De Schreft rät nich von Halloween (eenje nanen daut uk: Frieowent, Veschlapsdach ooda Schowanaksowent). Dit es een Heljedach, waut väle jieda Joa dän 31. Oktooba fieren. Oba wua Halloween häakjemt un woo daut jefieet woat, wiest, daut daut nich met daut stemt, waut de Schreft lieet.

Waut wie en disen Artikjel seenen woaren

•  Wua Halloween häakjemt un waut doa jedonen woat

•  Baudat daut, daut Halloween von faulsche Gloowes kjemt?

•  Wuarom woat daut Halloween jenant?

•   Samhain: Eena kaun rutfinjen, daut Halloween von de “oole heidnische Fasten häakjemt, waut de Kelten äwa 2 000 Joa trigj fieeden”, sajcht daut Buak The World Book Encyclopedia. “De Kelten jleewden, daut de Doodes sikj kunnen mank de Läwendje romwaundren en de Samhain-Tiet. Dee jleewden, daut de Läwendje de Doodes en dee Tiet kunnen besieekjen.” (See dän Kausten “ Wuarom woat daut Halloween jenant?”)

•   Daut vekjleeden, no Kende schlemmen un Dommheiten driewen: No een Buak no vekjleeden eenje Kelten sikj jreslich, om de Jeista auntoschmäaren, waut sikj romwaundaden. Dee sullen denkjen, daut see uk een Jeist wieren un an dan tochloten. Un aundre brochten de Jeista Scheens, om met dee Fräd to hoolen. a

   Ieeschtemma en Europa fungen de katoolsche Leidasch dan uk met de heidnische Sitten aun un lieeden äare Menschen, daut dee sikj vekjleeden sullen un von Hus to Hus gonen, om no kjliene Jeschenkja to schlemmen.

•  Hakjsen un Jeistawäsen (Vampire, Werwölfe un Zombies): Aul dit es aul lang emma doafäa bekaunt jewast, daut et met de beese Jeista to doonen haft. En daut Buak Halloween Trivia rät daut von dise “butajeweenlich jreselje Jeistawäsen, waut et normal nich jeft” un daut sajcht, daut dee “met dän Doot un de Doodes to doonen haben ooda met de Angst fa stoawen.”

•  Laumpen von utjeholkjade Kjarps: To jane Tiet en Enjlaunt “jinjen se von eene Däa no de aundre, schlemden no Äten un säden, see wudden fa de Doodes bäden, wan se an waut jeewen”. Dee druagen uk “utjeholkjade Wrucken [daut es waut to äten, en bät soo aus groote Beeten] met Taulchlichta, waut soo aus Laumpen wieren. Daut Taulchlicht doabennen stald eene faustjenomne Seel fäa, waut bestroft wort, om Radunk to kjrieen” (Halloween—From Pagan Ritual to Party Night). Eenje Jelieede sajen, daut dise Laumpen jebrukt worden toom beese Jeista fuatgrulen. En de 1800ja Joaren worden en Nuad-Amerika de Wrucken met Kjarps vetuscht, wiels daut sea väl Kjarps jeef un dee leicht jinkj uttoholkjren.

 Jo. Wan eenje uk jleewen, daut Halloween toom scheengonen es un nuscht baudat, sent oba de Sitten, waut doa met en sent, gaunz jäajen daut, waut de Schreft lieet. Halloween kjemt von faulsche Gloowes äwa de Doodes un de beese Jeista.

 Kjikj mol no dise Varzhen, waut wiesen, woo Gott äwa Halloween denkjt:

•   “Kjeena saul . . . met de Jeista räden, . . . ooda von vestorwne Menschen no Rot froagen” (5. Mose 18:10-12, PB).

   Waut daut bediet: Gott es jäajen dee, waut proowen, met de Vestorwne to räden. Mau rajcht wan dee sikj bloos soo doonen, daut see met dee räden wellen.

•   “De Vestorwne weeten nuscht” (Liera 9:5, PB).

   Waut daut bediet: Wäajen de Doodes nuscht weeten, kjennen dee nich met de Läwendje räden.

•   “Ekj well nich, daut jie met de beese Jeista sellen Jemeenschoft haben. Jie kjennen nich tojlikj von däm Harn sien Kuffel drinkjen un von de beese Jeista äat” (1. Korinta 10:20-21, PB).

   Waut daut bediet: Wan wie Gott jefaulen wellen, dan mott wie nuscht nich met de beese Jeista to doonen haben.

•   “[Soo] daut jie bestonen kjennen, wan de beesa Fient junt aunjript. Wiels wie haben nich … jäajen Fleesch un Bloot to kjamfen, oba jäajen jewaultje, beese Jeista” (Efeesa 6:11-12, PB).

   Waut daut bediet: Christen sullen nuscht nich to doonen haben met de beese Jeista, un sikj nich mol soo doonen, aus wan dee met de beese Jeista toop eenen Heljedach fieeden.