Ka di molatk er a chedam el mengedecheduch er a ngelekel el sechal el 7 a rekil. Ngdmu el kmo: “Ngmla er ngii a taem er a kmal irechar, e a Dios a milebii a chutem me a rokui el tekoi el ngar er a chelsel. Ngdirrek el milebii a sils, me a buil, me a btuch.” Me a ngelekel a di mle chelellakl el omdasu e lmuut el oker el kmo, “Bapa, ngtecha milebii a Dios?”

Me a chedam a dmu el kmo: “Ngdimlak a mebii a Dios, e ngdi mle blechoel el ngar er ngii.” Me ngika el ngalek a di kongei er a tekingel a demal. Engdi cherengel a taem el lorael el mo klou e ngmelemolem el omdasu er tia el tekoi. Ngtelkib el meringel er ngii el mtebengii el kmo, ngar er ngii a chad el diak a uchelel, e le ngmo lmuut er a chutem me a melidiul me ngmla er ngii a uchelel. Me ngomdasu el kmo, ‘A Dios ngmla er ker el mei?’

Ngmekerang a Biblia e onger er tia el ker? Ngkmal di ua tekingel ngika el chedam el dulsaod er ngii. A Moses a milluches el kmo: “Rubak, . . . uchei er a lobeob a bukl, ma uchei er cho mokedbechii a beluulchad, e kau a diak a ulebengelem el Dios, el diak a uchelem el diak a ulebengelem.” (Psalm 90:1, 2) Me a profet el Isaia a dirrek el dilu el kmo: “Ng diak modengei? Ng dirkak mrenges? A RUBAK a ngii el Dios er a cherechar: ng milebii a beluulchad el rokir.” (Isaia 40:28) Me ngdi ua babilengel a Jude el mesaod er a Dios el kmo, ngdi mla ngar er ngii “er a irechar el mei.”​—Jude 25.

Aika el bades a ochotii el kmo a Dios a “King el diak a uchelel ma ulebengelel” el ua lulsaod er ngii a apostol el Paulus. (1 Timothy 1:17) Me ngbelkul a kmo, a Dios a di mla ngar er ngii er a irechar el mei e melemolem el ngar er ngii el mo lmuut er a ngar medad el klebesei. (Ocholt 1:8) Me tiaikid a ta er a klou a ultutelel el klemerang el tekoi el kirel ngika el Dios el Olab a Bek el Klisiich.

Ngera uchul me ngmeringel er kid el mtebengii tia el tekoi? Kid a kmal kedeb a klengar er kid me a uldesued el kirel a taem a kmal ngodech er a uldesuel a Jehovah. Ngii a diak a uchelel e diak a ulebengelel me a ta el telael el rak a di ua ta el sils er a osengel. (2 Petrus 3:8) Ka di molatk er a chebud. Sel leklunga chebud e ngdi sebechel el melemolem a klengar er ngii el bekord el 50 el klebesei. Me a omomdasu, ngsebechel a chebud el mtebengii a klemengetel a klengar er a chad el sebechel el kiei el 70 me a lechub 80 el rak? Ngkmal diak el sebechel! Me a Biblia a smodii el kmo kid a di ua chebud sel domekesiu er kid el mo er Ngika el Ulemeob er kid. Me a lmuut el tang, a uldesuel a lmuut el kmal ngarbab er a uldesued. (Isaia 40:22; 55:8, 9) Me ngbleketakl el kmo ngmeringel er a redi chad el mo cherrungel el mtab a blekerdelel a Jehovah.

Alta ngmeringel er kid el mtebengii el kmo a Dios a diak a uchelel, engdi ngbleketakl el kmo ngmelemalt el uldasu. E le lsekum ngmla er ngii a milebii a Dios e ngii a ngike el Ulemeob. Engdi a Biblia a kmo, a Jehovah a “mileob a rokui el tekoi.” (Ocholt 4:11) Me a lmuut el tang, kede medengei el kmo ngmla er ngii a taem el dimlak a chutem me a melidiul. (Genesis 1:1, 2) Me aikang ngmla er ker el mei? Ngike el Ulemeob aikang a di mla ngar er ngii er a uchei er a lobeob. Ngdirrek el di mla ngar er ngii er a uchei er tirke el rokui el di ngar el uai a Ngelekel el sechal me a rechanghel. (Job 38:4, 7; Kolose 1:15) Me ngbleketakl el kmo, sera uchelel e ngdi mle ngii el tang. Ngdimlak lobeob e le ngdimlak a ngerang el mle sebechel el mebii.

A chutem me a melidiul el ngar er ngii me kid el outeliil a meketeklii el kmo ngmera el ngar er ngii a Dios el diak a uchelel me a ulebengelel. Ngike el Uchul me ngar er ngii a chutem me a melidiul, Ngike el Oterekokl a llach el omtebechel er ngii, Ngikei a di mla ngar er ngii. Me ngdi ngii a mle sebechel el omeob a rokui el tekoi.​—Job 33:4.