Di Bivvel sawkt nix veyyich shmohka a adda anri vayya fa doowak yoosa. Avvah, es veist vi Gott shpiaht veyyich so sacha. Eah is geyyich habits es nett sauvah un nett healthy sinn. So, zu Gott, shmohka is en sind.

•   Respekt veisa fa layva. “Gott . . . hott alli-ebbah layva un ohften un alles gevva.” (Apostelgeschichte 17:24, 25) Siddah es layva en kshenk is funn Gott, dann sedda miah nix du es unsah layva katzah macha dayt, so vi shmohka. Funn awl di sacha es leit shtauva difunn es prevent sei kend, shmohka is ayns funn di mayni reesins es leit shtauva.

•   Leevi fa em sei nochbah. “Du solsht dei nochbah leeva vi dich selvaht.” (Matthäus 22:39) Shmohka bei anri rumm veist nett leevi. Selli es oft in secondhand shmohk sinn henn en graysahri chance fa di saymi diseases greeya es selli es shmohka.

•   Fa heilich sei. “Ich famohn eich . . . es diah eiyah leivah gevvet es en levendich, heilich un en vohl-kfalla [adda acceptable] opfah zu Gott.” (Römer 12:1) “Vella uns selvaht sauvah macha funn alles es unsah leib un geisht unsauvah macht. Un vella fassich gay geyyich folkummani heilichkeit mitt di furcht funn Gott.” (2 Korinther 7:1) Unsah bodies voahra nett gmacht fa shmohk einemma, un’s hald em funn heilich sei​—sell maynd, sauvah un pure​—koss selli es shmohka adda doowak yoosa doon poahbes toxins einemma es iahra body en latt shawda dutt.

 Di Bivvel sawkt nix veyyich marijuana (es hayst aw weed adda pot) adda anri drugs vi sell. Avvah es hott principles es veist es’s letz is fa so addictive shtoft yoosa unni fa health reesins. Do sinn noch may principles es ma apleiya muss:

•   Able sei fa em sei denkes kantrohla. “Du solsht da Hah dei Gott leeva . . . mitt dei gansi meind.” (Matthäus 22:​37, 38) “Haldet eiyah meind sohbah.” (1 Petrus 4:7) En mensh is nett in kantrohl funn sei meind vann eah am drugs letz yoosa is, un feel leit vadda even addict zu si. Iahra meind is yusht uf vi si drugs greeya un yoosa kenna in blatz funn denka veyyich goodi sacha.​—Philipper 4:8.

•   Heicha zu di laws. “Gmohn di leit droh fa sich unnah gevva zu ivvah-saynah [adda governments] un selli vo ovvich eena sinn.” (Titus 3:1) Feel countries henn laws fa kantrohla vi samm drugs gyoost vadda. Vann miah Gott haebbi macha vella, dann sedda miah di laws heicha.​—Römer 13:1.