Is dei health kshvind shlimmah vadda? Dann vaysht du es en health problem kann dich reeli meet macha, un’s kann en latt geld koshta. Vass kann dich helfa deela mitt dess? Vi kansht du ebbah in di family adda en friend helfa deela mitt en health problem? Di Bivvel is nett en health buch, avvah’s kann dich helfa deela mitt vass du am deich gay bisht.

•   Grikk hilf funn en doktah

   Vass di Bivvel sawkt: “Dee vo ksund sinn braucha kenn doktah, yusht dee vo grank sinn.”—Matthäus 9:12.

   Vass’s maynd: Grikk hilf funn en doktah vann’s nohtvendich is.

   Boviah dess: Grikk’s besht medical hilf es du kansht. Daylmohls, is’s goot fa may es ay doktah sayna. (Shpricha 14:15) Mach shuah es du fashtaysht vass di doktahs mayna, un es si alles fashtayn es du am deela bisht mitt. (Shpricha 15:22) Lann veyyich dei grankheit un aw di treatments es available sinn. Vann du vaysht vass fa ekshpekta, dann zaylsht du able sei fa bessah deela mitt dei situation, un able sei fa goodi decisions macha veyyich vass du brauchsht.

•   Mach goodi habits

   Vass di Bivvel sawkt: “Es dutt em samm goot fa exercise greeya.”—1 Timotheus 4:8, NWT.

   Vass’s maynd: Es helft dich fa boviahra healthy bleiva, so vi reklah exercise greeya.

   Boviah dess: Du reklah exercise greeya, ess healthy, un grikk genunk shlohf. Even vann du noch am boviahra bisht deela mitt dei health problem, experts sawwa du zaylsht goodi results havva vann du boviahsht healthy bleiva. Of course, mach shuah es vass du dusht nett dei health problem adda dei medical treatment shlimmah macht.

•   Grikk hilf funn anri

   Vass di Bivvel sawkt: “En freind gebt leevi di gans zeit, un en broodah is geboahra fa helfa an di zeit funn noht.”—Shpricha 17:17.

   Vass’s maynd: Dei friends kenna dich helfa deich haddi zeida.

   Boviah dess: Shvetz mitt en friend es du trosta kansht un es du sawwa kansht vi du reeli feelsht. Dess kann dich helfa nett so feel stress havva un fa haebbiyah shpiahra. Friends un family vella andem dich helfa in anri vayya, avvah si vissa fleicht nett vass fa du. So sawk si vass si du kenna fa dich helfa. Du nett zu feel ekshpekta funn anri, avvah sei immah dankboah fa vass si du kenna fa dich. Fagess nett, even vann dei friends dich helfa vella, daylmohls mechta si ebbes du es dich overwhelmed. So du musht fleicht si sawwa vi oft un vi lang es si dich psucha kenna.

•   Gukk uf di breiyt seit

   Vass di Bivvel sawkt: “En joyful hatz macht ebbah ksund, avvah ebbah es discouraged is hott kenn grefta.”—Shpricha 17:22, NWT.

   Vass’s maynd: Uf di breiyt seit gukka kann dich helfa kawm bleiva so es du deela kansht mitt dei health problem.

   Boviah dess: Veil’s du am lanna bisht vi fa deela mitt dei situation, focus uf di sacha es du du kansht, nett uf di sacha es nett du kansht. Du nett dich kamperra mitt anri, adda vass du als du hosht kenna eb du grank vadda bisht. (Galater 6:4) Es zayld dich helfa positive bleiva vann du goals machsht es du aekshli langa kansht. (Shpricha 24:10) Helf anri leit vann du kansht, koss sell macht em haebbi un ma dutt nett so feel denka veyyich em sei aykni problems.—Apostelgeschichte 20:35.

 Di Bivvel veist es Jehova a ebbah helfa kann deela mitt health problems. Miah kenna nett ekshpekta es Gott uns hayla zayld deich en miracle, avvah in dee vayya kann eah selli helfa es een deena:

 Peace. Jehova kann uns peace gevva “vo haychah is es alles es miah fashtay kenna.” (Philipper 4:6, 7) Dess peace kann ebbah helfa fa nett zu anxious sei. Gott gebt peace zu selli es bayda zu een un een sawwa vass si uf iahra meind henn.—1 Petrus 5:7.

 Wisdom. Jehova kann uns wisdom gevva so es miah goodi decisions macha kenna. ( Jakobus 1:5) Ma kann dess wisdom greeya vann ma lanna un apleiya vass di Bivvel sawkt.

 En goodah hofning fa da future. Jehova fashprecht en zeit vann nimmand sawwa zayld: “Ich binn grank.” (Jesoiya 33:24) Dee hofning helft feel leit fa uf di breiyt seit gukka even vann si am deela sinn mitt di shlimshti health problems.—Jeremia 29:11, 12.