Feel leit, even samm es sawwa si sinn Christians, feela es vass di bivvel sawkt veyyich sex un keiyaht layva is nimmi fa uns heit. Samm gmayna henn getshaynsht vass si teetsha veyyich recht adda letz yusht fa ufhalda mitt vi leit denka heit. Macht’s ennich ebbes aus vass di Bivvel sawkt veyyich vass recht adda letz is? Yau. Deah article ekshplaynd vi miah dess vissa.

 Mensha voahra gmacht fa gukka zu Gott fa direction. Di Bivvel sawkt: “Ich vays, oh HAH, es em mensh sei layva nett in sei aykni hend is; ’sis nett een es ausmacht vi eah lawfa sett.” (Jeremia 10:23) Jehova a hott uns gmacht fa able sei fa decisions macha, avvah eah hott uns nett’s recht gevva fa tshoosa fa uns selvaht vass recht adda letz is. Because funn sell, vill eah havva es miah releiya uf een.—Shpricha 3:5.

 Miah finna Gott sei denkes in di Bivvel veyyich vass recht adda letz is. Do sinn zvay reesins es uns helft sayna favass dess so valuable is.

•   Gott hott uns gmacht. (Psalm 100:3) Siddah’s Jehova uns gmacht hott, vayst eah grawt vass miah braucha fa haebbi un ksund sei. Eah vayst aw vass haebna zayld vann miah nett sei direction fallohwa. (Galater 6:7) Un, Jehova vill havva vass’s besht is fa uns. Koss funn sell, di Bivvel sawkt es Gott is da vann “es dich land vass es besht is fa dich, deah es dich fiaht im vayk es du gay solsht.”—Jesoiya 48:17.

•   Du vass miah vella kend uns fafiahra. Feel leit mayna si kenna aus fikkahra fa sich selvaht vass recht un letz is bei yusht du vass si vella. Avvah, di Bivvel sawkt “es hatz is fafiahrich ovvich alles shunsht un oahrich veesht.” (Jeremia 17:9) Vann miah nett du vella vass Gott sawkt, zayla miah sacha du es miah shpaydah vinsha miah hedda nett.—Shpricha 28:26; Breddichah 10:2.

 Nay! Di Bivvel sawkt uns di voahret veyyich Gott un vi eah havva vill es miah layva. (1 Korinther 6:9-11; Galater 5:19-23) Eah vill havva es alli-ebbah di voahret vayst veyyich dess. (1 Timotheus 2:3, 4) Christians es breddicha veyyich di Bivvel, missa teetsha vass di Bivvel aekshli sawkt.—Titus 1:7-9.

 Feel leit es nett du vella vass di Bivvel sawkt gukka fa gmayna adda breddichah es si “sawwa vass iahra oahra heahra vella.” (2 Timotheus 4:3) Avvah, di Bivvel hott deah warning: “Vay zu selli es evil goot haysa un’s gooda evil haysa.” (Jesoiya 5:20) So, ma kann sayna es Gott selli ponnisha zayld es nett di voahret teetsha veyyich vass eah sawkt es recht adda letz is.

 Nay. Selli es pleesing sei vella zu Gott fallohwa da Jesus sei example un teachings. Da Jesus hott sei followers gland fa nett nunnah gukka uf anri, avvah fa leevi un respect veisa zu alli-ebbah.—Matthäus 5:43, 44; 7:1.

 Da Jesus hott sei followers ksawt fa layva in da vayk es Gott havva vill. Eah hott si ksawt es samm leit diffand glawva zayla. (Matthäus 10:14) Da Jesus hott nett sei followers ’s recht gevva fa iahra glawva uf anri pusha in ennichah vayk, nett even politics adda governments yoosa fa’s du.—Johannes 17:14, 16; 18:36.

 Selli es boviahra du vass Gott sawkt es recht is, zayla layva may enjoya nau un in da future. (Psalm 19:8, 11) Samm funn di benefits sinn:

•   May joy havva.—Shpricha 29:6.

•   En goodah friendship havva mitt Gott.—Shpricha 3:32.

•   Gott sei hilf havva deich haddi zeida.—Shpricha 11:8.

•   En hofning fa ayvich layva uf di eaht.—Psalm 37:29.