteuid el odam el mo oungerachel er a omerusel a kall. E ngera uchul? E le te mle medengei el kmo nglmuut el klou a ultutelel a lomeka er a rechad el ousbech er a tekingel a Dios. Sei a uchul me te mlo blak a rengrir er a “chomesiou lolisechakl.”​—Rel. 6:1-6, BT.

10. Ngoeak a ngera el rolel e a Kristus a uluusbech er a rechapostol me a remechuodel el mla er a Jerusalem?

¹⁰ Me sera rak er a 49, e a rebebil el mechuodel a mlo obengterir tirke el mlo medechel el apostol. (Monguiu er a Rellir 15:1, 2.) A “re apostol ma re mechuodel” el mla er a Jerusalem a milsiou el chelechad er a ruungerachel. Me a Kristus el Bdelul a ongdibel a uluusbech er tia el kekerei el chelechad el mesmechokl a tekoi el kirel a osisechakl e omes e omekrael er a berkel a klumech me a osisechakl el kirel a ungil chais er a Renged.​—Rel. 15:6-29; 21:17-19; Kol. 1:18.

11, 12. (a) Ngerang a ochotii el kmo a Jehovah a ulemekngeltengat er sel rolel el luluusbech er ngii a Ngelekel el omeka aike el ongdibel er a irechar? (b) Ngera uchul me ngmle beot er a rechad el dongcheterir tirke el luluusbech er tir a Kristus el omeka er a rechedal?

¹¹ A Jehovah ngulemekngeltengat er sel rolel el luluusbech er ngii a Ngelekel el omekang aike el ongdibel er a irechar? Chochoi. Kede mekerang e medengelii tiang? A babier er a Rellir a kmo: “Ser a lomais ngiil beluu [a apostol el Paulus me a rulebengkel] e te milsterir a ruumerang a ikel llach el meltib er a re apostol ma re mechuodel  el ngar a Jerusalem el kirir el mo oltirakl. Isei e a ikel Ikelesia a mengal mlo mesisiich el oumerang e mle bek el sils el lorael el mo betok.” (Rel. 16:4, 5) Kede mesang el kmo aike el ongdibel a milleketek e le tir el ullengesenges a ulekrael er a chelechad er a ruungerachel el mla er a Jerusalem. Tiang a ochotii el kmo a Jehovah a ulemekngeltengat er sel rolel el luluusbech er ngii a Ngelekel el omekang aike el ongdibel. Lak dobes el kmo a omeleketek er a Tekingel a Dios a mo sebechel el meketmokl el di okiu a klengeltengat er a Jehovah.​—Osi. 10:22; 1 Ko. 3:6, 7.

 ¹² Me kede mla mesang el kmo a Jesus a mle ulterekokl a rolel a lomekang er a ruleltirakl er ngii. Ngulemeka er a rebetok el okiu a chimorir a remekesai. Ngdirrek el mle beot er a rechad el dongcheterir tirke el luluusbech er tir a Jesus el omeka er a rechedal, e le ngmle sebechir el omes aike el lurruul a rechapostol el tir a mle kot el chedal a chelechad er a ruungerachel. A Rellir 5:12 a kmo: “Ng betok el ongasireng ma meklou el tekoi a le riruul a re apostol er a delongelir a re chad.” * Me tirke el mlo Kristiano a dimlak a ungil el uchul e loker el kmo: ‘Te rua techang a lousbech er tir a Kristus el omekang a chermel el sib?’ Engdi tiang a mlengodech er a uriul er a rak er a 100.

13, 14. (a) Ngerang dilung a Jesus el kirel a odechelakl, e ngulemuchel el mo tmaut a tekingel er oingerang? (b) Ngokiu a ngera el eru el rolel e ngmlo er ngii tia el odechelakl? (Momes er a bebil el omesodel.)

¹³ A Jesus a ulemlaoch el kirel a odechelakl el mo er a ongdibel er a Rekristiano. Ngar sel okesiu el kirel a ungil me a mekngit el dellomel, e ngdilu el kmo a cheraro a mo omriid a tane er a mekngit el dellomel (reklsuul el Kristiano) er a delongelel a tane er a ungil el dellomel (rengellitel el Kristiano). Aika el dellomel a mo dmak el mukeroul el mo lmuut er a temel a omeridm el mo er ngii er a “ulebongel er a beluulchad.” (Mt. 13:24-30, 36-43) Ngdi mle telkib el taem e a tekingel a Jesus a ulemuchel el mo tmaut. *

¹⁴ A ultok er a mera el osisechakl a ulemuchel er a uchei er a rak er a 100, engdi tirke el blak a rengrir el apostol er a Jesus a ‘milerrob er ngii’ me lak loberk a klsuul el osisechakl el mekidekelii a ongdibel er sel taem. (2 Th. 2:3, 6, 7) Engdi uriul er a lemad a rechapostol e tia el ultok er a mera el osisechakl a uleberk e millemolem el betok el dart el rak. Me ngar er a chelsel aike el rak, e ngmlo betok a mekngit el dellomel er a ungil el dellomel. Ngdimlak a ulterekokl el cheldebechel el luluusbech er ngii a Jesus el omeka er a rechedal. Engdi cherengel a taem e tiang a mlengodech. Me ngoingerang e tia el tekoi a dilubech?

15, 16. A blakerreng er a Remesuub er a Biblia ngmlo uchul a ngera el tekoi, e ngera el ker a mo er ngii?

¹⁵ Me a lolekedang a temel a omeridm, e ngmlo klou a klemeriarreng er a rechad el kirel a klemerang er a Biblia. Uriul er a rak er a 1870, e a kekerei el cheldellir a rechad el kmal mle sorir el mo medengelii a klemerang a mlo dmak e mesuub er a Biblia el ileakl er tirke el mekngit el dellomel, el tir a leko te Kristiano el ngar er a chelsel aike el kakerous el ikelesia er a Klsuul Klekristiano. Tirka el ngariou a rengrir el chad el mle okedongall el Remesuub er a Biblia a mle blak a rengrir el meluluuch e merriter a Bades.​—Mt. 11:25.

¹⁶ A blakerreng er tirka el chad el merriter a Biblia a mlo uchul a betok el ungil el tekoi. Te mileketakl a klsuul el osisechakl e mirrekii a klemerang e mirruul e uleltobed a babier el mesaod er a Biblia e remous er a kmeed me a cheroid el beluu. Me a rebetok  el mle songerenger e meched a rengrir el kirel a klemerang el tekingel a Dios a mlo oumerang aike el tekoi el lullisechakl. Engdi a ker a kmo: A Kristus ngmillutk er a Remesuub er a Biblia er aike el rak er a uchei er a 1914 el mo omekang a chermel el sib? Ngdiak, e le okurulel a dellomel a dirk millemolem me sel rolel a lomekang er a rechedal a dirkak lemeteketek. Me seikid el taem e a omeleakl er a mekngit me a ungil el dellomel a dirkak lomuchel.

17. Ngera el meklou a ultutelel el tekoi a ulemuchel er a rak er a 1914?

¹⁷ Ngua dulsaod er sel mlo merek el suobel, a temel a omeridm a ulemuchel er a rak er a 1914. Ngar seikid el rak, e ngbetok el meklou a ultutelel el tekoi a dilubech. A Jesus a ngiluu a deruchellel el King, e a uriul sils a ulemuchel. (Och. 11:15) Me sera rak er a 1914 el mo er a uchelel a rak er a 1919, e a Jesus a ulebengkel a Demal el mo er a okesiu el templo el mo merriter e mengikiid er ngii. * (Mal. 3:1-4) E sera rak er a 1919, e ngulemuchel a omengudel el ungil el dellomel. Me tiang ngmle taem el kirel a Kristus el mo ngiltii a cheldebechel el mo omeka er a rechedal? Chochoi!

18. A Jesus ngulemlaoch el kirel a ngera el tekoi el bo loruul er ngii, e ngera el ker a mlo er ngii er a uchelel a uriul sils?

¹⁸ Ngar er a ulochel a Jesus el kirel a uriul sils, e ngdilu el kmo ngmo tutkii a mesiou el mo merous a ‘kall er sel belsechel.’ (Mt. 24:45-47) Ngmo ousbech er techang? A Jesus a mo omeka er a rebetok el okiu a chimorir a redi mekesai el di ua lurruul er a taem er a rechapostol. Me sera lomuchel a uriul sils, e a ker a dilubech el kmo, te rua techang tirke el mekesai el bo lousbech er tir? Tia el ker me a lmuut el bebil el kirel a ulochel a Jesus a bo dosaod er a ongingil el suobel.