Dayl Bivla yoosa’s vatt “hell” fa’s Hebrew vatt “Sheol” un’s Greek vatt “Hades,” un awl zvay mayna da grawb. (Psalm 16:10; Apostelgeschichte 2:27) Feel leit glawva in en feiyahrichi hell, so vi’s piktah veist in deah article. Avvah, sell’s nett vass di Bivvel teetsht.

1.   Di dohda vissa nix so si kenna kenn shmatza shpiahra. “Fa vo du anna gaysht im grawb zayld kenn eahvet adda denkes adda eisicht adda veisheit sei.”​—Breddichah 9:10.

2.   Goodi leit gayn zu di hell. Even di faythfeli mennah, da Jacob un da Hiob voahra am ekshpekta fa datt anna gay.​—1 Mosi 37:35; Hiob 14:13.

3.   Da doht is da punishment funn sind, nett soffahra in en feiyahrichi hell. “Fa deah vo kshtauva is, is frei gmacht funn sinda.”​—Römer 6:7.

4.   Brenna inna feiyahrichi hell fa’immah is nett even feah in Gott sei awwa. (5 Mosi 32:4) Vo da eahsht mann, da Adam, ksindicht hott, hott Gott ksawt es sei punishment is fa zu nix gay: “Du bisht eaht, un solsht viddah eaht vadda.” (1 Mosi 3:19) Gott veah am leeya gvest vann eah da Adam zu en feiyahrichi hell kshikt hett.

5.   Gott dutt nett even denka veyyich mensha brenna fa’immah inna feiyahrichi hell. Da idea veyyich leit shtrohfa inna feiyahrichi hell gayt geyyich vass di Bivvel teetsht vo’s sawkt: “Gott is leevi.”​—1 Johannes 4:8; Jeremia 7:31.