A UCHUL ME A REBEBIL A MERINGEL ER TIR EL OUMERANG: A doltirakl er a omesuub el mla meketmokl e tia el galaxy er kid a ngar er ngii a kesengil e ng 100 el biliol el planet er a chelsel. Me a rebetok el chad a omdasu el kmo, ‘tia el universe a kmal imis el klou me ngera uchul me ngika el kot el mesisiich el Ulemeob a kirel el kerekikl el mengkar er a redi chad el ngar tia el kmal kekerei el planet?’

A OSISECHAKL EL NGAR ER A TEKINGEL A DIOS: A Dios a dimlak di lebeskid a tekingel el Biblia e lechitid e bo lak lomekerreu er kid. A Jehovah a bai oterekokl a rengud el kmo, ng “mengkar er a re melemalt e orrenges ongterir.”​—Psalm 34:15.

Ka molatk er a Hagar el redil el kiliei er a bekord el 1,900 el rak er a uchei er a Kristus. Ngmlo metetoech a medal er a mastang er ngii el Sarai, me a Sarai a mlo omekringel er ngii me ngchiliis. Me alta e ngmekngit el omerellel a Hagar a uchul e ngchiliis, engdi a Dios ngchilitii e mlo diak lomekerreu er ngii? A Biblia a kmo: “A anghel er a RUBAK ulsiueklii.” Me ngmlo chemolodii a Hagar er a ledu el kmo: A “RUBAK a rirengesii a lengelem er a chelebulem.” Me a Hagar a dilu er a Jehovah el kmo: “Kau a Dios el omes.”​—Genesis 16:4-13.

A Dios a dirrek el omes er kau. Ngsebeched el omekesiu er ngii er a betik a rengul el chedil el kerekikl el omes er a rengelekel, e ileakl el kmal kerekikl er ngike el kekerei e le ngousbech er a lmuut el klou el ngeso. Me ngdi osisiu, a Dios a kerekikl el omes e mengkar er kid el ileakl er sel taem el lemechitechut a rengud. A Jehovah a kmo: “A delengcheklek a ngar bab e chedaol, e ngdi kdirrek el kiei el obengterir a re ngariou a rengrir ma re ouuchel a rengrir er a klengit, me ng sebechek el lmuut el omekngar a reng er tir e melisiich a rengrir.”​—Isaia 57:15.

Me nguaisei, engdi ke locha mo melatk el kmo: ‘Ngerang omdasu er ngii a Dios sel lomes er ngak? Ngomes e di mereched el oukerekeriil er ngak me a lechub e ngmerriter er a renguk me ngmo ungil el medengelkak?’