Kau ke blechoel el meluluuch? A rebetok el chad a meluluuch, el mo lmuut er a rebebil el chad el tir a diak loumerang er a Dios. Engdi ngera uchul me a rechad a meluluuch? A doltirakl er a ta el omesuub er a beluu er a France, e a tedobech el ildisir a rechad er a France a meluluuch me a lechub e te dmolech el melebedebek “me bo lemechelaod a rengrir.” Te di ua rebetok el chad er a Europe, el tir a diak loluluuch el mengull er a Dios. Te di sorir sel “ongelaod el mei el oeak a nglunguuch.” Ngar er a kuk bitang, e a rebebil er a ruumerang a di mo er a Dios er sel taem el lousbech a ngesou, e melatk el di mereched el ngmai a nger er aike el ongterir.​—Hosea 5:15.

E kau a kuk mekerang? Omomdasu e a nglunguuch ngkuk di ta er a rolel e ngmo bleketakl a uldesuem? Me a lsekum e ke oumerang er a Dios, e ke mla mesa el kmo a nglunguchem a olengeseu er kau? Me a lechub e ke omdasu el kmo a nglunguchem a diak lemonger? A Biblia a sebechel el ngosukau el mo medengei el kmo a nglunguuch a diak el di ta er a rolel e ngmo ungil a rengum, e ngbai mekreos el rolel e ke mo olekeed er kau er a Dios.