ME NGUAISEI, engdi tirke el omdasu el kmo a klechelid a kirel el mo dmak a kuk ngodech a uldesuir el kirel tia el tekoi. A Eboo Patel, el miluchelii a cheldebechel el Interfaith Youth Core a kmo: “Ngdiak a ta el klechelid el diak lolisiich a klechubechub . . . , e diak lolisiich er a rechad el mo omekerreu er a beluulechad . . . , e diak lolisiich a ungil el omeruul el mo er a rechad.”

Nguaisei, ngmla er ngii a taem e a rechad er a klechelid er a Buddha, Katolik, Brodestant, Hindu, Muslim, me a lmuut el bebil a mlo dmak el rokui el melasem el merrob a chelebuul, e melisiich a llemeltir a rechad, e oureor el omul a omelakl el dub er a chutem, me a lechub e te omeklatk el kirel a telemellel a beluu. Me a kakerous el klechelid a mlo dmak el osiik a rolel e ngmo er ngii a ungil el klaodengei me a omelisiich er a delongelir. Te dirrek el mo dmak el oldeu a rengrir el kirel sel klekakerous er a delongelir el okiu a lomtaut a kandalang, meruul a ungil el klebesei, chelitakl, nglunguuch, me a lmuut el bebil el tekoi.

Aika el klaiuedak er a klechelid ngrolel e ngsebechel el mesmechokl a uldasu er a delongelir tirka el chad? Me a Dios ngsoal a klechelid a bo ledak el rullii a beluulechad el mo ungil?

A ta er a kot el klou el cheldebechel er a klechelid el mla mo dmak a mesaod el kmo a rechedal a mla er a kuk betok er a 200 el kakerous el klaumerang e kmal mesisiich a urerir er a chelsel a 76 el beluu. E sel turrekong er tir a “mo oldubech er a mesisiich el klaingeseu er a delongelel a klechelid er tir.” Engdi tiang a kmal beot a dolekoi er ngii e kmal meringel a bo doltaut er ngii. El ua tiang, a doltirakl er tirke el miluchelii tia el cheldebechel, e sel contract er tir a kmal mle kirir el mo kerekikl aike el tekoi el lulluches me ngdiak bo luchul e ngmetemall a rengrir tirka el chad er a klechelid el mle saing er ngii. E ngera uchul? A ta el tekoi el mle klou a klautok er a delongelir a rechad el kirel a kmo ngkirel el mo er ngii a Dios er a chelsel tia el contract me a lechub e ngdiak. A uriul e ngdimlak el llechesii me a lechub e losaod er a Dios er a chelsel tia el contract.

Me a klaumerang ngerang ngrullii er tia el cheldebechel a lsekum e ngdiak losaod el kirel a Dios? Me a lmuut el tang, ngmekerang e tia el cheldebechel er a klechelid e kuk ngodech er a ngii di el cheldebechel el oldubech a tekoi el kirel a ngeso el kirir a rechad? Sei a uchul me tia el cheldebechel a mesaod el kirel el kmo ngdiak el cheldebechel er a klechelid, e ngbai “cheldebechel el melisiich a klaingeseu” er a delongelir a rechad.

A Dalai Lama, el kmal melisiich er a cheldebechel er a klechelid el mla mo dmak a dilu el kmo: “A rokui el meklou el klechelid a obang a osisiu el klumech el kirel a bltikerreng, klechubechub, me a klausubes.” E dilechelii  el kmo: “A klou a ultutelel a kmo aika el ungil el blekeradel a kirel el mocholt er a bek el sils er a klengar er kid.”

Nguaisei, a klungel a ultutelel a chouaika el blekeradel el bltikerreng, klechubechub, me a klausubes a dodengei. A Jesus a dillii a klou a ultutelel el llach el kmo: “Moruul el mor a re chad a ikel somiu a loruul el ekor kemiu.” (Mateus 7:12) Engdi a ker a kmo: A mera el klaumerang ngkirel el di melisiich a ungil e merekong?

A apostol el Paulus a milsaod el kirir a rebetok el dilu el kmo te mesiou er a Dios er sel taem er ngii el kmo: “Ak ungil el medengei el kmo ng kmal blak a rengrir el mesiou er a Dios, e ngdi diak lungil el medengei el kmo te mekera losiou er a Dios.” Me ngera mle mondai er tir? A Paulus a dilu el kmo: “Ele ng diak lodengei el kmo ng mekera Dios a loruul er tir el mo ungil er a rengul, me te millasem el di tir el meruul er a rolel.” (Rom 10:2, 3) Me a lsekum e ngdiak a melemalt el klemedengei el kirel a soal a Dios a bo loruul, e a blakerreng me a klaumerang er tir a mo diak a ultutelel.​—Mateus 7:21-23.

A Jesus a dilu el kmo: “Te ngeltengat a re meruul a budech.” (Mateus 5:9) A Jesus a uleltaut a osisecheklel er a lolisiich a tekoi el kirel a budech e ngiluu tia el klumech el kirel a budech el mo er a rechad el kakerous a klechelid er tir. (Mateus 26:52) Me tirke el kilengei er ngii a kmal mlo mesisiich a bltikerreng er a delongelir. (Kolose 3:14) Engdi a turrekong er a Jesus ngdi mle soal el meruul er a delongelir a rekakerous el chad me bo el sebechir el dmak el ngar er a budech? Ngmlo obengterir a rebebil el ngar er a rolel a longull er a Dios?

A remengeteklel a klechelid el re Farisi me a re Sadusi a kmal ulemtok er a Jesus el ulsiik a rolel a kodellel. Me ngmilekerang a Jesus? Ngullisechakl er a redisaiplo er ngii el kmo: “Bo bechititerir! Te meiko e leko te mengetakl er a re meiko.” (Mateus 15:14) A Jesus a dimlak lolisiich er a klaiuedak er a klechelid el obengterir tirke el uaisei el chad.

A betok el rak er a uriul, e a ongdibel er a Klekristiano a mlo er ngii er a Korinth, el ngar er a beluu er a Gris, el mle merael a chisel el beluu el kirel a betok el bedengel a klechelid er ngii. Ngmle kirir el mekerang a Rekristiano el ngar sel beluu? A apostol el Paulus a milluches el mo er tir el kmo: “Lak bo mdak el meruul a ngerang kemiu ma re chad el diak loumera er a Kristus.” E ngera uchul? A Paulus a dilu el kmo: “Ng mekera e sebechel el mo ta delongelel a Kristus ma Diabelong? Ng ngera odekiar a chad el oumerang ma chad el diak loumerang?” E dillii tia el ulekrael el kmo: “Mcheridemiu er tir, e mngeseklemiu er tir.”​—2 Korinth 6:14, 15, 17.

Me ngbleketakl el kmo, a Biblia a kmal omtok a klechelid el mla mo dmak. Engdi ke locha mo melatk el kmo, ‘Ngmekerang e meketmokl a mera el kltarreng?’

Sel International Space Station, el merael el meliuekl er a beluulechad, a mileketmokl el okiu a uldak el urerir a bekord el 15 el beluu. Omomdasu, e ngmle sebechel tia el ureor el meketmokl okmo aike el beluu el dilak loureor a mlo diak el sebechir el kongei el kmo ngera el blueprint a bo lousbech er ngii?

E tiaikid a osisiu el blekeradel el lechelebangel er ngii a klechelid el mla mo dmak. Me alta e a klaingeseu me a omengull a lolisiich er ngii engdi ngdiak a ulterekokl el blueprint el lekengei er ngii a rokui el klechelid el sebechir el ousbech er ngii el melisiich a klaumerang. Misei e aike el tekoi er a kldung me a osisechakl a melemolem el uchul a klekakeakl er a delongelir.

A Biblia a ngar er ngii a llechul a Dios er a chelsel, el di ua blueprint. Ngsebeched el meleketek a klengar er kid el oltirakl aike el lolekoi a Biblia. Me tirke el mla mo oumerang e oltaut er ngii a mla mo mesisiich er a omengetukel el kirel a klechelid me a siukang er a rechad e mla mesuub el mo dmak el oureor el ngar er a budech me a kltarreng. A Dios a ulemlaoch el kirel tiang el kmo: “E sola e ak mo melodech a omelekingir a rechad el mo bliochel el omelekoi, me ng di mo ngak el tang a bo loluluuch er ngak.” A kltarreng a mo er ngii el okiu a “bliochel el omelekoi,” el ngii a omengull el soal a Dios.​—Sefania 3:9, NW; Isaia 2:2-4.

A Resioning er a Jehovah a kmal mengemedaol er kau el mei er a Blil a Ongdibel er tir el kmeed er kau me bo mesa sel klou el budech me a kltarreng el ngar er ngii er a delongelir.​—Psalm 133:1.