“Ngike el diak el sebechel el ousubes er a rebebil a tomellii sel did el ngii a kirel mo merael er ngii.” Aika el tekingel a chad er a reksi er a Britain el Edward Herbert el kiliei er a bekord el 400 el rak er a uchei a meketeklii a ta er a uchul me ngkired el mo ousubes er a rebebil: Ngmo er ngii a taem e kid a dirrek el kired el mo olengit er a rebebil me lousubes er kid. (Mateus 7:12) Nguaisei engdi ngar er ngii a lmuut el klou a ultutelel el uchul me ngkired el mo ousubes er a rebebil. Ka momtab a tekingel a apostol el Paulus el ngar er a Kolose 3:13.​—Monguiu.

Kid el rokui a diak demecherrungel a uchul me a lebebil er a taem e kede mo meruul a tekoi el tomall a rengrir a rebebil, me tir me te dirrek el sebechir el mo meruul a osisiu el tekoi el me er kid. (Rom 3:23) Me ngmekerang a delemelemii a budech er a delongeled? A Dios a ulemekrael er a Paulus el mo omeklatk er kid el mo oba kllourreng e mo kausubes. Tia el tekoi a ngar er ngii a ultutelel er chelechang el di uai sel taem er a lemeluches er a bekord el eru el telael el rak er a mla me mong. Ka me bo dekerekikl el omes a tekingel a Paulus.

“Bo lulserechakl a rengmiu.” Aika el tekoi el “bo lulserechakl a rengmiu” a melekoi el kirel a tekoi er a Grik el mesaod el kirel a bo doba kllourreng. A ta er a suobel a melekoi el kmo a Rekristiano a ochotii tia el blekeradel sel “lekengei el mo oba kllourreng el bedul tirke el chad el mekngit el omerellir me a blekerdelir a tomall a rengrir.” Me sel dodengei el kmo ngar er ngii a blekerdeled el sebechel melemall a rengrir a rebebil, e ngdiak debechei aika el mekngit el blekerdelir me letemellii a budech er a delongeled. Engdi ngmekerang a lsekum a rebebil a rullii a mekngit el me er kid?

“Bo mkausubes a mlo mekngit er a delongeliu.” A doltirakl er a ta el chellimosk el chad, e a tekoi er a Grik el “mkausubes” a “diak el tekoi el leblechoel el ousbech er ngii el kirel a chitel me a lechub e ngklausubes er a klengit . . . e ngbai tekoi el lmuut el mesisiich a belkul el melisiich er sel bekokeuii el teletelel a klausubes.” A kuk ta er a babier a mesaod er tia el tekoi el kmo “ngmo rullii a ungil el mo uchul a klungiolel a ta er a chad.” Kede ochotid el bekokeuii sel dekengei el mo ousubes er a chad alta e ngngar er ngii ‘a ultutekled el kirel’ ngii el chad. Engdi ngera uchul me ngkired el mo ousubes er a chad? E le kede medengei el kmo ngmo er ngii a taem e kid me ngdirrek el kired el olengit er a chad me lousubes er kid.

“Ng kiriu el mo kausubes, el ua ia Rubak el mla ousubes a telemelliu.” Tiaikid a ngaruchei el uchul e ngkired el ousubes er a rebebil e le Jehovah el Dios a ousubes er kid. (Mika 7:18) Ka molatk er sel klou el tekoi el lerirellii a Jehovah el kirir tirke el ulebult er a kngterir. A Jehovah a diak el uai kid el meruul a mekngit. Engdi ngkmal kongei el ousubes er tirke el mla obult er a kngterir alta ngmedengei el kmo ngdiak bo lolengit er tir me lousubes er ngii. Me nguaisei, a Jehovah a kot el ungil el kerebai el kirel a klausubes el mocholt el mo er tirke el mla obult er a kngterir!

A klechubechub er a Jehovah a olekeed er kid er ngii e rullid el mo soad el oukerebai er ngii. (Efesus 4:32–5:1) Me ngungil a doker el kmo, ‘A Jehovah a mle bekokuii el ousubes er ngak, me ngera me ngdiak kuusubes er a chad el uluuchel er a rengul el kirel sel mekngit el lerirellii el me er ngak?’​—Lukas 17:3, 4.