A rengelekem a sebechir el mesuub el mo betik a rengrir er a Dios a lsekum te mo medengei el kmo ngmera el ngar er ngii a Dios e ngii a betik a rengul er tir. Ngkirir el omuchel el mo medengelii a Dios er a uchei er a bo lebetik a rengrir er ngii. (1 Johanes 4:8) El ua tiang, ngkirir el mo medengei el kmo: Ngera uchul me a Dios a ulemeob er a rechad? Ngera uchul me a Dios a omechei a ringel me ngmelemolem? Ngera ngmo meruul er ngii a Dios er a ngar medad el klebesei?​—Monguiu er a Filipi 1:9.

A omerellem a lsekum ngbleketakl el ochotii el kmo ngbetik a rengum er a Dios e ngsebechem el ngosuterir a rengelekem el mo betik a rengrir er Ngii. Me sel lomes a omerellem e ngklou a techellir el mo oukerebai er kau.​—Monguiu er a Duteronomi 6:5-7; Osisechakl 22:6.

A Tekingel a Dios a kmal klou a klisichel. (Hebru 4:12) Me mngesuterir a rengelekem el mo medengei aike el meklou a ultutelel el osisechakl el ngar er a Biblia. A Jesus a mle meduch el olisechakl er a rechad el okiu sel loker a ker, e lorrenges er tir, e losaod a Bades el mo er tir. Me ngsebechel a osisecheklem el medalem er a rengrir a rengelekem a lsekum e ke oltirakl er a rolel a osisecheklel a Jesus.​—Monguiu er a Lukas 24:15-19, 27, 32.

Me a lmuut el tang, a cheldecheduch er a Biblia el kirel a omerellel a Dios el mo er a rechad a sebechel el ngosuterir a rengalek el mo medengelii a Dios e mo betik a rengrir er ngii. Ngar er ngii a babier el mla meketmokl el kirel tia el tekoi el sebechem el metik er ngii er a www.mt1130.com/pau.​—Monguiu er a 2 Timothy 3:16.